eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
____________________________________________________________
LA GERRA DE INDEPENDENSYA DE ISRAEL (1)
Aze poko vos avli de lo ke se paso el diya del 14 de mayo 1948. Oy, kyero kedarme otrun poko sovre el renasimyento del Estado de Israel, esta vez kontandovos los akontesimyentos militares ke permityeron este renasimyento.
Para ayudarme, lavori sovre el livro de Jon i David Kimché La première guerre d’Israel 1948.
Komo ya lo savesh, en 1947, la Palestina esta de basho del mandato britaniko, i el govyerno inglez dirijido por los travayistos de Attlee i Bevin no permiten a los djudyos de entrar en Palestina. Los djudyos de Palestina, ke se yama el yishuv, organizan a eskondidas una aliya Beth, kijo dizir klandestina. Los djudyos del yishuv tyenen una organizasyon militar ke se yama la Hagana , kon un grupo de kombate ke se yama el Palmah (plugot mahats, troupes de choc). En 1947, el Palmach era 3.000 askeres,(2.000 ombres i 1.000 mujeres) Antes de la sigunda gerra mundyala, un famozo zabit inglez, Orde Wingate, les ambezo a kombatir, sovre todo de noche.
Al lado de la Hagana i del Palmach, ay tambyen dos grupos ekstremistos ke luchan kontra los Inglezes, el Irgun i el grupo Stern.
Ay una koza muy importante de dizir : los djudyos del Yishuv, afillu si eran muy separados politikamente, eran yene aunidos en una organisasyon , la Adjensiya djudiya, dirijida por un ombre de karakter, David Ben Gurion. Los solos ke no aziyan parte de la organizasyon eran el Irgun i el Stern. A la rovez, los arabos de Palestina no teniyan dinguna organizasyon, salvo el Mufti de Yerushalaïm, Hadj Amin El Husseini, ke se keriya kapo de los Arabos de Palestina.
Kuando las Nasyones Unidas salyeron un plano de espartisyon de la Palestina entre un estado djudyo i un estado arabo, la organizasyon djudiya acheto, Husseini disho no, i tambyen los estados arabos vizinos. El rey de Transjordaniya, Abdallah, keriya tomar para si la parte de los Arabos de Palestina, i no para Husseini.
El 29 de novyembre 1947, la Asamblea general de las Nasyones Unidas vota a la mayoriya de dos tyersos el plano de espartimyento entre dos estados : un estado djudyo, un estado arabo, i Yerushalaïm en una zona internasyonala.
Pishin empesa una gerra de los Arabos de Palestina kontra los djudyos, kuando dainda los inglezes estan en el pais, syendo ke el mandato se eskapara solo el 15 de mayo 1948 . Dainda kedan sinko mezes i medyo. Los inglezes no se fueron en un diya , ama a poko a poko.
En desyembre, los insidentes entre arabos i djudyos fueron limitados, ama en enero entro en Palestina, en los territorios arabos , ombres de la Armada de Liberasyon Araba, ke teniya por kapo el libanese Fawzi el Kaukaji. Del punto de vista ingles, eran por siguro « irregulares », i mismo illegales, ama a los Inglezes les vino una hazinura : kuando pasavan al lado de irregulares arabos, se aziyan syegos. Esta hazinura se sanava de si para si kuando topavan ombres de la Hagana kon armas.
Los ombres de la Hagana i del Palmach deviyan eskonderse de los Inglezes, i defenderse kontra los arabos. El kapo de la Hagana se yamava Israel Galili i el kapo del Palmah Igal Alon , un manseviko de 28 anyos ke, un anyo mas despues, kapo de la armada israelyana, va arrepushar los Egipsyanos asta el Sinaï…
A kada vez ke los arabos matan a un djudyo, los ombres de la Hagana responden i ansina empesa una geriya.
El 9 de janvier 1948, arabos irregulares (150 ombres a kada ves) atakan a los kibutsim de Dan i Kfar Szold, en el norte del Galil. Dan es un kibuts ke yo vijiti en 1955 i ande bivi un mes en 1967, puedo dizir ke lo konosko un poko. Vyenen los Inglezes i arrepushan a los arabos.
Dainda los Inglezes tyenen 50.000 ombres en Palestina.
Agora los arabos armados del norte, ke tyenen por kapos Kaukaji i Adib Shishekli, son 7.000.
En el sentro, 5.000 ombres ke tyenen por kapos dos partizanos del Mufti : Abd el Kader el Husseini i Hassam Salame (los dos van a morir matados en la gerra)
En el Negev, dos otros partizanes del Mufti : Tarik Bey el Afriki i Husni Minawi, ke komandan a 2.000 ombres.
En las sivdades ande biven djudyos i arabos al lado, komo Yerushalaïm o Haïfa, los arabos atakan a los djudyos kaji kadal diya.
El 14 de enero, los ombres de Abd el Kader el Husseini atakan el kibuts de Kfar Etsion, serka de Hevron, i son arrepushados kon el ayudo del Palmach i deshan 120 muertos.
El diya despues, los arabos se vengan en atakando 35 ombres de la Hagana, ke eran estudyantes de la Universita hebraïka, i los matan a todos. Puede ser konosej agora un kibuts ke se yama Netiv a Lamed He, en rekodro de estos 35.
El 16 de febrero 1948, 500 ombres de la ALA ataken al kibuts religyozo de Tirat Tsvi, al sur de Bet-Shean (ke ya aviya sido atakado en 1938, i los arabos aviyan sido arrepushados) Los djudyos, prevenidos por los servisyos de la Hagana, se defenden i yaman a los Inglezes para ayudo. Kuando yegan los Inglezes, ya se fueron los Arabos, deshando 60 muertos i 60 firidos. Los djudyos tuvyeron un muerto i dos firidos.
Los arabos se esfuersan tambyen de okupar i kortar los kaminos entre sivdades, por siguro para atabafar a los djudyos, i por egzemplo impedir a los djudyos de ayudar a Yerushalaïm. Los konvoyos son atakados.
Los djudyos no pueden atakar a los arabos porke la regla es ke dinguno kazal, dingun kibuts, deve ser tomado por los arabos. Kale kedarse i morir. Por esto los ombres de la Hagana i del Palmach son dispersados para la defensa de kada kibuts i no aunidos en una armada ofensiva.
De toda manera los djudyos no teniyan bastante armas. Aviya grupos de la Hagana ke teniyan un tufenk para tres ombres. Los kapos djudyos aviyan embiyado djudyos en Amerika i Canada i Tchekolslovakiya para merkar armas a eskondidas, ama no solo kaliya paras, kaliya tambyen topar manera de azer entrar las armas en Palestina sin ke los Inglezes las topen. Esto todo tomava muncho tyempo, i entremyentres las armas faltavan.
Lo mas yuch era la situasyon de Yerushalaïm. 100.000 djudyos eran enserrados por los arabos ke teniyan todas las alturas salvo el Monte Scopus, i impediyan a los konvoyos djudyos de komida, de bevyenda i de munisyones de ayudarlos. Kaliya pasar por un lugar muy estrecho yamado Bab el Oued, i aya los arabos asperavan a los desmazalados konvoyos i los atakavan.
Fin marso, el kamino de Yerushalaïm esta kortado.
Afillu ke dainda no tyenen armas, los kapos djudyos organizan una operasyon yamada « Nahshon » para salvar el kamino de Yerushalaïm. Ben Gourion da el orden a los djudyos ke estan en Tchecislovaquia para merkar armas de tomar un avyon DC4 i de azer vinir presto presto todo lo ke puede. El avyon de Prague yega dos diyas antes de la operasyon Nahshon.
Fuerte de sus muevas armas, el Palmach ataka el kazal arabo de Kastel el 31 de marso. Kastel esta arriva de un tepe (colline) a 800 metros , i kada kaza es una kalé (forteresse). Los djuyos toman, pyedren, toman de muevo, pyedren de muevo, i a la fin, despues de 6 diyas de una bataya sin piyadad el la kual el mijor de los kapos arabos, Abd el Kader el Husseini es matado, Kastel keda entre las manos de los djudyos.
Entremyentres el batayon Givati de la Hagana toma el kazal arabo de Deir Muheisin i el Palmah, despues de Kastel, toma Colonna, Liftah i Saris.
Grasyas a estas viktoryas, tres konvoyos , un solo aziya mas de 250 arabas, pueden pasar.
Malorozamente, los djudyos no tyenen bastante askeres para guadrar las pozisyones, i los arabos toman syertas, de tal manera ke kuando, el 20 avril, los djudyos embiyan un konvoyo de kaji 300 arabas, es de muevo atakado por los arabos i yega muy difisilmente a Yerushalaïm ke se topa de muevo aogada.
Entremyentres, al Norte, en la noche del 4 avril, los arabos de Kaukaji bombardan el kibuts de Mishmar aemek, kon sesh kanones. Los defensores tyenen solo una mitrayadora, i no bastante tufenkes para kada uno.
El 5 de avril, los djudyos embiyan ombres del Palmach en ayudo, i de su lado Kaukaji tambyen resive ayudo de ombres venidos de Jenin. I sovre esto, yega una armada ingleza ke no puede impedir la bataya, ama permite de salir las mujeres i kriaturas de Mishmar a Emek.
Kaukaji kontinua a bombardar diya i diya astal 14 de avril, en el kual los ombres del Palmach atakan por sorpreza a los ombres de Kaukaji i les toman tres kazales.
De la misma manera, los arabos atakan Ramat Yohanan, i no solo son arrepushados, ama los djudyos toman dos kazales arabos.
Entremyentres, a poko a poko, los Inglezes se van, i deshan sus pozisyones vaziyas, en aprovando de ayudar a los arabos para ke sean tomadas por eyos. La bataya entre djudyos i arabos es para kyen va ser el ke va resivir i guadrar la pozisyon ingleza.
Esto se izo para Haifa. Los arabos eran a basho, dirijidos por Mohamed El Hamt El haniti. La Hagana, dirijida por Moshe Carmel i Mordehai Makleff, era arriva, sovre el Carmel. Desde el empesijo, Haniti fue matado por los djudyos kuando aziya parte de un konvoyo traendo kinze tonas de armas i eksplozivos. Fue remplasado por Amin az addin, ke no teniya su valor.
El 20 de avril, a la ida de los Inglezes, empeso la bataya para el kontrolo de la sivdad. El 21, los arabos se apersiven ke su kapo se fuyo, dizyendo ke se hue yamar ayudo i ka ya va venir ! El General Stockwell, kapo de los Inglezes de Haïfa, se propozo para topar un akodro.
Los arabos refuzan de firmar un akodro kon los djudyos, i la mayor parte de los arabos se van de la sivdad, afillu si Stockwell i Shabetaï Levy, mayor de la sivdad, les rogan de kedarse en la sivdad.
En el Galil, las kozas eran muy yuch para los djudyos, porke los arabos eran muncho mas numerozos ke los djudyos, porke eran arriva sovre los tepes i los djudyos en basho, i porke los arabos kontrolavan munchos kaminos.
Igal Alon, kapo del Palmach, tyene menester de askeres, i los demanda alos kibutsim, ke tyenen tambyen menester ama ke entyenden ke kale atakar : es la operasyon yftah. En primero toma la kale de Rosh Pina kuando los Inglezes se van. Agora puede atakar a Safed ande los djudyos son enserrados por muncho mas arabos komandados por Adib Shishakli i ke tyenen las pozisyones militares deshadas por los Inglezes.
El primo de mayo, los djudyos atakan i son arrepushados. Entremyentres Alon se ambeza ke Ramot Naphtali, un kibuts ke es una pozisyon muy importante para la defensa del Galil, esta atakada kon tankes por los arabos i demanda ayudo. En vez de embiyar ayudo, Alon les dize ke va azer travar sovre kualkyer djudyo ke aprovariya de fuyirse de Ramot Naphtali. I los djudyos rezistyeron, i arrepusheron a los arabos.
El 2 de mayo, los arabos atakan yene, i yene son arrepushados.
El 10 de mayo, son esta vez los ombres del Palmach ke atakan de muevo a los arabos de Safed, i esta vez, despues de una bataya sin piyadad, los kapos arabos se fuyen, i toda la povlasyon araba kon eyos : los djudyos son maestros de Safed.
De la misma manera, las fuersas de la Hagana ke an tomado a Haïfa atakan a Ako. El 14 de mayo, diya de la Independensya, toman a la kalé, il el 17 la sivdad kaye. Entretyempo, Israel egziste komo Estado, ama estamos vyendo ke la gerra, eya aviya empesado antes i se kontinua despues, salvo ke se va kontinuar kon muncha mas djente, porke van a venir las armadas regulares de todos los estados arabos vizinos.
Yafo tambyen, atakada por el Irgun i la Hagana venida en ayudo del Irgun, kaye el 12 de mayo.
Kuando Ben Guryon, el 14 de mayo, melda en el Muzeo de Tel Aviv la deklarasyon de Independensya ke vos trasladi aze poko, los djudyos son maestros de todas las sivdades ke se topan en la zona djudiya del plano de espartisyon.
Ama keda Yerushalaïm, ke no esta en el plano de espartisyon, i ke los djudyos, komo los arabos, kyeren para si.
En kuanto a los 4 kibutsim del Gush Etsion, isolados en la zona araba del plano de espartisyon, serka de Hebron, fueron atakados por lo arabos el 11 de mayo 1948, i despues de una rezistansya dezesperada, kuando el 12 los djudyos no tuvyeron mas munisyones, los arabos entraron i mataron a todos. De los 500 del Kibuts Kfar Etsion, solo kedaron bivos tres ombres i una mujerika.
Se avla del masakro de Deir Yasin, no se avla tanto del masakro de Kfar Etsion.
Ama si Ben Gourion, Yadin i Galili no durmyeron la noche del 14 al 15 de mayo 1948, es tambyen i sovre todo porke nada esta djugado: dainda no atakaron las armadas regulares de Ayifto, de Irak, de Syria i de Transjordaniya.
Vos avlare de esta gerra de la armada del Estado de Israel kontra las armadas de los Estados arabos la semana proksima, si kyere el Dyo.
Edmond Cohen
Paris, Fransya
Fuente: LK/eSefarad
