eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
25. En el Parc Saint-Maur
Mi tiyo Victor, para fuir los afferramyentos de Paris, topo de alkilar en el Parc Saint-Maur, una sivdadika en los alderedores de Paris, una chika kazika ande eskonderse kon su mujer i sus dos ijos, Raymond i Lulu. Se topa al fondo de una uerta, i no se ve de la kaye, de la kuala es separada – i eskondida – por la kaza prinsipala ande moran los amos de kaza. Aya es ke va pasar toda la gerra, kontinuando de ir en Paris lavorar en kondisyones muy sekanozas en su echo de teshidos en godro, kon sus dos primos i kunyados. Kale dizir ke uno de los dos, Rodolphe Morain, del kual ya avli, el ke teniya enkontrado su kapo de orkestra en La Baule, el tambyen topo de alkilar en Saint-Maur. El otro, ke tambyen se yama Victor, tyene la inkreivle ozadiya, en medyo de la gerra, de azer fraguar una kaza en Gournay, otra sivdadika no leshos de Paris. Ma eskapara por ser travado por los Turkos en 1944. Esto es una otra istorya, sovre la kuala avlaré mas despues.
Esto dicho, guadro unos kuantos rekodros del Parc Saint-Maur, i mismo aparesko un muy chikitiko tyempo en un film…
Mori unos kuantos diyas ande mi tiya i mi tiyo, deviya ser por las vakansas de Pesah o de enverano 1942. Muy pokos rekodros : la yerva entre las pyedras de los marshpyés (no tenemos esto en Paris), la uerta ande djugo al gato kon mis primos, las playas del bodre de la Marne. I mismo un rekodro mas presizo : mi primo Raymond, ke para mi es un grande – en vedra, tyene sinko anyos de mas de mi : si tengo sinko anyos, el tyene diez, ma a mis ojos tyene vente ! – tyene un velo. I basha una kaye kon karucha libera kon mi grande admirasyon. Acheta de tomarme sovre su velo, asentado delantre de el no se komo. I es la abashada en karucha libera. Grito : Ayudo ! ayudo ! Ama en vedra so tresalido.
Una vez mis primos Roger i Claude Morain, los ijos del otro Victor, vyenen en kaza, i djugamos al gato en la uerta. Komo so el mas chiko, no tengo por siguro dinguna esperansa. Claude, kon grande kebarlik, se desha aserkar a unos kuantos sentimetros. Tyendo la mano para tokarlo, ma kon una lijereza de animal, el se enkorva i se eskabuye de mi ; mi mano no topa nada, i yo me kedo tan emplazmado de enkanto ke dainda me lo akodro !
El filmo, es otra koza : me vo a la kaza alkilada por el ke yamo tiyo, i ke en vedra es un primo de mi padre, Rodolphe Morain ; se merko una kamera de sinema, i me filma al lado de su ija, mi primika Jacqueline. Por una vez so yo el mas aedado. Estamos los dos kon un chiko velo. Surea solo un puntiko, es en preto i blanko, ma egziste…Jacqueline lo traslado en DVD.
A propozito de Rodolphe Morain, el mismo me konto un rekodro suyo : esta en un buro del konsulado de Turkiya ; por kualsikyera razon el empyegado ke lo resive tyene de salir del buro, deshando unos kuantos minutos Rodolphe soliko en el buro. El aprovecha esto para echarse sovre todos los papeles del konsulado ke puede topar, toma el muur del Konsulado, i se mete a ensiyar komo un loko los papeles vaziyos ke se arrovo, dizyendose : no se save, puede ser va servir un diya. En vedra no tuvo ke uzarlos, ma yene el djesto amostra kyen era Rodolphe…
A kontinuar…
Edmond Cohen
Paris, Fransya
Fuente: LK/eSefarad
