eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
23. El tyempo de los aferramyentos
Kale dizir ke en kaza, la atmosfera no es buena. Yo no me do byen kuenta de lo ke se pasa, ma ya syento el espanto, el sar de kada momento ke bive mi famiya. Lo ke no puedo saver, es ke los djudyos an empesado de azerse aferrar en la kaye, en kaza, en todos lugares. En todo momento, la polisiya puede ayegar, sovre todo en medyo de la noche. Esto afito una noche. La puerta sona. Betty va avrir. Tenyendo pasaporte turko, sivdadana de un pais neutro, se topa sozde al abrigo de las aferramyentos – lo ke keda muy teoriko , el consulado turko no amostrando en estos tyempos una hiba grande para la proteksyon de sus sivdadanos djudyos. El ombre es un pulis, Betty es muerta de sar. En fakto, el pulis vyene solo para senyalar ke un perde de defensa pasiva kedo avyerto kon la luz asendida ; lo vido de la kaye. Betty serra pishin el perde i demanda mil pedrones… El pulis se va. Va dizir a la kapidjiya ke ya se apersivyo del espanto ke su venida teniya kavzado.
Agora, kuando vyene la noche, no avrimos mas la puerta si no sona tres vezes, lo ke kyere dizir ke es una persona de la famiya. Si no es, es dechidado de fuir por la puerta de la eskalera de servisyo, esperando ke la polisiya no tuvo la negra idea de meter alguno detras. I dainda oy, en el korason del siglo 21, no solo la famiya a konservado este uzo de sonar tres vezes, ma este uzo se kontinuo kon el interfon en mi buro de avokato, i a sido tomado por la avokata (kristyana) ke me sigyo i por sus empyegados, ke por siguro no saven ke este uzo es un rekodro de muestra povereta de defensa kontra los afferramyentos de 1942…
Al empesijo (deviya ser el invyerno 1941-1942) mos kedamos en el apartamento para durmir, un apartamento entezado en este invyerno tan fuerte ande no tenemos kimur para la soba, solo un poko de gaz para gizar. Antes de la gerra fonksyonava una kalefaksyon sentrala del han ke ayegava por bokas de kalor, ama yo, solo konosi bokas de kalor yeladas. La kalefaksyon sentrala del han se kedo kon la gerra, i nunka empeso de muevo despues de la gerra. Sera mi padre, kiradji, ke eskapara por instalar de sus paras una kalefaksyon al gaz, ma esto se va azer muncho tyempo despues de la gerra, i yene en dos tyempos : en primero la parte de los mushteris, i solo despues la parte morada. Ma agora estamos en 1941 o 42, i la kama esta entezada, i mi madre, para basinarla, se va al mupak enchir bokales de agua kayente, lo ke una vez sovre dos aze patladear el vidro ; para mi son yorros terrivles a kada vez ke el bokal se rompe. Es mas ke puedo soportar, i kideo a mi mama : deke rompites el bokal ? Ma deke rompites el bokal ?
En kuanto a las ablusyones, no son kozas de plazer. Es vedra ke tenemos una sala de banyo, ma no puede servir de nada, sin kalefaksyon i yelada buz, i ademas sin agua kayente. Ma tenemos tambyen un lugariko chiko manko yelado, kon un lavabo, i aya mos vamos, ma solo kamina el bushluk de agua yelada ; el otro bushluk es sozde para la agua kayente, salvo ke agua kayente no ay. Mama me lava kon agua kaentada al gaz de la kuzinera, mesklada kon agua yelada del lavabo. Esto me aze koshkiyas, tengo friyo, grito, por siguro no me plazen las ablusyones.
Es solo munchos anyos despues de la gerra ke tendremos tres konfores ke vendran uno despues del otro : en primero la sala de banyo podra de muevo servir para tomar banyos ; muncho mas tadre, el bushluk del lugariko kon lavabo tendra un mesklador ; i yene munchos anyos mas tadre, tendremos una dush… luso ultimo.
Ma de muevo na ke antisipo, myentres ke agora estamos en 1941-42, i ke durmimos en el apartamento entezado de Paris.
Los aferramyentos en todos lugares azyendosen mas i mas frekuentes i amenasando, mi famiya pensa imprudente de kedar a dormir en este apartamento ; se dyo kuenta ke es sovre todo en medyo de la noche ke la polisiya vyene aferrar a los djudyos. Estonses, a la ora de echar, toda la famiya suve, kandela a la mano, a la sejena tabaka, ande tenemos una kamareta de mosa (sin agua, sin elektrisita, i sin numero, komo es el uzo en estos tyempos) i syendo ke no tenemos mosa, los sesh ke semos puedemos durmir en djuntos en esta kamareta chika, sin dingun konfor, ama mas sigura ke el grande apartamento de la tresera tabaka ; yo miro antes de durmir esta chika ventanika en medyo del tavan, i dinguno vyene darme a entender deke, tenyendo un tal grande apartamento, mos vamos todos a enkasharmos en una kamaretika entezada debasho del techo.
Me akodro de un diya ande Betty se fue por una razon fuerte a la Prefektura de Polisiya. Se fue para la tadre, ya son las mueve de la tadre, la ora del tapa-fuego ya paso, en todo kavzo para los djudyos, i dainda no esta aki. Kualo azer ? A kyen telefonear ? A mi no me dizen nada, ama veo i oygo, i so tan espantado komo los otros. Enfin ya abolto… Aviya djentorya en la Prefektura i kedo blokada aya todo este tyempo sin pueder telefonear para trankilizarmos. Ma entremyentres, Papa se envejesyo de dyez anyos…
A kontinuar…
Edmond Cohen
Paris, Fransya
Fuente: LK/eSefarad
