eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
LA ISTORIA DE YERUSHALAÏM
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes de desyembre, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet o Poissonnière. La entrada es la del lokal i no la del han.
A propozito de la UISF ande se pasan los atelyes, tengo un aunsyo de azer en franses :
L’UISF –Club Puvis organise le dimanche 27 novembre dans ses salons et discothèque 17 rue Pierre Sémard Paris 9ème métro Cadet une grande après-midi dansante disco-orientale à partir de 15 h 30. Toutes boissons chaudes et froides, plus buffet sucré offerts à volonté. PAF 15 €. Renseignements répondeur 01 49 70 66 00. Je précise que cette annonce intéresse surtout les personnes âgées entre 35 et 55 ans.
Esto dicho, pensi de avlarvos oy de Yerushalaïm i de su istorya, savyendo ke no va ser posivle de kontar 3.000 anyos de istorya en una sola emisyon de 20 minutos. Vo aprovar de kontarvos esta istorya en dos emisyones.
Los arkeologos toparon, ande esta agora la sivdad de Yerushalaïm, pedasikos de seramika datando de la epoka de 3.500 antes del Kristo. No se save nada de los ke biviyan i moravan aya. Lo ke empesamos de saver vyene de mas tadre, verso los 2.000 antes del Kristo, del tyempo de los Kenaanim, los ke moravan en Canaan. Son tekstos de sus enemigos los Ejipsyanos. La yaman Rushalimu o Urushalimu, lo ke parese kerer dizir, en etimolojiya kaldeana : Yeru, sivdad, morada, fundada por o konsagrada a o protejada por por el dyo kenaani yamado Shalem, lo ke, antes de kerer dizir la paz, kyere dizir lo ke esta kumplido, eskapado. Los Ejipsyanos se van a azer los maestros de la sivdad, eya misma dirijida por un kenaani debasho de los Ejipsyanos. En los anyos 1350 antes del Kristo, vemos a un governador yamado Abdi-Heba (servidor del dyo Hebbat), rey de Yerushalaïm debasho del famozo Paro Akhenaton. Kale dizir ke el Dyo Hebbat no es un dyo kenaani, ama hurri, un puevlo serka de los hittitos de Anadol. Ke vyene bushkar aki un dyo Anadollu, esto no se.
Despues de esta epoka, entre 1200 i 1000, aparesen los primeros israelim, ke tyenen la partikolaridad de no engrandeser ni komer puerko, ansina es komo los arkeologos los topan. Si topan uesos de puerko en los restos de una morada, no estamos kon israelis. Si topan uesos de vaka, de kavra o de kodrero ama no de puerko, pensan estar kon israelim.Los kenaanim moran en sivdades, los israelim son mas nomades i biven en las altas tyerras.
El Tanah (por enshemplo Shofetim, kapitulo 19, pasuk 10) mos dize ke la sivdad de Yerushalaïm se yama Yebus, i ke sus moradores son los Yebuseos, i en el sigundo livro de Shemuel, kapitulo 5, pesukim 6 a 9, ke el rey David suvyo kontra esta sivdad i la tomo, i izo de eya la sivdad de David.
Asta unos kuantos anyos, los arkeologos diziyan ke nada syendo topado sovre el rey David, no kaliya fundarse sovre el Tanah en kuanto al punto de vista istoriko. Las kozas estan un poko trokando agora, kon las muevas deskuvyertas arkeolojikas : en 1993, los arkeologos toparon en Tel Dan, en el norte de Israel, una laja eskrita por un rey de Damas, enemigo de Israel, ande esta yamada la « Beit David », la kaza de David. En 2008, los arkeologos toparon un ostrakon, pedaso de poteriya eskrita ke pod, riya ser el primer dokumento eskrito en ebreo. Estas dos deskuvyertas arkeolojikas estan agora amostrando ke el Tanah konta puede ser sovre el rey David kozas ke son vedraderas, i sovre todo ke este rey a egzistido, i ke no es una leyenda.
Esto dicho, keda ke los arkeologos asta oy no toparon nada sovre el rey Shelomo ke asigun el Tanah reynava sovre todo Erets Israel, de Dan a Beer Sheva. Asigun los arkeologos, la sivdad de Yerushalaïm e la epoka ande el Tanah nos dize ke biviya Shelomo (en los 1000 antes del Kristo) era una chika sivdadika. Es solo dos siglos mas despues ke Yerushalaïm empesa de ser una haliz kapitala de estado.
Sale de la laja de Tel Dan topada en 1993 i de la kuala vos avli ke es vedra ke aviya dos reynos, komo mos dize el Tanah : el de Israel al norte, i el de Yehuda al sur : Hazael, rey de Damas, se tresale ke a matado i el rey de Israel (Yoram ijo de Ahav) i el rey de « Bet David », la kaza de David, (Ahasyau ijo de Yoram, un otro Yoram). En el Tanah, estos dos reyes ya fueron matados, ama no por Hazael, ama por Yehu, para ser rey de Israel…i ke lo fue. Esto se paso en 841 antes del Kristo. Esta laja es la primera konfirmasyon arkeolojika ke uvo un David, ke fue rey i dyo una dinastiya. Es tambyen una konfirmasyon ke uvo dos reynados, komo mo los ambeza el Tanah, un reynado, Israel, yamado ansina por sus enemigos, el otro, Yehuda, yamado kaza de David por sus enemigos.
Yerushalaïm se desvelopo kuando los Asiryanos, en 722, destruyeron al reyno de Israel i ke miles de israelis vinyeron a topar refujyo en Yerushalaïm. En el mismo tyempo, el rey de Yehuda, Hizkiyau, morando en Yerushalaïm, espantandose kon razon ke los Asiryanos atakariyan a Yerushalaïm tambyen, izo fraguar un tunel para yevar en la sivdad a la agua de una fuente. Esto esta kontado en el Tanah, i los arkeologos, no solo toparaon a este tunel, ama toparon tambyen en 1880 a una laja de esta epoka kontando komo se izyeron los lavoros, komo aviya dos ekipos de lavoradores, i komo se gritaron de los unos a los otros asta ke se auneron enfin.
En Yerushalaïm los arkeologos toparon dos amuletas datadas de 600 antes del Kristo, kon un teksto en ebreo dizyendo : « Ke Adonaï te bendiga i te guadre, ke aga para ti resplender su kara ». Es la primera vez ke se topa en arkeolojiya el nombre del Dyo, en una bendisyon ke me aze pensar a la birkat cohanim.
En 587 el rey del Imperyo neo-babikolyano, yamado Nabuchodonosor, toma la sivdad de Yerushalaïm, i destruye el Bet Hamikdash, el templo de Shelomo. No vos avli de este templo porke si el Tanah mos avla muncho de su fraguamyento por el rey Shelomo, dainda los arkeologos no toparon dinguna trasa ni de un rey Shelomo, ni de un templo. Ama esto no kijo dizir ke no egzistyeron. Si se topo una trasa de David, es siguro ke vino un rey despues de el, i deke no se yamariya Shelomo ? De otra vanda, es kaji siguro ke aviya en Yerushalaïm un templo ke Nabuchodonosor kemo, afillu si no se topa trasa de el.
Esto dicho, Nabuchodonosor se yeva kon el la mayoriya de los Djudyos i los trae en Babiloniya, lo ke agora se yama Irak. Tenemos en los Tehilim, el salmo 137 en el kual los djudyos empesan por dizir, pasuk 1 : « sovre los rios de Babilonia , alli estuvimos, tambien lloramos, en muestro membrar a Zion ». I despues dizen el famozo pasuk 5, ke konosen todos los djudyos en el mundo : « Si te olvidaré, Yerusalaim, olvidese mi derecha ».
Orozamente, las kozas trokan. En 538, kijo dizir unos 50 anyos despues de la destruisyon de Yerushalaïm i de la deportasyon de los Djudyos, el rey de los Persos, Cyrus II el Grande, toma la sivdad de Bavel, destruye el imperyo neobabilonyano, i pishin da a los djudyos la otorizasyon de aboltar en Yerushalaïm, ke aviya konkistado tambyen sovre los Neobabilonyanos.
I a poko a poko los djudyos fraguan de muevo a la sivdad de Yerushalaïm ke aviya sido destruida, i al Bet Hamikdash ke aviya sido kemado.
Los Persos se van a kedar sovre Yerushalaïm asta la yegada del rey Makedonyali Alexandros, ke toma Yerushalaïm en 332. Ama despues de su muerte en 323, sus zabites se desparten el imperyo. Yerushalaïm kae basho la dominasyon de los Ptolemeos, los reyes de Ayifton, asta ke el rey Antiochos III, de la dinastiya de los Seleusidos (los de Siriya) arondje los Ptolemeos ejipsyanos de Judea i tome Yerushalaïm en 198. Komo ya lo savesh, si este Antiochos III no se va amostrar negro, su ijo Antiochos IV Epiphanos, el, se va amostrar intolerante i negro.
Ya savesh lo ke sigyo : una rebuelta de los djudyos kondusida por Matatiau i sus ijos los Makabim, en 165 antes del Kirsto ; van a arondjar a los Gregos de Yerushalaïm, es la istorya de Hanuka. El bet Hamikdash va ser alimpyado i va pueder ser de muevo uzado komo templo kasher. Uno de los ijos de Matatiau, el solo ke no se muryo en la gerra, Shimon, se va azer kapo de los djudyos, i va dar nasimyento a la dinastiya de los Hashmonaïm, ke van a regnar sovre una Djudea independyente .
Los reyes hashmonaïm no se kontentaron de reynar sovre Yerushalaïm. Engrandesyeron a poko a poko el pais, ke se izo un territoryo komo el aktual estado de Israel i la Palestina, el Golan i una parte de la Jordaniya de oy.
Malorozamente se pelearon entre eyos, al punto de yamar a los Romanos para ayudarlos.
Por vinir vinyeron. En 63 antes del Kristo, Pompee entra en Yerushalaïm, i los Romanos no tuvyeron entisyon de irse.
Kale dizir ke los reyes Hashmonaïm dyeron munchos dehtes a los Romanos porke organizaron rebueltas una detras de otra. Dinguna reusho. La primera, organizada por el rey Alexander II, ijo de Aristobule II i inyeto del rey Alexander Yanaï, empeso en 55 antes del Kristo, dunke solo ocho anyos despues de la venida de los Romanos.
No reusho, ama dos anyos despues, dunke en 53, su padre Aristobule II organizo mueva rebuelta. No reusho tampoko, ama en 40, 13 anyos mas dospues, es otro ijo de Aristobule II, yamado Antigone, ermano de Alexander II, ke organizo mueva rebuelta, ayudado de los Partos. Esta vez arondja a los Romanos de Yerushalaïm, ke va kedar independyente durante tres anyos, i despues los Romanos van a venir de muevo, kon el ayudo de Herode, amigo de los Romanos.
Los Hashmonaïm son matados, i es Herode ke los Romanos meten komo rey en Yerushalaïm.
El rey Herode, amigo del enemigo i okupante Romano, fue aboresido de los djudyos, ama yene kale dizir ke el es ke izo grandes lavoros de fraguamyento en todo el pais, sovre todo los del Bet Hamikdash. Dainda keda el Kotel Maaravi, ke syrvyo para las fundasyones, i da una idea de lo ke deviya ser el templo entero.
No kale konfundir este Herode kon su ijo Herode Antipas, ke parese ser el rey del tyempo del kualo Jesus fue krusifyado verso el anyo 33 …despues del Kristo, savyendo ke agora se pensa ke Jesus nasyo 4 anyos antes de su nasimyento kalendaryo. I en Yerushalaïm fue enterrado.
Aki tengo de avlar de las dos rebueltas djudiyas, esta vez no son los reyes Hashmonaïm ke las azen, syendo ke no ay mas, todos an sido matados. Esta vez son rebueltas populares. La de 66, ke va surear asta 70, kuando los Romanos, yene arrondjados de Yerushalaïm, van a venir de muevo i destruir el Bet Hamikdash. Ya vos konti esta rebuelta en una emisyon ke ize aki el 3 de avril 2008.
La sigunda rebuelta, la de Bar Kohba, empesa en 132 i va surear asta 135. De esta rebuelta vos avli tambyen en una emisyon ke ize aki el 3 de mayo 2007, konsagrada a Lag Baomer, fyesta kon relasyon a esta sigunda rebuelta. Durante los pokos anyos de estas dos rebueltas, Yerushalaïm va ser la kapitala de un estado djudyo independente, kon su moneda ke figura sovre los primeros pules israelyanos.
Despues de 135, Yerushalaïm, yamada Aelia Capitolina por los Romanos, va kedar proibida a los djudyos durante serka de dos siglos. Despues los Romanos se azen kristyanos, i en 324, el emperador Constantino va dar atras a la sivdad su nombre de Yerushalaïm. Esta sivdad se va azer sivdad santa para los Kristyanos por modo ke la tomba del Kristo se topa aya.
En 438, los Romanos permiten a los djudyos de morar de muevo en La sivdad de Yerushalaïm.
En 611, los Persos sassanides atakan a la Palestina i en 614 toman Yerushalaïm. Matan a los kristyanos, i meten Yerushalaïm basho un kapo djudyo.
Este kapo djudyo, yamado Nehemiah, va estar al governo de Yerushalaïm durante solo 3 anyos . Despues, en 617 es matado i dodje anyos despues, en 629, los Romanos vyenen atras i arondjan los Persos. La sivdad se kedo dunke sin los Romanos solo durante 15 anyos. Los Romanos, esta vez, no van a kedar muncho porke en 638, mueve anyos solo despues de sus retorno, los Romanos se topan arrondjados de Yerushalaïm por las invazyones muzulmanas.
ma ya vino el tyempo de eskapar mi emisyon, i komo lo estash vyendo, no me fue posivle de kontar 3.000 anyos de istorya en solo 20 minutos. Vamos a kedarmos aki en 638 kon la yegada de los Muzulmanos en Yerushalaïm, i el kusur, de 638 asta oy, lo kontaré el djueves ke vyene, si kyere el Dyo !
Edmond Cohen
