Keridos amigos,
Ay un kuanto tyempo, trasladi una fabula muy konosida de Jean de La Fontaine, ke travo, komo munchas otras, del grego Esope, i no ay en la Fransya entera, una kriatura ke no se la tenga ambezado en la eskola. Kyero avlar de Le corbeau et le renard (el kuervo i la rapoza). Mi inyetizika se la ambezo, komo todas las kriaturas de Fransya de su edad, en su eskola, i fue muy enkantada ke tan su vava komo su papu ya konosiyamos esta fabula, i mos demando si mos teniyamos ido, mozotros tambyen, en su eskola…
Para los ke no konosen esta fabula, la toparesh indovos sovre https://poesie.webnet.fr/lesgrandsclassiques/Poemes/jean_de_la_fontaine/le_corbeau_et_le_renard
En esta fabula, la rapoza enganya al kuervo, ama en vedra el kuervo es muy ramay, i ayer a la noche, miri a la televizyon un dokumentaryo sovre los animales de Fransya, i entre otras kozas, kualo amostraron? Una rapoza aferro i mato a un raton, i se apareja para komerlo, ama dos kuervos la vyeron. Uno de los dos kuervos se aserka de la rapoza, i aze komo si era ferido, kaminando a poko a poko. Un kuervo es muncho mas de komer ke un chiko raton, i la rapoza desha el raton para korrer detras del kuervo sozde ferido, ke korre mas i mas, i kuando la rapoza se alesho bastante de su raton, vyene el otro kuervo, ke asperava esto, i aferra el raton, myentres ke el primer kuervo se bola, i los dos kuervos se esparten el raton! La rapoza de la fabula enganyada por dos kuervos… ke, asigun mi, deviyan yamarse Heckle i Jeckle (esto para los konosedores de sinema).
Saludes a todos
Edmond Cohen
Paris – Fransya
____________________________________________________________
Ver todos los artikolos >>
EL KUERVO I LA RAPOZA
Chilibi kuervo, sovre un arvolé suvido,
Teniya en su piko un kezo.
Chilibi rapoza, por la golor sombayida,
Le tuvo mas o menos esta avla
« Eh, buenos diyas , Sinyor del Kuervo,
Kuanto luzyo es !
Kuanto ermozo me parese !
Sin mintira, Si su kante
Es tal i komo su vestimyenta,
Es el fenix de los moradores de esta sharra ! »
Oyendo esto, el kuervo se tresale de alegriya ;
I para amostrar su ermoza boz,
Avre un ancho piko,
Desha kaer su trezoro.
La rapoza lo aferra i dize :
« Ambeze ke todo alavador trava avante del ke lo eskucha.
La lisyon vale un kezo, por siguro ».
El kuervo, averguensado i desmamparado,
Djuro, ma un poko tadre, ke no lo van mas a enganyar.
Edmond Cohen
Paris, Fransya
Fuente: LK/eSefarad
eSefarad Noticias del Mundo Sefaradi
gracias por ha hermosa fabula