eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
33. En Lamalou-les-Bains
Una vez en Lamalou, somos akojidos komo reskapados, lo ke somos zaten. La vida kontinua komo puede. Empesamos por morar en el otel Pascal, ande moran djudyos mas o menos sorreteros komo mozotros (el doktor Astruc i su mujer, el senyor Lajeunesse i su mujer) ma tambyen kuristos ordinaryos. Una senyora Dubus se aze amiga kon mi, i komo lucho sin sukseso kontra las moshkas, fraguamos en djuntos un proyekto de DCA kontra las moshkas, ke me propoza de yamar DCM.
Poko tyempo despues puedemos instalarmos en la kaza del ayudante del mayor (el ke se teniya salido del sinema para embiyarmos un taksi), mozós a la sigunda tabaka, la otra famiya a la primera, lo mismo komo estavamos en el chalet Georges, en Megève. No se puede dizir ke seamos eskondidos. Mis paryentes tyenen sus karta de identidad (vedre en akordeon para los ajenos) al nombre de Cohen, kon, en godros karakteres kolorados, el byervo « JUIF » (djudyo). No se deke, este kazal banal es okupado por muy munchos askeres almanes. Defilan en las kayes de Lamalou, el tufenk al ombro, la bayoneta a la vita, syempre kantado kantes militares (no me akodro mas ke « heili heilo, heila ! » ke yo puedriya dainda kantar… ma ke menester ?) ; i dainda guadro en mis narizes la golor de kuero de las uniformas de los zabites. Deviyan ser sus botines ke goliyan tan fuerte… Ma estos militares no se okupan de los djudyos, i estamos al kavo bastante kyetos, salvo ke – ma de esto no me do kuenta – mi padre, no puedyendo lavorar, ve sus paras dirritirse komo inyeve al sol.
Mos afita tambyen, i finalmente bastante akorruto, de irmos al sinema. En primero las aktualidades, ke propozan imajenes sovre todo almanas, ma en lingua franseza. Son solo imajenes de kombates ande, por siguro, los haberes son syempre buenos – para los Almanes kale entender. A un momento, ay sovre un fondo preto un bruido de mitrayada, kon relampagos fulgurantes ; es el anunsyo del kapitolo : Frente del Este ! Es mi kapitolo preferido. Esta vez, no es koza de shaka : imajenes de kombates en medyo del invyerno (1943-1944), la inyeve kaye kon furya sovre los askeres en lucha… A mi me agrada muncho.
I despues el filmo. Sea un filmo franses : Les visiteurs du soir (los musafires de la noche) kon Jules Berry en el rolo de Satan, en birra de konstatar ke el korason de los amantes estatufyados kontinua de batir… L’éternel retour (el eternal ritorno), kon Jean Marais, de una ermozura kaji irrela, i Madeleine Sologne, kon los largos kaveyos blondos, sin olvidar el nano Piéral. Sea un filmo alman : un filmo de gerra, ande el bravo asker de la Wehrmacht se va kombatir a los Soviets, o un filmo komiko kon un aktor regolar del kual yene no puedo mas dar el nombre (Heinz Rühmann, puede ser). El komiko alman…El manko total de umor de los Almanes syempre me vino konsternante, i puede ser da a entender malorozamente munchas kozas.
Despues de estos todos trokamyentos de eskola i estas largas vakansas, vyene en oktovre 1943 el momento de empesar una mueva eskola, mi tresera ; en un anyo tuve el tyempo de estar ande mi kaza rue Saint-Lazare, despues ande mi tiya Mina, despues ande Madame Sauty, despues en Megève en el Chalet Gerges, despues en el otel Pascal en Lamalou, despues ande el senyor Hugounenq i su mujer. Tuve una primera klasa bastante shasheada. Ama entrar en la sigunda klasa en la eskola de Lamalou me agrada, porke a la diferensya de Paris, ijikos i ijikas son en djuntos, i esto me plaze. I kon los ijikos, me ambezo de djugar a las sarates durante la rekreasyon, i komo no djugo tanto mal, me meto a ganar ermozas sarates de todas kolores.
Malgrado el invyerno, lo mas del tyempo es muy ermozo, i mismo bastante kayente. Mos vamos a pasear, mis paryentes kon mi, kaminando en los alderedores de Lamalou, los kyöyizikos al lado, Bardejean, Villecelle… Akojemos kastanyas, mansanas… Me akodro tambyen de un monton de kastanyas, ma estas son para los puerkos. No sufrimos tanto de la ambre. Nada ke se pueda komparar kon los apretamyentos de Paris.
A kontinuar…
Edmond Cohen
Paris, Fransya
Fuente: eSefarad
