Muestra lingua por Edmond Cohen: AL TYEMPO I AGORA

Keridos amigos

Dos artikolos del haham Daniel Farhi sovre sus rekodros de chikez me dyeron la gana de azer lo mismo para mi emisyon del djueves ke vyene.

Saludes a todos

Edmond Cohen
Paris – Fransya

——————————————————————————————

AL TYEMPO I AGORA

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes 19 de fevrero, a las dos i medya, en el Centre Communautaire. Estos atelyes son avyertos a todos, venid munchos.

Vos akodro tambyen ke agora las emisyones de Radio J se pueden oir por internet sovre el sityo de Radio J, sea en direkto, à las 4 h 06 ora de Paris, o kuando se kyere, en klikando sovre las emisyones del djueves despues de mediudiya.

http://radioj.fr/node/55

Estos tyempos, el haham Daniel Farhi, ke eskrive (en franses) una letra kada semana i ke la embiya por email a sus amigos ma tambyen la publika sovre su sityo ke kualkyer ke kyere puede ir a meldar,

http://www.rabbin-daniel-farhi.com/

mos konta estas semanas sus rekodros de chikez intitolados De mon temps (en mi tyempo). A mi me plazen muncho, puede ser porke me yevan al tyempo de mi chikez o de mi chika mansevez, i me akodran kozas ke syerto no me teniya olvidado, ama yene ke, vamos a dizir, teniya deshados en un rinkon poko frekuentado de mi memorya…

El haham Farhi nasyo serka de al kavo de novyembre 1941, yo al empesijo de desyembre 1936, lo ke kyere dizir ke so mas o menos sinko anyos mas aedado de el. Sinko anyos, kualo es ? Muy poko agora, ma si pensamos ke uno empesa de darse kuenta, sino de todo entender, de lo ke se pasa alderedor de el verso los kuatro anyos, esto kyere dizir ke mis primeros rekodros empesan en 1941, en medyo de la gerra, i los suyos en 1946, despues de la gerra. I estos sinko anyos de diferensya entre mozotros dos fueron bastante…okupados, si puedo dizir.

Esto para dizirvos ke muestros rekodros de chikez, afillu si tenemos poka diferensya de edad, son yene diferentes komo lo pueden ser la gerra (i ke gerra) i la paz.

Ama afillu esta diferensya, munchos de sus rekodros korresponden tanto kon los miyos ke, meldandolos, me topi yevado en mi propya chikez komo si eran mis propyos rekodros ke kontava el haham. Por egzemplo, la entezador de los invyernos de al tyempo. « Malgrado el pasamontanya (karatula kontra el friyo) trikotado por Mama, mis orejas me paresiyan trokadas en pedasos de vidro serka de romperse. Mis manos eran chatladeadas… », mos konta el haham, komo si avlava de mi. Yo me akodro de mis guantes de lana, tambyen trikotados por mi mama, i burakados a kada kavo, i de mis poveretos de dedikos sangryentos i yelados komo buz. Es vedra ke los invyernos de al tyempo eran terrivles, indimas ke no teniyamos kimur, ke la kamareta de echar, kual ke sea el frio, nunka era kaentada, i ke la kama era tan entezada ke no era posivle de echarse sin aprovar de arrekaentar un poko las savanas kon una boteya de agua kayente. Ya konti en mi livro Berger parmi les Justes komo mi mama aziya kaentar agua sovre la kozinera de gaz, despues inchiya una boteya, i una vez sovre dos la boteya, ke era entezada, se patladeava de la kalor, i komo yo , no se deke, no puediya soportar ke la boteya se rompa, i me metiya a yorrar chorros de lagrimas, demandando a mi mama deke teniya rompido el bokal, i nada de lo ke me respondiya puediya konsolarme…

Esto era el invyerno. Ama el haham mos konta despues sus rekodros del enverano en el tyempo ande no teniyamos refrijeradores. Puede ser egzistiyan en Amerika, ama aki en Fransya no aviya. Yene el chiko Daniel Farhi se iva a merkar panes de buz para guadrar la komida. Mozotros ni teniyamos buz, sea ke no se vendiya serka de mozotros, sea ke no teniyamos lugar para guadrarla, sea los dos. La leche, kuando aviya leche, lo ke era solo para las kriaturas i no kadal diya, kaliya ke salga el buen numero, esta leche tan presioza no turava kon estas kalores i se « tornava », komo se diziya, azyendose agua i krema. Mi madre echava la agua i aziya korrer la krema en una rida asta azerla kezo, ke despues me dava a komer kon asukar en polvo (lo ke, tengo de dizirlo, me agradava muncho !) La manteka, ke se merkava, komo lo konta el haham, ande la suchiya ke la kortava kon un ilo de fyerro, se aziya, de la kalor, tan blanda ke se metiya en una basinika de agua, i la manteka se kedava flotando ansina sovre la agua, asta ke se aharyentava i no se puediya mas komer.

Yo ya era manseviko kuando vinyeron los primeros refrijeradores. Eran bastante karos, i mozotros no teniyamos, ama primos de mi padre se merkaron antes de mozotros, i mos kombidavan para komer dundurmas echas en kaza…

Estos primos, mas rikos ke mozotros, fueron los primeros a merkarse araba o televizyon. La televizyon, la veiamos por las vitrinas de los merkaderes de radyo. Ansina fue ke miri en djunyo 1953 el koronamyento de la reyna de Ingletyerra. No era yo el solo de mirar ansina. Meldi agora sovre Wikipedia ke solo 1% de los fransezes teniyan en este tyempo una televizyon en kaza. Fui uno de los 99% bolados por ver este koronamyento, indimas ke era la primera vez ke la televizyon veniya de un pais ajeno.

I komo araba no teniyamos tampoko, mos ivamos muncho a pye…

Despues el haham mos konta lo ke era la vida de la kapidjiya, i komo la suya salvo a su madre, yamandola Mme Dupont kuando estava dainda en basho de la kaza i la polisiya arriva para aferrar a su marido, el padre del haham. Esto tambyen me izo akodrar a la muestra de kapidjiya ke eya tambyen akavido a mi tiyo ayegando kuando los Almanes estavan arriva…i mi tiyo se kedo eskondido ande la kapidjiya asta ke se vaygan los Almanes…

Se akodra tambyen el haham de la alegriya de verse en famiya, afillu si kaliya kaminar kilometros a pie o kon metro para toparse en djuntos. I agora ? Agora tambyen lo azemos, ama esta vez es porke kon la vejez no lavoramos, i tenemos mas tyempo ke teniyamos kuando kaliya ir a la eskola o lavorar en kaza.

Lavorar en kaza…Dishe ke kimur no teniyamos, afillu despues de la gerra. Ama no es ke elektrik teniyamos tanto…Pishin kuando veniya la eskuridad, kijo dizir kuando todos en djuntos keriyan la luz del elektrik, la luz era kortada porke no aviya bastante. I yo lavorava en kaza sea kon kandela, sea, lo ke era mijor, kon lampara de gazolina.

I la radyo ? Durante la gerra no teniyamos, syendo ke los djudyos tuvyeron al empesijo de la okupasyon la ovligasyon de dar sus makinas a la polisiya, lo ke izimos. Ama despues de la gerra, mi padre merko una makina mueva, ke kaminava komo puediya, kuando teniyamos elektrik…Despues tuvimos elektrik diya entero, i una vez mansevo yo me merki una makina, ensima de la de la famiya, para mi solo, en mi kamareta, para oir mi kerido jazz New Orleans. Louis Armstrong se muryo en 1971, ya aze mas de 47 anyos, i dainda no me konsoli de su muerte…

Esta semana, el haham Farhi mos konto sus paseos, yo diriya sus dolashes, kon su padre i su ermanika en los varyos lugares vedres alderedor de su kaza. I meldando sus rekodros, me di kuenta ke yo, por mi parte, ijo regalado, no tengo kaji dingun rekodro de tener paseado kon mi padre : el lavorava toda la semana, i yo tambyen a la eskola, salvo el djueves. El djueves, era mi madre ke me yevava, a pye, a la uerta de los Tuileries, o, lo ke me agradava muncho mas, al sinema. Aviya en Paris unos kuantos sinemas, uno en la avenida de la Opera, uno en la kaye Royale, ke oy no egzisten mas (ke pekado) ke djugavan solo filmos para kriaturas. Aviya tambyen, kaye Caumartin, un sinema yamado Cinerire, ke djugava solo filmos de reir. A mi, mi plazer era ke mi madre me yeve en uno de estos sinemas. En vezes, teniya de travarla un poko, ma en jeneral no rezistiya muncho.

El shabath, mos kedavamos en kaza para arresivir la vijita de mi tiyo, de su mujer i de mis dos primikos. Digo primikos, ama en vedra eran mas aedados de mi, el uno de 2 anyos, i el otro de sinko. Ama yene los asperava toda la semana, para djugar kon eyos, sovre todo kon el mas chiko. I kuando veniya el shabath, ke plazer de verlos enfin !

Keda el alhad. El alhad, en jeneral, mos ivamos en famiya, mi padre, mi madre, mi vava, i yo, al sinema. Kaliya ke sea a la vez un filmo ke pueda sido visto por una kriatura, lo ke era en jeneral bastante kolay porke los filmos de al tyempo eran muy pudikos (sovre todo los amerikanos) i, esto era mas yuch, ke puedan tambyen ser vistos por mi vava sodra, ke, la povereta, syendo ke no entendiya lo ke se diziya, se interesava solo a los ermozos fostanes i kozas de ver. Yo en vezes entendiya el filmo i me agradava, en vezes no entendiya i me enfasyava. I en vezes, teniya espanto i me metiya la kavesa en el chapeo de mi padre ke teniya sovre los dizes.

I despues, todos en djuntos, mos ivamos al Café de la Paix, plasa de la Opera, i a mi me davan una grenadina. Tanto ke beviya mi grenadina, todo era por byen, ama despues ke enfasyo…

El haham Farhi konta despues sus rekodros de las golores de buenas komidas, i entre estas golores, la del pan fresko ke se iva a merkar andel ekmekchi (el panadero). Asigun el haham, el pan de al tyempo era lo mismo ke agora kosta mas karo i ke se yama oy « tradisyon ». No se. Lo ke yo me akodro, es ke durante la gerra entera, asperavamos el pan blanko komo antes, i no este pan preto ke solo puediya merkarse, i kon tiketes. Yo, desde este tyempo, kyero solo komer pan blanko. Ke menester ke la gerra sea ganada si es para yene komer pan preto ?

Tantas kozas an trokado desde mi chikez, ama a poko a poko, ke no me dava kuenta de la mar ke aparta los dos tyempos, el de mi chikez i el de agora. Syerto ya me teniya aboltado a estos tyempos para eskrivir mi livro, ama meldando los rekodros del haham Farhi, vide mas klaro las asemejansas i las diferensyas entre muestros dos rekodros, a el i a mi.

Ama una koza es sigura : yo no so i no seré nunka el ke dize ke todo era mijor antes, i esto por munchas razones :

La primera de todas, por siguro, es ke en 1942, biviyamos en la orror de ver los otros aferrados i yevados en este maldicho kampo de Drancy i despues no se saviya ande, i en el espanto de kada momento de ser aferrados mozotros tambyen. Yo, chikitiko, no entendiya byen todo lo ke se pasava, ama yene ya me dava muy byen kuenta ke no mos topavamos en buenos tyempos. Agora, todo no va por lo mijor, ay terroristos ke pensan una sola koza, matar a djudyos, ama agora la polisiya aprova de protejarmos. Antes era esta misma polisiya ke aprovava de aferrarmos para darmos a los Almanes ke no mos keriyan byen. Si, oy es mijor.

Oy, por la primera vez desde mas de 1.800 anyos, el puevlo djudyo tyene un pais kada anyo mas fuerte ke se yama Israel, i ke tyene una bandyera i una armada ke amostro a los ke keriyan mal a los djudyos ke agora les kosta muy karo. Si, oy es mijor.

Oy las kozas son tan kolay : asender o amatar la luz, suvir las eskaleras kon asensör, konoser los haberes en mismo tyempo ke se pasan, i ver de su fotolyo en Paris i en direkto Neil Armstrong kaminando sovre la luna i avlando por telefono kon el prezidente de los Estados Unidos en Washington. Pueder eskrivir sovre internet en djudeo-espanyol kon el mundo entero, si, oy es mijor.

I ke dizir de las melezinas muevas ke kadal diya salvan vidas. En 60 anyos, la esperansa de vida en Fransya pujo de 14 anyos. I si tomamos unos tyempos no tan leshos, en la sigunda parte del siglo 19, no se konosiya la anesteziya, i a parte kortar una pacha en tyempo de gerra, kon ke dolor, no se puediya azer una operasyon i la djente se moriya de una apendisitis, kon dolores terrivles. Si, oy es mijor.

Oy, grasyas al refrijerador, bevo agua freska i komo manteka dura, viyajo en freskor en la araba o en el treno mismo en enverano. Grasyas al telefono de aldikera, no me espanto mas de no tener haberes de los miyos. Ande ke sean, me apasiguan por telefono. Si me demando kyen eskrivyo tal kantika o pronunsyo tal dicha i kuando, kualo se paso en tal lugar i tal tyempo, vo sovre internet i topo pishin lo ke bushko. Embiyo fotografiyas ande kyero, ets. Si, oy es mijor.

Agora me vo en kuatro oras en Israel kon el avyon i en dos oras a Lyon kon el treno, sin atabafarme del umo en los tuneles.

Ya lo se muy byen ke esto todo no es la felisidad. Uvo djente oroza ay 70 anyos, i oy ay djente en la afrisyon, i poko le troka a esta djente en afrisyon ke un ombre kamino sovre la luna o ke la manteka keda dura en enverano. Ya savemos todos ke los progresos teknikos no azen todos la felisidad. Todos no, ma en el dominyo de la medikeriya, si. Si uno puede guadrar bivo su kriatura o su mujer grasyas a los progresos de la medikeriya, va ser mas orozo ke al tyempo si los uvyera pedrido.

I penso tambyen ke si, al lugar de ir komo al tyempo arrodiyarse al lavador para fregar su chamashir suzyo, a una mujer le abasta agora de echarlo en su makina de lavar, eya va ser sino mas oroza ke al tyempo, a lo manko mas repozada…

Enfin, no penso ke la djente desmazalada agora no lo uvyera sido tambyen al tyempo. La teknika no aze mas orozo, ma no manko !

Esto dicho, ya vino la ora de eskapar esta emisyon, akodrandovos esta dicha de Ben Zona en el Pirke Avot (IV, 1) : Es riko, el ke se alegra de su parte (de lo ke tyene).

Al djueves ke vyene, si kyere el Dyo !

Edmond Cohen
Paris, Fransya