eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
22. La vuelta en Paris okupado
No tenyendo mas nada ke azer en La Baule, tanto okupada por los Almanes komo Paris, la famiya abolta en djulyo en Paris, ande, pishin desde el 3 de oktovre 1940, el Governo de Vichy ordena de si mismo un Reglamento de los Djudyos mas rasisto ke las leyes almanas, en lo ke aze entrar en la « rasa djudiya » djente ke la ley almana no klasa komo djudyos, kijo dizir los ke tyenen solo dos nonos djudyos sovre kuatro, ma kazados kon un djudyo o una djudiya. Lo ke kyere dizir ke uno ke tyene un paryente non djudyo no es djudyo para los Almanes. Lo vyene a ser para los Fransezes si se kaza kon un djudyo o una djudiya.
Desde el diya de despues 4 de oktovre, es dechidado, yene por el governo de Vichy, ke los « ajenos de rasa djudiya » – i Albert es uno de estos, komo todos los myembros de mi famiya salvo yo, ke nasido en Fransya so Fransez por deklarasyon de mi padre – podran ser internados « en kampos espesyales ».
I tres semanas despues, sea el 24 de oktovre 1940, Pétain va saludar, apretandole la mano, a Hitler en Montoire, despues de kualo, el 30 de oktovre, deklata a la radyo, en un diskorso seremonyozo : « Es en el onor i para mantener la unidad franseza (…) ke entro oy en el kamino de la kolaborasyon…Esta kolaborasyon deve ser sinsera… ». El byervo tyene un sentido : no es kuestyon, para el Governo de Vichy, de arreyevar kontra su veluntad la okupasyon enemiga, es kuestyon, a la rovez, de lavorar kon el enemigo… i la administrasyon ofisyala lo va azer, malorozamente, kon una hiba inkontestavle.
Por siguro, yo ke no tengo dainda kuatro anyos, so muy leshos de estos problemas. Mis rekodros son mas livyanos. Me akodro, por egzemplo, del mupak ande yo komiya sovre mi siya alta. Lo ke me impresyonava en esta grande kozina, era la enorme kuzinera kon kimur ke deviya ser de tres metros de largo. Kontra la pared frente a la kuzinera, grandes yukris ande me tresaliya de irme a eskonder. En el sentro del mupak, una meza kuvyerta de una mushama kon kuadrados blankos i korolados.
Una tadre, mi madre me dize ke ya so bastante grande para venir asentarme a la meza de famiya, en el komedor, i me topo por la primera vez asentado sovre una siya en madera bruna de grande persona, al lado de los otros : mis papu i vava, mis padre i madre, mi tiyo Leon. Es un tal grande diya para mi ke dainda tengo el rekodro…
Una otra tadre es Pesah (1941 ? 1942 ? No se). Lo ke me toka lo mas en el seder i ke me akodro, es ke mi padre me enkolga una tovaja en la espalda atada komo un bogo, para guadrar la masa.
Si, ya se, el haliz byervo ebreo es matsa, ma en djudeo-espanyol se pronunsya masa. Guadro este bogo durante toda la seremoniya del seder. La masa, es bueno…ma yuch para untar.
A la meza komo en otros lugares, el moabet se aze en djudeo-espanyol. Yo no lo se avlar, ma entyendo kaji todo ; una sola koza ay ke no entyendo, es el byervo djudyos, ke vyene a kada okazyon en el lakirdi : ke son estos djudyos, me lo demando ma sin atrivirme de demandar ; son kozas de grandes personas, no es para las kriaturas.
En el salon tenemos el retrato del Mareshal Pétain, ke alguno (de la Polisiya, kreo) vino a traermos. Mi padre, por espanto, no lo refuzo.
Me vo a la eskola de la kaye Blanche, en la klasa de kriaturas chikas ke se topa en la eskola de ijas. Mos engleneamos, enkortamos papeles pikando burakos kon alfinete sovre la imajen apozada sovre un molton bruno…
Kuando el tyempo esta ermozo, mos vamos a tomar el sol asentados en el kortijo, la kavesa protejada por un chapeo de djandarma en papel ke mozotros izimos…
Mos ambezamos kantikas ke traygo a kaza kantandolas a mi manera, kijo dizir charpik :
« Ah el negro lovo ke kaminava en las « binoires »…
Las binoires ? Ke pueden ser estas binoires ? Baignoires (banyeras) ? Ma no kyere dizir nada! Deke el negro lovo kaminariya en las banyeras ? Mis paryentes eskaparon por entender ke les binoires, era la nuit noire (la noche preta)…
A este nivel de edad, ijikos i ijikas son dainda mesklados. Me topo al lado de ijikas de mi edad, kuatro anyos mas o menos. I kuando digo ke me topo al lado, es en vezes brutal. Me akodro de una chakeada ke no ize maksus, en el kortijo de la eskola, kon una ijika ke no teniya visto, era eskondida de mi por una pared. La chaptei fuerte, se fue kaer en basho ande se metyo a yorrar. Yo era el brutal, el negro, kuando en vedra ni la teniya visto. Negro rekodro.
Me ago un amigito, un chiko ruvyiko ruvyiko : Edouard Behar. Mos veo azyendo la kola par arresivir un bokaliko de leche ke las eskolas dan a las kriaturas chikas (la leche es rara i rasyonada).
Finalmente, para mi, las kozas no se pasan tan mal.
Mis paryentes me ambezaron una resitasyon, partikularmente edifikante :
« Fanfan se a byen ambezado su lisyon.
Kualo se va darle ? Un bonbon ? Una imajen ?
No, dize Fanfan : un beziko de mi madre sera mi rekonpensa ! »
No ay rimas, kale atorgarlo, ma a lo manko tyene sentido.
Todo va trokar kon la entrada en lo ke en mi rekodro pensava ser la « grande eskola », kijo dizir el kurso preparatoryo. Ma mis rekodros no apegan kon la kronolojiya. Devo toparme, en vedra, en el empesijo de oktovre 1941, no tengo dainda sinko anyos. Ma pasi de la eskola de las ijas a la eskola de los ijos. Eslapada la meskla. Ke orror ! La maestra me parese ser una negrinyada espantavle, ke aharva a las kriaturas kon su rigla ; me terroriza, tengo un espanto atroche de esta mujer ; mi padre me trae la demanyana a la eskola, komo un buey a la salana. Yo me kedo asentado al fondo de la klasa, mas o menos eskondido, desinando vapores o avyones sovre mi tabelika, djugando i partyendo palavra sin eskuchar ni un byervo de lo ke puede dizir esta negrinyada… Me ambezi un muevo djugo : eskupas sovre la tabelika, i despues azes figuras kon la eskupitina en meneando la tabelika kon tino i kapachedad.
En la eskola, mos ambezan de kantar « Una flor al chapeo » :
Una flor al chapeo, a la boka una kantika,
Un korason alegre i sinseeeero,
I esto es todo lo ke es menester a mozotros buenos mansevos,
Para ir al kavo de la tyeeeeerra.
Ama mis amigitos me ambezan un trokamyento :
Una flor al chapeo, a la boka un vyejo kusur de sigaro,
Un korason alegre i sinseeeero,
I esto es todo lo ke es menester a mozotros buenos mansevos,
Para ir a dizir medra à Hikleeeer.
Sin muy byen saaver kyen es este Hikler del kual oygo muncho avlar, nunka por byen, prefyero, en jeneral, kantar la versyon trokada.
No so un buen elevo, ama mi Mama ya me ambezo de meldar desde la edad de tres anyos (enfin… es eya ke lo dize; yo me akodro solo ke mis paryentes me aziyan lavorar la meldadura sovre un silabaryo yamado « En riyendo ») i me puedo permeter de azer el tembel sin ke ayga grandes konsekuensas.
Lo ke me desplaze tambyen, es ke no so vestido komo los otros. Los otros son todos vestidos kaji de la misma manera : la bareta, la pelerina (blu marina), las kaloshes. Yo tengo palto i kalsados. Mi suenyo seriya de tener pelerina i kaloshes, komo los otros.
I la gerra, en esto todo? Para mi, aze muy naturalmente parte entera de mi vida, syendo ke para mi es el estado normal, kaji no me akodro de tener konosido otra koza, yo era demaziya chiko antes de la gerra para guadrar rekodros presizos. Las restriksyones, el tapa-fuego, el black-out, las alarmas, esto todo es la norma.
El pan es preto, ma no guadro dingun rekodro del pan blanko. La leche, la manteka, los uevos son komidas presyozas. Tenemos kartas de alimentasyon i todo se merka kon tiketes de rasyonamyento, salvo lo ke se puede alkansar de merkar al merkado preto. No tengo el rekodro de tener sufrido de la ambre, ni de tener sido ovligado de komer topinambur o rutabaga, de los kuales oygo avlar ma ke nunka tuve de komer. Lo ke se yama chikolata es en vedra pasta de asukar emburujada por una delgada tela maron kontenyendo puede ser unas kuantas trasas de kakao. Yo me tresalgo por esto.
El tapa fuego no me interesa tanto, syendo ke de toda manera no tengo ni la edad ni la gana de salir de noche.
El black out, si por siguro. La noche es preta, i si por aventura sales de noche, tyenes menester de una lampa de aldikera para ver, syendo ke todas las luzes son amatadas. Dinguna luz deve salir de las kazas, esto se yama la « defensa pasiva » : se deve de meter sovre toda ventana un perde godro blu marina ke la rende enteramente eskura de afuera, mismo kon la luz asendida.
Esto todo, por siguro, es ordenado por espanto de los bombardamyentos ; no kale ser visto por los avyones. En vedra, Paris, okupado por los Almanes, no arrizika de ser bombardado por eyos. I kuanto a los Inglezes, atakan solo instalasyones stratejikas, no tyenen dinguna razon de bombardar el sentro ande ay solo moradas. I de fakto, afillu si la sirena sona a kada vez ke un bolo es anunsyado arriva de mozotros i si kale en este kavzo abashar en los abrigos, dinguno se espanta en vedra, porke es solo un bolo sin bombardamyento. Kedamos asentados en la kava, i asperamos. Es enfasyozo. Ma nada mas…
En vedra, es otra koza ke me espanta muncho mas : kyero avlar de los lovos.
No tuve syempre espanto de los lovos. Kuando uno mora en un apartamento de ocho kamaretas i ke tyene kuatro o sinko anyos, es komo una sivdad kon kayes. El numero (agora se dize las tualetas) se topava al otro bodre del apartamento, i ir aya reprezentava una ekspedisyon leshana, ke yo aziya sin dingun myedo : no me espantava de nada, ke sea diya o noche, klaro o eskuro.
Si, ama na : Lucien, dicho Lulu, mi primo ermano, ke tyene sesh anyos kuando yo tengo solo kuatro, me ambeza ke ay lovos. Yo, los lovos, nunka tengo visto, ma yene los konosko por la la konseja del chiko chapeo korolado. I ya se ke se komen a las chikas kriaturas, ma los pensava pedridos en las sharras. Halbuki no es lo ke me dize Lulu : los ay tambyen en los apartamentos, i kale azer muncho dikat. Esta vez, esto troka todo !
No mas kuestyon de ir soliko al numero, kale ke Mama me akompanye, tenyendome por la mano, i ke me aspere para akompanyarme a la buelta.
Por siguro, eya aprova de trankilizarme, me dize ke lo ke tomo por lovos, es solo mi solombra,ke lovos no ay en los apartamentos, ke mismo en las sharras de Fransya no ay mas desde muncho tyenpo. Yo…tengo muncho espanto.
A kontinuar…
Edmond Cohen
Paris, Fransya
Fuente: LK/eSefarad
