eSefarad Noticias del Mundo Sefaradi
Keridos amigos,
Oy martes ya preenrejistri el teksto de mi emisyon del djueves ke vyene, syendo ke no estare mas en Paris djueves a la ora de la emisyon, ama en el treno yevandome a Bedarieux, una sivdadika serka del kazal ande fui eskondido del tyempo de la gerra.
El Mayor de Bedarieux i la reprezentante de Yad Vashem van a inogurar vyernes a la demanyana una Avenida de los Djustos entre las Nasyones, i fui kombidado, i me vo ir kon mi mujer. Vos kontare mas a mi buelta en la emisyon del djueves de despues, si kyere el Dyo
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
MEAM LOEZ ATADURA DE ITSHAK – 6
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos anunsyo ke el proksimo atelye de konversasyon de la asosyasyon Vidas Largas se tendra el martes ke vyene 3 de desyembre, de las dos i un kuarto asta las kuatro i medya-sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
La emisyon de oy a sido preenrejistrada, porke kuando me oiresh, no estaré en Paris, ama en el treno yevandome a Bedarieux, una sivdadika franseza a unos kuantos kilometros de Herepian, el kazal ande fui eskondido ande kristyanos en 1944 asta la Liberasyon al kavo de agosto.
El vyernes 29 en Bedarieux va ser inogurada por el Mayor de Bedarieux i por la reprezentante de Yad Vashem la Avenida de los Djustos entre las Nasyones. i fui kombidado, en tanto ke ijiko eskondido por kristyanos en la rejyon de Bedarieux, a asistir a esta seremoniya.
Vo aprovar de aprovechar esta okazyon para ir en Herepian a vijitar, unos 70 anyos despues, a las kazas ande mori eskondido. La djente ke me eskondyo ya se muryo desde muncho tyempo, ama desharon desendyentes, orguyozos kon buena razon de lo ke izyeron sus antepasados verso los djudyos bushkados por la polisiya.
Los ke van sovre el sityo internet Ladinokomunita pueden meldar esta istorya miya en los vyejos mesajes ke eskrivi en 2005, kon el titolo istorya de mi chikez: mesajes n° 12128, 12136, 12169, 12189, 12204, 12214.
El ombre, un kristyano ke konosyo mi istorya i ke aze parte de una asosyasyon ke bushka a los djustos de la rejyon de Bedarieux ke me kombido para esta inogurasyon va ayudarme para azer rekonoser por Yad Vashem las senyoras Carayol i Gasset komo djustas entre las nasyones. Ke plazer seriya para mi, komo para los inyetos de estas mujeres, si pudiyamos reushir.
Al djueves proksimo, 5 de desyembre, si kyere el Dyo, vos kontare lo ke se se sera pasado en esta inogurasyon.
Esto dicho, agora aboltaremos a la atadura de Itshak, syendo ke, komo ya lo savesh, empesi aze unas kuantas semanas la meldadura de un pedaso bastante largo del Meam Loez en su komentaryo de la atadura de Itshak, meldadura ke me va tomar otras kuantas semanas.
Kuando vos deshi la semana pasada, Avraham i su ijo estavan kaminando en djuntos verso la montanya de la alsasyon, kuando aparesyo a Avraham el Satan ke tomo aparensya de un vyejo, ke le demando kualo estava azyendo, i respondyo Avraham ke iva azer tefila, lo ke no enganyo al Satan.
I kualo disho el Satan a Avraham? Aki estavamos. Kontinuo mi meldadura, dando la palavra al Satan:
Vyejo, vyejo! (dikat: aki el vyejo es Avraham, no el Satan. El Satan es el sozde vyejo ke esta avlando. a Avraham , ke es otrun vyejo. Los dos son vyejos, no kale konfundir; syerro la paranteza) Syerto ke salistes loko, ke syendo alkansastes a tener un ijo a tu vejes, ke havana (entendimyento) tyenes de matarlo? I si diras ke el Santo Itbarah te lo disho, tal no kreo, ke syendo koza ke no se entyende kon sevara (eksplikasyon), no se puede kreer ke el Santo Itbarah akomete tal koza disferensyada, si no tengo safek (shupe) ke es algun suenyo ke te se asemejo entre suenyos, ke el Dyo te enkomendo ke lo degoyes a tu ijo, i esto es kachoteriya (lokura, fanatismo) grande de azer kavzo de los suenyos, ke si vas apuntando en esto alguna noche te sonyaras ke te dize el Santo Itbarah ke te eches a la mar, i asigun no aras kavzo de este suenyo, lo mizmo deves de rejirte agora de no entrar en sangre de tu ijo.
I pensa byen lo ke vas a azer, i veras ke estas muy yerrado en tu nevua (profesiya) i kyen save lo ke te disho i te se asemejo ke es esto, ke kuantas vezes se sonya el ben adam i no se akodra por syerto lo ke se sonyo.
I afillu ke fuera verdad ke de diya, estando despyerto, te yamo el Santo Itbarah i te disho klaro ke degoyes a tu ijo, si teniyas sehel (meoyo) no le eskuchavas i te pudiyas diskulpar kon una buena taana (kesha), ke asigun es ke kuando uno le emprezente alguna matana (regalo) a su haver (kompanyero) no puede tomarsela atras, lo mizmo es esto, ke no puede sovreforsarte ke lo degoyes. I savete ke si tal koza azes, el Santo Itbarah se vengara de ti por matar alma sin pekado, ke ya te dishe ke todo esto son suenyos ke te sonyastes.
Le respondyo Avraham, dizyendo: Vate de mi lado, porke eres enkonado i avlastes demazyado, i syendo ke, baruh haShem (el Nombre sea bendicho), mi korason esta apegado kon el djudeszmo, no ago kuenta de tu konsejo, i todas tus taanot (argumentos) son patranyas (bavajadas), ke yo ya konosko por siguro la maala (grandeza) del Santo Itbarah, i afillu si me komendara mas koza grande ke esto, tengo ovligo grande de afirmar su komando.
I syendo vido el Satan ke no avanso nada kon Avraham, se le aparesyo delantre de Itshak, i se le asemejo komo un mansevo, i le demando: Ande vas? Disho Itshak: A meldar en la yeshiva. – No saves ke tu padre te yeva para degoyar? Disho Itshak: Sovre todo me kontento.
Estonses le disho el Satan unas avlas kemaderas ke esta es su nota: Ya te veo ke eres hasid komo tu padre. No te embarasa la muerte del todo. Ma a lo menos deves de tener piyadad de la desdichada de tu madre, ke kuanto tsaar yevo su alma; i toda su vida fue penando de mal en mal, i dezeoza de tener un ijo ke le diga kadish. I kuantos taaniyot (tanites) tyene echo asta ke se apiyado el Dyo de eya, i syendo de 90 anyos te paryo. I ke hasidut es esto ke vas azer: ke savete por syerto ke esto es su kavo de tu madre, ke de sintirlo se muere del tsaar.
I ya te akodras kuanto peno tu madre kon tu padre asta ke lo kito a Ishmael de su kaza i le tomo shevua (juramyento)ke toda su azyenda te la emprezente a ti en su vida. I syendo agora te vas a matar, verna (vendra) Ishmael i sera yoresh (eredero) de tu padre. I a lo menos por este despecho , deves de no azer tal koza, ke syerto tu madre se mata kon sus manos de la pasyon (sufriensa) ke sentira; ke milvad (ademas) ke le bolo su ijo regalado, ke entre en su lugar su enemigo despues de averlo echado komo un esklavo; i este tsaar no lo podra tomar a pasensya.
I syendo ke el lashon hara (mal avlar) si no entyene mashkara (dos byervos eskuros ke malgrado mis esfuersos no entendi, vos demando pedron, keridos oyentes), lo mizmo ditas avlas del Satan le izyeron un poko de peula (problema) a Itshak, ke se le aflosho el korason algo kuanto, i le rogo a su padre ke se apyadara de el, dizyendo ke no le pezava sola mente por Ishmael, , ke komo se le konterna (kontendra), dizyendo ke salyo kon la suya de eredar toda la moneda, i syendo es rasha no merese de gozarla? I ya me tenesh kontado ke el Santo Itbarah atorgo en la palavra de mi madre i vos disho ke deviyash de azer lo ke vos disho mi madre i kitar a Ishmael de kaza. I esto amostra ke las avlas de este mansevo son razonavles i djustas; ke syerto el Santo Itbarah no se arrepyente de lo ke dize, i para ke vos metyo en tanta hadra de azervos kitar a Hagar i a Ishmael de kaza, i enkomendarvos ke no lo tengash por yoresh (eredero)? Por esto kale ke detengash la mano i tornesh a preguntarle al Santo Itbarah i vos informesh byen, i si es komando de el Santo Itbarah, aki esto yo muy pronto de azer su palavra.
Lo arifto (le izo la lisyon) Avraham a Itshak, dizyendo: Savras, ijo miyo, ke este ombre ke vistes es el Satan, ke te se asemejo en figura de mansevo para azerte pekar. Por esto no le agas kuento del todo, i el Santo Itbarah te pagara asigun avlo. I tenlo por siguro ke si yo teniya safek (shupe) una de mil en mi nevua (kapachedad profetika) no te metiya en este bayle, ke syerto no aspero tener otro ijo luzyo i bueno kuanto tu. Ma syendo ke me lo disho klaro, devemos de azer su komando kon muncha alegriya.
I syendo vido el Satan ke no izo ningun provecho, les tomo la delantera i entre dos montanyas ke por ayi deviyan de pasar, se fue el adelantre i se izo un riyo korryente i grande. Kuando ayegaron ayi Avraham i Itshak, se entro Avraham solo a ver ke kantidad es la agua, i vido ke le veniyan asta el medyo kuerpo. Lo tomo a Itshak por la mano i lo fue yevando. Ma kaminando un poko, les vino el agua asta la garganta. Also los ojos Avraham i miro por las kuatro partes i se kedo maraviyado, dizyendo: Yo tengo kaminado munchas vezes por este kamino, i nunka uvo aki riyo, i asta agora entendi ke era un poko de agua ke se rekresyo de la luvya. Ma agora ke es muy ondo, es koza de milagro, i otro no es solamente ke el Satan ke mos izo esta konchada (enganyo) para devedarmos (impedirmos) de la mitsva.
I le disho a Itshak: Kamina, ijo miyo, i no te espantes, ke savete por syerto ke tierra firme es lo ke estamos kaminando.
Kuando le vinyeron las aguas asta la boka, also Avraham los ojos a los syelos, dizyendo: Senyor del mundo, bau maim ad nafesh (entraron aguas fasta alma, Teilim 69, 2). I si, has veshalom, nos aogamos perdemos de afirmar guestro komando. I ansi le avizaron de los syelos al Satan ke se apartara de ayi.
I de ayi se fue el Satan onde Sara i le demando: Onde esta tu marido?
Disho Sara: Se fue a su melaha (su echo) , i mi ijo kon el.
Disho el Satan: Komo lo deshastes ir, syendo nunka tuvistes korason de desharlo salir de la puerta de kaza?
Disho Sara: No fueron a lugar leshos, sola mente aki serka en tal yeshiva para meldar. Disho el Satan: savete ke no lo veras mas.
Respondyo Sara dizyendo: Lo ke el Santo Itbarah kere, ke aga.
I sospecho Avraham no sea ke le arondjara el Satan alguna pyedra a Itshak, i lo ara baal mum (defektuozo) i es pasul (impropyo) para korban. Por esto lo guadro en una meara (burrako) debasho de tyerra para eskaparlo.
I si demandaresh, syendo supo Avraham ke akel ombre era el Satan, ke avana (razon) tuvo de guadrarlo, ke syerto del Satan no se puede guadrar la presona aun ke se eskonda en el vyentre de su madre? Se vos remedyara kon lo ke avizimos arriva en la perasha de Noah ke no es derecho de kaminar por la plasa en tyempo de magefa (epidemya): ke deve la presona de guadrarse kuanta mas puede.
I empeso Avraham a azer la hakana (ordenasyon), dehaynu (es dizir): ke ya tenesh sentido en la perasha de Bereshit ke Adam arishon fraguo un mizbeah (altar) en dita montanya presyada i ayego korban en el, i lo mizmo ayegaron Kain i Evel i Noah. Agora aserkandose Avraham en dita montanya, le amostro el Santo Itbarah el lugar propyo del mizbeah , i lo fraguo Avraham de buen modo.
I esto es lo ke dize el pasuk: vayiven sham Avraham et amizbeah (i fraguo ahi Abraham a la ara). Ke deviya de dizir: vayiven sham Avraham mizbeah (i fraguo ahi Avraham ara) i kon esto avansava 3 letras. Ma es avizo ke en akel propyo mizbeah ke fraguo Adam arishon, ayi fue la akeda (atadura) ; i lo ke no fraguo un mizbeah de nuevo, savresh ke komando el Santo Itbarah ke el mizbeah no se estrene kon el korban tamid (sakrifisyo de kadal diya) de la tadre, sola mente kon el tamid de la manyana, i si a kavzo no ayegaron el tamid de la manyana i el mizbeah era nuevo, no podiyan ayegar en el tamid de la tarde, sigun avizaremos en su perasha. I syendo este kuento de la akeda fue a oras de minha, no era posivle de fraguar mizbeah. Por esto se fue Avraham al propyo mizbeah ke ya aviya de vyejo para azer su korban, i syendo ya teniya (el mizbeah) 428 anyos, i syerto estariya derrokado, tuvo hehreah (menester) de fraguarlo. I si tambyen ke se teniya derrokado en tyempo de dor apelaga (jenerasyon del diluvyo) i puzo la lenya sovre el mizbeah byen ordenada. I el mizbeah era en frente del kise akavod (trono de onor, de glorya). I se fue a la meara i lo tomo a Itshak i se vino kon el.
I savresh ke aun ke el tamid (sakrifisyo de kadal diya) ke se ayegava de manyana antes se ordenava la lumbre i despues se degoyava, pero en el tamid de minha era la buelta, sigun avizare en la perasha de Pinhas, i syendo ke la akeda de Itshak fue a oras de minha, sigun avizi arriva, por esto no ensendyo la lumbre antes de degoyarlo, para azerlo korban igual mente del tamid de minha. I ansi uzan algunos de dizir la perasha de la akeda tambyen en minha, syendo ke fue en oras de tadre; lo tyenen por bueno de enmentar (rekodrar) este kuento, ke su zehut (merito) mos balde las malas sentensyas.
Ansina se eskapa mi meldadura de oy. Al djueves ke vyene, tengo la entisyon de kontarvos mi viyaje en Bedarieux. I despues…puede ser vamos a saver lo ke va afitar a este dezmazalado de Itshak ke esta bivyendo oras pretas, entre el Satan ke lo kyere pedrer i su padre ke lo kyere degoyar…
Al djueves ke vyene, si kyere el Dyo!
Edmond Cohen
