eSefarad Noticias del Mundo Sefaradi
Keridos amigos,
Mi emisyon de radyo de este djueves (programa del 30 de novembre 2017)va ser sovre la komedyante Sarah Bernhardt, famoza komo lo fue, 20 anyos antes de eya, la komedyante Rachel, sovre la kuala ya ize una emisyon el 7 de oktovre 2010
Saludos a todos
Edmond Cohen Paris Fransya
——————————————————————————————
SARAH BERNHARDT
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet sea en direkto, sea kuando se kyere, kale klikar en el sityo de Radio J, i irse sovre las emisyones de despues de medyudiya. http://www.radioj.fr/node/55
De otra parte, tengo de anunsyarvos ke el proksimo atelye de konversasyon de Vidas Largas se va tener el martes ke vyene 5 de desyemre, en el Centre Communautaire, a las dos i medya (asta las kuatro i medya – sinko). Este diya se tendra tambyen la Asamblea jenerala de Vidas Largas).
Antes de aboltar a la Etika djudiya ke la kuala dainda no eskapi de avlarvos, vos kyero avlar de Sarah Bernhardt, una komedyante nasida djudiya en Fransya unos 23 anyos despues de Rachel, komedyante komo eya, famoza komo eya, djudiya komo eya, de la kuala ya vos avli en una emisyon ke ize en 2010.
En la Fransya del siglo 19, tres mujeres izyeron muncho avlar de eyas, las tres fueron djudiyas: dos eran Rachel i Sarah Bernhardt, la tresera fue una mujer yamada la Païva. Puede ser un diya vos avlaré de esta tresera mujer.
Ama para oy aboltaremos a Sarah Bernhardt. Desde el empesijo, kale dizir ke kedan munchas kozas ke non son siguras en la vida de esta mujer, i por empesar su nasimyento, savyendo ke nasyo en Paris en 1844. Ama komo los papeles del estado sivil kemaron en 1871 kon el fuego ke destruyo a la Mayoriya de Paris del tyempo de los peleos de la Komuna de Paris, i afillu si Sarah Berhardt eya misma konto su vida en un livro eskrito en 1907 intitolado Ma double vie (mi dopya vida), komo era bastante mentiroza, es muy yuch de saver si nasyo en julyo, o en septyembre, o en oktobre de 1844, o mismo uno o dos anyos antes. Es vedra ke, en 1914, para pueder resivir la Lejyon de Onor, tuvo de prevar ke era franseza, i uvo una rekonstitusyon de su akto de nasimyento, echo asigun su akto de baptismo, tal ke produsido por Sarah. Vamos a ver un poko mas leshos ke es vedra ke esta djudiya fue baptizada en su mansevez. Asigun este sözde akto de nasimyento, nasyo el 25 septyembre 1844, de Judith Van Hard i de Edouard Bernardt (sin h).
Asigun Sarah Bernhardt en su livro, http://gallica.bnf.fr/ark:/12148/bpt6k2008708/f4.image
su madre teniya 16 anyos kuando eya nasyo, i su padre se fue en Kina un anyo despues su nasimyento. Sarah no konta muncho mas sovre su madre, i kaji nada mas sovre su padre. En vedra, dingun save kyen fue su padre, i su madre, ke se yamava Judith, era, komo se diziya, una kortezana, una medya-mundana, en kurto una mujer de negra vida, ke biviya de la proteksyon de sus amantes. Se dize ke era de orijen djudiya olandeza. La chika Sarah fue fiyada a una kriyadera bretona, ke solo avlava breton, i dunke la chika tambyen. Nasida en Fransya i kriada en Bretanya, me enkanto ke syertos tengan akuzado a Sarah, kuando ya era famoza aktrisa de teatro, de tener un aksento ajeno i ke eya tenga respondido: «Si tengo aksento, Senyor, i lo regreto muncho, mi aksento es kosmopoloito, i no alman. So una ija de la grande rasa djudiya, i mi avla un poko fuerte se syente de muestras peregrinasyones forsadas». Topi esta sitasyon, kon sus referensyas, en el artikolo de Wikipedia sovre eya.
Esto dicho, Sarah mos konta ke a la edad de 3 anyos, estando en la kaza de su kriadera en Bretanya, kayo en un fuego i se kemo. Kuando su madre i sus tiyas lo supyeron, todas vinyeron de ande estavan para kurarla de sus kemaduras. I su madre la trusho en una kazika en Neuilly, al lado de Paris, kon la kriyadera i el kriadero, kijo dizir el marido de la kriadera. I aya es un nes si esta ijika Sarah yene guadro su madre, porke dos anyos despues el marido de su kriyadera se muryo, i su kriadera se kazo kon otro, un kapidji, i troko de alkunya i de kaza, indose rue de Provence en el sentro de Paris, i komo no saviya eskrivir, no lo eskrivyo a la madre Judith. Es por mazal grande ke la chika se enkontro kon una de sus tiyas, ke pasava por aya, bushkando un apartamento para morar. La chika demanda a su tiya de tomarla kon eya, la tiya responde ke va vinir amanyana i sale. La ijika se echa por la ventana i se kaye delantre de su tiya, un diz rompido, i tambyen un braso en dos lugares. Por siguro su tiya la toma kon eya. La chika va meter dos anyos para salir sana de este aksidente.
El duke de Morny, amante de su tiya, se okupa de la edukasyon de la chika i la embiya en un konvento en Versailles. Aya la chika djudiya se aze kristyana, resive el baptismo en 1857, a la edad de 13 anyos, i pensa azerse relijyoza. Al kavo no se va azer relijyoza, sale a 14 anyos del konvento i entra al Conservatoire en 1859, de ande sale en 1862 kon un sigundo premyo de komediya. Entra a la Komediya Franseza, ama aya, 4 anyos despues, en 1866, una komedyante sosyetarya vyene aharvar a una ermana de Sarah – Sarah teniya una ermana tambyen komedyante – la kuala aviya pizado el fostan de la sosyetarya. De la birra de ver su ermana aharvada, Sarah da un shamar a la sosyetarya. Por esto es echada afuera de la Komediya franseza. Tyene 22 anyos.
Se va en Beljika, no se keda muncho tyempo aya, solo unos kuantos mezes, ama bastante para aboltar en Fransya prenyada del prinsipe Henri Joseph de Ligne, i de el va tener un ijo, Maurice, el solo haliz amor de su vida, afillu si este ijo no lo meresiya tanto, porke, asigun lo ke meldi, solo saviya tomarle paras para merkar droga. En vedra este ijo se va azer autor i sovre todo direktor de teatro – entre los kuales el teatro Sarah Bernhardt.
Entremyentres, muestra Sarah, aboltada en Fransya, entra en un teatro bastante famozo yamado el Odeon, i empesa de ser konosida. Vyene en 1870 la gerra kontra la Prussa i Paris se ve enserrado. Sarah aze del teatro un ospital militar i eya se aze enfirmyera i kura los feridos.
En 1872, djuga el rolo de la Reyna en Ruy Blas, de Victor Hugo, ke va yamar a Sarah «la boz de oro». La Komediya Franseza, ke la teniya echado afuera en 1866, la yama para entrar de muevo solo sesh anyos mas despues. Aya djuga Phedre (de Racine) en 1874 i Hernani (de Victor Hugo) en 1877. Vyene a ser muy famoza, es yamada la Divina, la Imperatriz del teatro.
En 1880, se pelea kontra el Administrador de la Komediya Franseza, porke, asigun eya, fue forsada de djugar kuando dainda no era pronta, i es eya ke se va de la Komediya Franseza, la kuala la ataka en djustisya i la aze kondenar a pagarle 100.000 frankos (de oro) de indemnidad. Sarah funda su propya kompaniya de teatro. I empesa una vida de viyajes teatrales en el mundo entero. Eya djuga en franses, ama en esta epoka la lingua franseza era muncho mas avlada en el mundo ke agora. I la djente era tresalida de verla i oirla djugar teatro franses. Jean Cocteau enventa para eya los byervos monstre sacré (monstre sagrado). Kuando se va a los Estados Unidos, alkila aya un treno Pullman entero para eya, su djente (aktores, teknikos, ets), i sus ocho tonas de baules.
Sarah aprovecha ke se topa en los Estados Unidos para enrejistrar su boz (djugando Phèdre) sovre el gramofono de Edison. Kreo ke topi sovre internet este rekodro. Se puede oir sovre internet unos kuantos otros rekodros de su boz.
https://www.youtube.com/watch?v=ermWav_qtKE
Kale dizir la vedra: la deklamasyon, yena de grandilokensya, de Sarah Bernhardt, no es mas a la moda. Agora no se djuga ansina. Ama kale pensar ke del tyempo de Sarah no se imajinava de djugar de otra manera. Kuando Louis Aragon, mismo al kavo de su vida, meldava sus propyas ovras, las meldava a la manera de Sarah Berhardt. I komo no akodrarse tambyen de André Malraux el 19 de desyembre 1964, diya de la entrada en el Pantheon de Jean Moulin (ke fue kapo de la resistansya i, aferrado, muryo de la tortura sin tener avlado). Es vedra ke la avla de Malraux es yena de grandilokensya. Ama dinguno tyene gana de burlarse, i su avla de este diya kedara en todas las memoryas.
http://www.ina.fr/video/I00013183
Edmond Rostand, el ke eskrivyo Cyrano de Bergerac, eskrive para Sarah Bernhardt su piesa L’Aiglon, savyendo ke Sarah puede tambyen djugar rolos de ombre. De otra vanda, Oscar Wilde eskrive Salomé para eya i a su demanda, i eya va ser ke va djugar el rolo de Salomé en 1892.
En 1893, toma la direksyon del Teatro de la Renaissance, i en 1896 se pasa aya una grande fyesta yamada Journée (diya) Sarah Bernhardt, kon una komida de 500 musafires. Un imno a Sarah, kompozado para eya, es jugado por el famozo orkestra Colonne.
Kuando empesa el echo Dreyfus, la mayoriya de sus amigos i serkanos, inkluyendo su propyo ijo Maurice, se meten kontra Dreyfus. Ama desdel empesijo, Sarah keda de la vanda de Dreyfus i de Emile Zola.
En 1899, troka de teatro i toma la direksyon del Teatro de las Nasyones, ke va yamar Teatro Sarah Bernhardt, ke se topa Place du Châtelet. Este nombre va kedar despues de la muerte de Sarah asta 1968, salvo durante la okupasyon almana, ande tuvo de trokar su nombre, syendo ke Sarah Bernhardt aviya sido de rasa djudiya, i se yamo teatro de la Cité, antes de aboltar al nombre Sarah Bernhardt a la Liberasyon. En este teatro Sarah Bernhardt un autor (djudyo el tambyen), Tristan Bernard, djugo pyesas suyas, i en vezes sin mushteris para venir verlas. Tristan, famozo shakadji, embiyava invitasyones dizyendo: «venid armados, el lugar es dezyerto» i yamava estonses el teatro «Sahara Bernhardt».
Yo personalmente, kreo ke nunka me fui adyentro de este teatro, ama lo konosi muy byen en lo ke, kuando era avokato, pasava delantre a kada vez ande me iva al palasyo de djustisya, kijo dizir kaji kadal diya…
Sarah djuga kon su selebridad i gana paras kon reklam a su nombre. Se aze fotografyar echada en un serkolyo. No es un rolo de teatro, no. Es su uzo i el serkolyo se topa en su kaza. Se konta ke Bela Lugosi, ke fue Dracula al sinema, dormiya el tambyen en un serkolyo…
Pishin kuando nase el sinema, en 1900, Sarah va djugar Le duel de Hamlet i otros filmos mas despues. Se pueden ver pedasos sovre internet. Vos rekomendo Queen Elisabeth (1912). El filmo es mudo, por siguro, i el djugo de Sarah Bernhardt es un djugo de filmo mudo. No diré otra koza…
https://www.youtube.com/watch?v=RbYnGJQ-ku0
En 1914, Sarah Bernhardt resive la Lejyon de Onor, i al empesijo de la gerra el Ministeryo de la Gerra le akonseja de alesharse de Paris menasado. Eya se va al bodre de la mar, ama a la edad de 72 anyos su pacha, hazina de tener kaido munchas vezes sovre el mismo diz en djugando syertos rolos, se gangrena i kale kortarla arriva del diz.
Estamos en 1916. Komo dize Sacha Guitry kontando la koza, biviya desde 50 anyos kon un solo pulmon, desde 30 anyos kon un solo rinyon, i agora kon una sola pacha.
Ama muestra Sarah teniya un karakter de fyerro, i se dechizo a djugar asentada, sin nunka kesharse. Es en el tyempo ande esta djugando un filmo para Sacha Guitry, La Voyante, ke se muere en Paris el 26 de marso 1923, a la edad de 78, tenyendo un hach entre sus manos i despues de tener resivido los ultimos sakramentos de la relijyon katolika.
Sarah Bernardt era katolika desde su chikez, komo ya lo konti. Ama nunka nyegara sus orijenes djudiyas, i lo amostra muy byen el nombre Sarah ke se tomo, kuando teniya munchos otros. I kuanto a la alkunya, en vez de fransizarla en Bernard, a la kontra eskojo de yamarse Berhardt kon una h ke no yevava su padre.
Tuvo un alay de amigos i amantes djudyos, i eya misma saviya muy byen ke afillu su katolisismo, la djente antisemit no le pedronava de ser nasida djudiya. Kuando sale de la Komediya Franseza, resive una letra anonima dizyendole: «Mi povereto eskeleto (es vedra ke era muy flaka), azeriyas byen de no ver tu orrivle nariz djudiya a la seremoniya despues de demanyana. Me espanto por eya ke no arresiva todas las mansanas ke azen kozer agora en la buena sivdad de Paris a tu entisyon…»
Komo lo dishe un poko antes, Sarah Bernhardt se metyo de la vanda de Dreyfus kuando todos, alrededor de eya, eran kontra, i se opozo kon koraje a la armada franseza. En los Estados Unidos djugo en un gala de karidad en favor de las viktimas de los pogromes de Rusiya. En 1892, djuga en New York una piesa inspirada del folklor yidisch.
Kon todo lo ke vos konti, penso ke ya entenditesh ke Sarah Bernhardt teniya un karakter muy fuerte, i ke nada la pudiya abatir. Su dicha personala era «quand même», lo ke se puede trasladar en djudeo-espanyol por yene. Me dizen ke no se puede azer esto? Yo yene lo vo azer. Coluche disho una koza un poko ansina, a propozito de su restorante para los proves:»no saviyamos ke era imposivle. Estonses lo izimos.»
Antes de eskapar esta emisyon, kyero aboltar un poko a la komedyante Rachel, para bushkar a la vez las asemejansas i las diferensyas entre estas dos komedyantes.
Las asemejansas, es ke las dos, nasidas proves, tuvyeron una selebridad ekstraordinarya, munchas vezes en djugando los mismos rolos. Las dos nasyeron djudiyas. Las dos tuvyeron amantes de alta aristokrasiya, i kada una tuvo un ijo, la primera de un ijo de Napoleon, el prinsipe Walewski, la sigunda de un prinsipe beljikano, el prinsipe de Ligne.
Las diferensyas, es ke la sigunda, Sarah, nasida en 1844, empeso su karrera de teatro kuando la primera Rachel, muerta a 36 anyos en 1858, ya teniya eskapado la suya. Rachel kedo djudiya astal kavo, muryendo dizyendo el Shema, Sarah se izo kristyana de chika i muryo kristyana a 78 anyos.
Sovre esto me vo kedar i vos digo al djueves ke vyene, si kyere el Dyo!
Edmond Cohen
Paris Fransya
