eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
30. Ande Madam Sauty
Ama aboltaremos al enverano 1942. La situasyon de los Djudyos azyendose kadal diya mas sekanoza, mi tiya Mina, ande kyen moro, empesa a tomar haliz espanto, se da kuenta ke su nasyonalidad turka no vale muncho komo proteksyon, sovre todo para mozotros las kriaturas, ke semos fransezes. Mos toma, mi primika i yo, mos alesha de ande eya i mos fiya ande una kristyana – bendicha sea su memorya, se yamava Madam Sauty – ke mos toma los dos ande eya.
La memorya es koza kuryoza. De muestro primer enkontro kon eya, guadro solo dos rekodros : el primero, es ke ay un pyano. No aviya pyano ande mi. El sigundo rekodro, es ke veo bolar una puliya (mite en fransez) i aprovo de aferrarla gritando « une pie ! une pie ! » (una urraka en espanyol). Yerro de vokabularyo ke englenea muncho las mujeres.
Maryse i yo yamamos Madam Sauty Mamie. Mos demandaron de yamarla ansina, i me do kuenta agora ke era para azermos pasar por sus inyetizikos.
En todo kavzo se mete a ambezarmos a los dos el pyano. Si agora sé djugar kon un dedo (en este tyempo lo saviya kon los diez) j’ai du bon tabac dans ma tabatière (tengo buen tutun en mi tabakera, do re mi do re, re mi fa fa mi mi) so ovligado de atorgar ke es grasyas a la okupasyon almana, lo ke amostra ke esta okupasyon no fue enteramente negativa.
Ande Madam Sauty, ize dos deskuvyertas interesantes de kozina, las krepas (bumuelos bretones) de una parte, i los fongos de otra parte.
Guadro de las krepas de Madam Sauty egzaktamente el mismo rekodro ke Remi, el eroe de « Sans Famille » (sin famiya) de Hector Malot, de las krepas de la madre Barberin. Un rekodro maraviyado. El ke kyere saver mas, kale ke melde este romanso ; de toda manera, no sera tyempo pedrido. Esto dicho, en esta epoka no teniya yo dingun rekodro literaryo, syendo ke no teniya dainda meldado dingun romanso (teniya solo sinko o sesh anyos) i ke mis solas eksperyensas literaryas se limitavan a « Mickey en el Far West » (una maraviya, ande Mickey, chevaleresque (kavayeresko) – es kon esta okazyon ke me ambezi este byervo – afrentava un bandido maskado) i, mas tadre, Zozo la ormiga (mas yuch de topar oy) ande me ambezi el byervo « absurde » (absurdo) ke reushi de uzar, djustamente en una letra a Madam Sauty (despues de la gerra). En kuanto al romanso, sera solo en agosto 1945, para mis primeras vakansas de despues de gerra, ke mi Mama me va traer « Pauvre Blaise » (povereto de Blaise) de la Kontesa de Segur, i esto sera, i de esto no estaré poko orguyozo, mi primer romanso. Istorya terrivle de una povereta de kriatura akuzada de no me akodro kuala kulpa por el haliz kulpavle, el arriva de todo sospecho, ke no era otra koza ke el ijo de su amo. Lo ke pude yorrar meldando esto, es poko dizirlo. Al kavo, vos trankilizo, el kulpavle se arrepyente despues en una sena muy morala i katolika, ma ay muncha sufriensa antes de ayegar a esto. Mis kompanyeros de vakansas me yamavan para ir a djugar kon eyos, i yo, los ojos kolorados kon las lagrimas, les respondiya kon orguyo desde mi balkon « no, no puedo, esto meldando un romanso… » Paresiyan impresyonados… era yene una konsolasyon.
Ama esto todo mos alesha de mi sigunda deskuvyerta kulinarya : los fongos. Kualos ? No sé, deviyan ser fongos de Paris. Se teniyan kedado demaziya sovre el fuego, i eran un poko kemados. De toda manera, kemados o no, era una angusya. Aborresko a los fongos tanto komo me tresalgo de las krepas, i entre 1942 i oy, no troki, ni sovre mi aborrisyon, ni sovre mi gozo.
Me akodro ke Madam Sauty eskuchava a Radyo Londres, porke komo aryana, teniya el derecho de guadrar su TSF (a la diferensya de los Djudyos, ovligados de ir a fiyarla al karakol. Aze poko tyempo, deskuvri en los papeles de mi padre el resivo del karakol ; mismo pensi irme para reklamar ke me den atras esta radyo, solo para ver la reaksyon…)
Se oiya muy mal por modo de los esforsos de los Almanes para atabafar i mesklar el sonido, ama yene reushiyamos de oir « Aki Londres, los Fransezes avlan a los Fransezes ; i por empesar, unos kuantos mesajes personales… » i entonses empesavan los mesajes para la Rezistansya ke mos davan muncha alegriya a mi primika i a mi, syendo ke eran komo por egzemplo « las safanoryas estan sovre el fuego, repetamos las safanoryas estan sovre el fuego… » i mozotros dos, ke por siguro no saviyamos nada de los dramas i del espanto ke se eskondiyan detras de estos mesajes, topavamos esto muy divertyendo ; i despues mos engleneavamos imajinando otros mesajes del mismo djiz.
Esta Madam Sauty teniya una muchacha ke veniya azer unas kuantas oras en kaza. Esta povereta de mujer, en estos tyempos de ambre i de mankansa, arrovava un poko de pan, pensando ke dinguno se dariya kuenta ; ma Madam Sauty, para ser sigura, aziya kon kuchiyo markas diskretas sovre el pan, lo ke le permityo de amezurar la chika parte de pan arrovado… Agora tenemos olvidado lo ke reprezentava el pan en estos tyempos, i komo kaliya luchar para komer… Oy todo lo ke echamos al esyerkol es una haliz verguensa.
Un diya, ande Madam Sauty, kaygo hazino i tengo de echarme a la kama. Me akodro ke Liliane Guelfand, una prima bastante leshana de la vanda de mi madre, vyene a vijitarme i me trae un djugo de papel de enkortar : el treniko despartamental.
Maryse, mi primika, a konservado de esta epoka un rekodro muncho mas presizo ke yo. Lo ke es siguro, i de esto me akodro, es ke fuerte de ser mas aedada de mi de ocho mezes, aziya de mi lo ke keriya. Eya era la grande, la ke saviya. Por egzemplo, saviya lo ke es un detektiv. Yo no. Entonses me dava a entender ke un detektiv es alguno ke beklea a los otros sin pareser. No se save ke es detektiv. No se save… ama Maryse, si. I en la kaye, me amostrava un pasante fulano : « Mira, este, por egzemplo, es un detektiv. » Yo, muy sorprendido : « Asi bivas tu ? » -« Si, i este tambyen ! » Maryse beyledeava a todos los detektives… Komo no ser en admirasyon ?
Unos 25 anyos mas tadre, verso la fin de los anyos 60, estó paseando Boulevard Saint-Germain kon un amigo malorozamente hazino de paranoïa, i las kozas empesan yene : « Estas vyendo a este ? Es un inspektor de polisiya enkargado de beklearme. I este tambyen, etc » La Istorya no se arrenova, ama, komo dizen, en vezes tartamudea…
A kontinuar…
Edmond Cohen
Paris, Fransya
Fuente: eSefarad
