eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
32. Viyaje de Megève a Lamalou
El viyaje en treno de Megève (ande no ay treno) a Lamalou, ande no ay treno tampoko, es una haliz odisea ; por empesar kale fuir de Megève mas o menos a eskondidas, sin travar demaziya la atensyon. La estasyon de treno la mas serka es Sallanches, ama para ir verso el sur kale azer un grande desviyo. Albert pensa ke mas konvyene de irse de Albertville, lo ke ovliga de abashar kon taksi por Flumet i el Val d’Arly. Betty gomita tripa i varsakes, ma esto es medyo mal. Mos vamos en treno asta Valence, ama aya kale kedarmos noche entera en la sala de asperar de la estasyon, mis paryenyes muertos de sar de ser aferrados por la polisiya. Yo no me do kuenta, solo topo yuch i sin kavo de aprovar de durmir asentado noche entera…
Ma a la demanyana ya puedemos irmos ; viyajamos kaji todo el diya, i kuando el viyaje ya se esta eskapando, syendo ke ya abashimos en la estasyon de Bedarieux, a mueve kilometros de Lamalou, mi padre se apersive ke no puedemos salir de la estasyon, porke los Almanes kontrolan toda la djente salyendo de la estasyon ; mi padre aprova de azer salirmos por la lokanda de la estasyon, ma la ama no mo lo permite ; la sola manera de salir de la estasyon sin pasar por el kontrolo de los Almanes es de suvir en otro treno, i de fuirse por treno de la estasyon ; lo ke azemos ; suvimos en un treniko de kampanya, komo aviya en estos tyempos, asperando ke se vayga ; i no se va ; aze kalor, es el enverano en el sur. Yo veo el espanto de mi padre i mi madre, muertos de sar, sin entender muy byen deke. En fakto, se espantan ke los Almanes suvan en el treno para azer sus kontrolo, i ke la tadransa sea djustamente porke el treno los esta asperando. A la fin, despues de tres kuartos de ora de tadransa sin eksplikasyon, enfin el treno se va, i al primer apozo, en medyo de los kampos de vinya, Albert dechida de aprovechar este apozo sin Almanes para abashar sin saver ande estamos, poko importa. Kaminamos detras de kazalinos en medyo de los kampos, en la noche, ke en esto todo ya se kayo. Yo empeso de espantarme haliz, i de demandar, en primero a mi, despues a mi Mama, ande mos vamos a durmir esta noche ; este paseo en medyo de kampos deskonosidos en medyo de la noche – los kazalinos kaminan delantre de mozotros kon lamparas de aldikera, i mozotros detras komo en los sinemas de al tyempo – este paseo no me kuadra del todo… Por siguro mi Mama de da komo argumento ke tenemos el mazal de tener aventuras komo Mickey Mouse, ama le respondo yorando ke no kyero mas aventuras, afillu komo Mickey… Eskapamos por ayegar a un kazal, dainda oy no sé komo se yamava, i aya kualo azer ? No ay otel, i mismo si aviya uno es tan sekanozo de durmir en un otel ke mijor es de durmir eskondidos ; ama eskondidos ande ? La ora del tapa fuego ya kayo, ma por mazal ay un telefono, el solo de todo el kazal : es el del taksador, ke mi padre se va a espertar – es en kamiza de noche i harachin komo en el siglo 19 – para pueder telefonear en Lamalou i yamar a la kaza ande no mos asperan mas. Se van a bushkar el amo de kaza ke se fue al sinema, ke desha su filmo i mos embiya un taksi, el kual pasa en fuersa los parmaklikes de polisiya ; guadro dainda en memorya el chuflete de la polisiya myentres ke el taksi pasa el parmaklik en medyo de la noche i del tapa fuego…
A kontinuar…
Edmond Cohen
Paris, Fransya
Fuente: eSefarad
