El Kanton de Edmond: PASTOR ANDE LOS DJUSTOS Kapitolo 3 – Sultana Cohen i su asendensya por Edmond Cohen

Ver todos los artikolos de esta seksion

Saludes a todos
Edmond Cohen
Paris – Fransya

____________________________________________________________

3 Sultana Cohen i su asendensya

Mi papu se teniya kazado en 1896, a la edad de 25 anyos, kon mi vava Sultana Hayon, aedada de 26, dunke de una edad muy adelantada para la epoka (kyero dizir para el kazamyento) , i por demas de un anyo mas aedada de el. La razon de este kazamyento tadre para mi vava veniya puede ser de lo ke la pyel de su kara aviya sido amurchada por la virguelika, lo ke personalmente no pude konstatar syendo ke era vyeja mujer kuando la konosi,  i la amurchadura del tyempo teniya eskondido i remplasado la de la hazinura. Tengo de dizir, en vedra, ke sus fotos de kuando era mas manseva no amostravan del todo esta enfermedad, ma puede ser aviyan sido embelesidas por un artezano kapache…

Kuando se kazo, mi vava Sultana morava en una kaza en Halidjioglu (una male de Estambol); era ija de Raphaël Bohor Hayon, un ish bitiridji. Kualo es, un ish bitiridji ? Uno ke se okupa de echos, un konsejo juridiko.. La djente burladera, en Turkiya, en vez de dizir ish bitiridji, diziya por shaka ish batiridji, el ke batirea los echos ! No se si mi bispapu, este ish bitiridji, era batiridji, ma lo ke se de el, es ke era un ombre ke paresiya muy savyo porke yevava una larga barba blanka i ke kaminava la tripa adelantre komo un senator ; una sola maka teniya, es ke no saviya meldar ! Kyero dizir, meldar en turko. I me parese ke no deviya ser kolay de azer el ofisyo de ish bitiridji en Turkiya sin saver meldar el turko ! Mi bispapu se pasava la mano sovre la barba komo un grande savyo delantre los mushteris ke le prezentavan dokumentos, i les diziya : deshadme estos dokumentos, vo pensar a lo ke se puede azer ; despues, amostrava los dokumentos a sus ijos, los ermanos de mi vava, ke, eyos, saniyan meldar el turko, i ansina es ke pudo lavorar, mantener una kaza i una famiya de syete kriaturas. Se muryo en 1912, kuando Albert, su inyetiziko, ya teniya kinze anyos.

Kuando mi vava Sultana Hayon se kazo kon mi papu Nissim Cohen, se kedo kon el durante un anyo en la kaza de su padre, lo ke se yamava meza franka, una forma de dota : el yerno rizin kazado tenya el komer i el durmir kon su mujer durante el primer anyo del kazamyento en la kaza de su suegro.

Por esto es ke es en la kaza de su padre ke mi vava se topo prenyada de mi padre, ke nasyo en marso 1897 durante este mizmo anyo de meza franka en la kaza de mi bispapu, ish bitiridji.

A kontinuar…

Edmond Cohen
Paris, Fransya

Fuente: LK/eSefarad