Muestra lingua: JOSÉ PAPO ASPERANDO EL AMANESER por Edmond Cohen

Keridos amigos, aki toparesh el teksto de mi emision del djueves 11 de avril, ande vo trasladar i meldar pedasos de un livriko eskrito en avril 1945 por Jose Papo, ke fue hazan del kal Berith Shalom, rue Saint-Lazare en Paris, del tyempo de la Gerra.

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Saludos a todos
Edmond Cohen
Paris, Fransya

JOSÉ PAPO ASPERANDO EL AMANESER

 

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon  de la Asosyasyon Vidas Largas se tendra el martes 23 de avril, de  las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.

El djueves pasado no pude eskapar el foyeton sovre Yaakov i Esav, i dishe : «  Si keresh una kontinuasyon, es a vozotros de dizirmelo ». Resivi solo dos repuestas demandandome de kontinuar. Sovre los oyentes de la radyo, sovre los 1.445 myembros de Ladinokomunita i los de eSefarad ke resivyeron el teksto de mi emsyon, solo dos enkorajamyentos no me paresen bastante para kontinuar…

I de otra parte, tuvimos  lunes el yom ashoa, i pensi mijor, en komemorasyon de este diya, de avlarvos oy de la konferensya ke ize el 19 de marso en el Sentro Komunitaryo de Paris, sovre la rezistansya espirituala de los djudeo-espanyoles de Paris basho la Okupasyon.

Komo yo no so haliz istoryano, de fakto mi konferensya fue sovre todo la meldadura de unos pedasos del livriko intitolado en franses En attendant l’aurore (Asperando el amaneser) eskrito en avril 1945 por José Papo, ke era durante la gerra el hazan del kal Berith Shalom en Paris.

Avril 1945, kyere dizir ke estamos despues de la Liberasyon de Paris, ama antes del kavo de la Gerra. Dainda no se save muy byen lo ke afito a los deportados djudyos, afillu si ya vimos fotos terrivles.

Kale saver ke los djudeo-espanyoles de Paris, en 1940, teniyan dos kales : el uno, el mas vyejo, se topava al numero 7 de la rue Popincourt, en la male ke yamavan « la petite Turquie » (la chika Turkiya) porke todos los djudyos del imperyo osmanli ke viniyan en Paris ivan a morar en esta male. El otro kal, avrido en los anyos trenta, se yamava Berith Shalom i se topava rue Saint-Lazare, en una otra male un poko mas rika. El haham de este kal era el Doktor Nissim Ovadia, i los hazanim eran Lazare Angel, selanikli, i Jose Papo, ke era de Serajevo .

En el kal de la rue Popincourt, los hazanim eran Chapat Mizrahi i Israel Razon.

En estos tyempos yo era muy chiko i no konosiya a esta toda djente. Ama despues de la gerra, en 1949, es el hazan Papo ke me aparejo para mi kumplimyento de minyan, es dizir ke lo konosi byen. Kontinuo de ser hazan en los anyos sinkuenta, ama despues tuvo un infarctus,  yene kontinuo de lavorar, ama su korason era flako i se muryo poko tyempo despues, bastante mansevo.

Yo no saviya nada de su vida durante la gerra, me la ambezi solo agora, kuando meldi su livriko Asperando el amaneser.

Vos kyero solo trasladar pedasos de este livriko, ke fue eskrito en franses. No va ser una traduksyon syento por syen fiel i literarya, vo sovre todo aprovar de darvos la idea ke keriya eksprimir el autor.

Para los ke entyenden el fransez, les kyero dizir ke se puede meldar este livriko sovre internet. Kale bushkar sovre Google kon los byervos José Papo En attendant l’aurore, i despues ir sovre el sityo rachelnet. Vash a kaer sovre una oja amariya intitolada Notice détaillée : kale abashar asta los byervos Version électron. Lire le document i klikar sovre Lire le document.

Papo empesa por kontarmos lo ke se paso en 1940, a la yegada de los Almanes, i mos ambeza ke el haham Ovadia reusho de fuirse a los Estados Unidos, ande se va morir de un atako del korason.

La asosyasyon kultuala sefaradita de Paris va ser dirijida por Leon Rousseau i el senyor Behar Parali.

I dunke agora empeso mi meldadura, estamos en tyempo ande los afferamyentos de djudyos ya empesaron. Agora es José Papo ke avla :

Malgrado la grande sekana ke empeso de apezgar sovre mozotros, las orasyones en el kal se azen kon regularidad i muncha ardor. Unos kuantos kapos de muestra komunidad, el prezidente el mismo, se ven ovligados de fuir Paris por modo de la situasyon. Munchos otros son tomadaos en los aferramyentos de masa kontra los gregos, internados en Drancy i deportados en Almanya. (Aki yo Edmond Cohen avro una paranteza : kuando Papo eskrive, dainda no se save ke los djudyos eran embiyados en Auschwitz. Se pensava ke se topavan en Almanya. Syerro la paranteza).

(…)

Konfiyamos la direksyon de muestra asosyasyon kultuala a los senyores Elie Danon (…) Robert Bahsi i Namer. El senyor Danon, asta esto poko konosido en muestra komunita, gana pishin la simpatiya de los del kal syendo su avyertura de korason i su lavoro sin deskansar para el byen de muestra komunita, i sovre todo para alivyanar la mizerya de muestros proves korelijyonaryos. Toma una parte muy aktiva en todas las direksyones, el es ke krea la kantina popular del Passage Charles Dallery, la Kaza de Kriaturas de Saint-Mandé, i munchas otras ovras. Kyero kontar aki en unas kuantas lineas komo el Senyor Danon se tomo atadijo para muestra Kultuala. En 1940, tuvo la desgrasya de pedrer su madre ke keriya muncho. Para el enterramyento, demando a la Kultuala de embiarle un haham. Yo fui yamado kon mi kolega Angel para dizir la orasyon. Despues de la seremoniya, fue tanto tresalido i esmovido por los kantes liturjikos, ke dechizo de venir mas akorruto al kal para oir muestros ofisyos.

Ansina se ato al kulto kon mas i mas ardor despues de aver sido tantos anyos aleshado, i fue yamado, a la demanda de los myembros del komité, prezidente de la Kultuala. Basho su prezidensya, el lavoro fue fruchiguozo. Fue ayudado por sus kolegas i por los senyores Isaquino Carasso i Henri Nissim, ke aviyan sido myembros del Konsilyo. Las fyestas de Hanuka, Purim, Simhath Tora, fueron organizadas en el kal de la rue Saint-Lazare kon muncho briyo, grasyas al ayudo de la mansevez i de los kantadores. Todos los kapos del djudaismo parizyano estavan prezentes en estas fyestas i diziyan ke para eyos era una grande alegriya de asistir a las solanidades de muestro rito.

Los aferramyentos mos tomaron uno detras de otro muestro prezidente Danon i el senyor Bahsi. El senyor Carasso tuvo de fuir la Fransya para refujyarse en Espanya ande muryo poko tyempo despues. El fiel sekretaryo, senyor Aranias, por el kual tengo una afeksyon filyala, ke aviya sido Direktor de la eskola de l’Alliance Israélite, ke se teniya kedado fiel a su lavoro desde el empesijo, tuvo de desharmos el tambyen para eskonderse.

La Kultuala se kedava de muevo sin kapos. El senyor Behar Parali, prezidente del kal, kontinuava de administrar la Kultuala kon su kolega del kal de la rue Popincourt, el senyor Robert Cohen, i tambyen los senyores Haïm Missistrano, Isaac Menaché, David Salmona i yo, komo reprezentantes de muestra kultuala (…) Kon una enerjiya sin enflakar ke merese todas las felisitasyones, el senyor Behar, desdel primer momento, izo su lavoro. Malorozamente, una denunsyasyon  lo tomo kon toda su famiya en el mes de marso 1944.

Poko tyempo despues, otros myembros fueron tambyen aferrados i deportados, entre los kuales los senyores  Menaché i Sasson. Era un mes antes de la Liberasyon.

(…)

La aktividad del Kal de la rue Popincourt

El lavoro ke izyeron durante toda la okupasyon los kapos del kal Popincourt merese una pajina a parte. Afillu si este kal se topava en la male la mas sekanoza i la mas aharvada de la kapitala, los ofisyos no se kedaron un solo diya. Sus fieles administradores, los senyores Robert Cohen, Maurice Benchoam i Bohné, izyeron un lavoro meresyendo todas las felisitasyones. Izyeron su dever verso sus ermanos desmazalados kon muncho korason i sakrifisyo, munchas vezes ayudados por muestro amigo H. Aseo. Este dever no se kedava solo de asigurar el buen kamino del kal, ama tambyen de rezolver todas las kuestyones sosyales ke se prezentavan. Teniyan de salvar seres umanos de kualkyer modo ke sea. El lavoro ke aziyan muestros kolegas de Popincourt ayudava muncho la direksyon de muestra komunita. Ama eyos tambyen, delantre la sekana ke aziya apesgar la Gestapo sovre todos, se vyeron ovligados un diya de abandonar su posto.

La Direksyon de la kultuala se topo estonses muy embarasada para topar, en este momente kritiko, djente mueva para azer las vezes de los ke se fueron Despues de yamadas  echadas por todas vandas a ombres de buena veluntad, topimos tres personas  ke se metyeron a la dispozisyon de muestra Kultuala para administrar el kal de la rue Popincourt. Fueron los senyores Samuel Missistrano, merkader onrado de la male, Nissim Levi, ke ya aviya sido administrador del kal, i Maurice Ventourero, mansevo i yeno de enerjiya, ke se okupava desde munchos anyos de varyas ovras de la male, entre las kuales la Hevra Kadisha, de la Ermandad, i tambyen del kal. Achetaron de azer sus muevos lavores kon muncho koraje, afillu la sekana.

(…)

En este mismo tyempo, el kal tuvo la grande desgrasya de ver aferrado por la Gestapo su solo i uniko haham i hazan, el senyor Razon, un vyejo de 75, ke se teniya kedado a su funksyon astal kavo (el otro hazan, el senyor Mizrahi, aviya sido rapatriado en Turkiya). En su lugar fue yamado komo hazan, el fiel direktor del Talmud Thora, el senyor Catarivas.

(…)

Mi  kedada en Drancy

Tuve el mazal de eskapar varyas vezes a las unyas de la Gestapo; (aki yo, Edmond Cohen, avro una paranteza : Papo avla solo de la Gestapo, ama en vedra era la polisiya franseza ke aferrava a los djudyos; me parese ke Papo teniya tan verguensa por la Fransya ke no se atrivyo de dizirlo; syerro la paranteza) Una primera vez, fue en avril 1941 (…) El sigundo diya de Pessah, la Gestapo vino a bushkarme en el kal mismo, rue Saint-Lazare . El korason apretado, le respondi ke no estava aki. Ize una chika orasyon i me fuyi por el kortijo, delantre de la nariz de los almanes, despues de tener dicho adyos a todos.

Eskapi una sigunda vez, kuando uvo el grande aferramyento de masa del onzen arrondissement.

En el mes de septyembre 1942, (…) fui aferrado i embiyado en el kampo de Drancy.

(…)

Del primer diya de mi yegada en Drancy, el shabath, apareji un ofisyo i todos izimos la orasyon kon ardor. En el kampo de Drancy en este tyempo no aviya ni haham ni hazan. Las orasyones eran dichas por el senyor Rozenzweig, famozo avokato de Paris, enprezonado en Drancy desde vente mezes. Pishin kuando ayegi, ize kon plazer su konosensya. Dechizimos de reorganizar los ofisyos i de dar chikas fyestas relijiozas.

(…)

En una sola semana de mi kedada en Drancy, tuve la okazyon de ver tres deportasyones de djudyos de Rumaniya. Ke trajediya!  Ke senas de sufriensa! Komo kontar este orrivle espektakulo ke mis ojos syempre veran. Syendo konosido en el kampo komo haham, es verso mi ke se presipitavan djente de toda edad, demandandome mi bendisyon a la ora de la ida. Myentres mi korasion era sangreando, myentres las lagrimas me suviyan a los ojos, me teniya de amostrarme korajozo, me teniya de konsolarlos, me teniya de dizirles mi konfiansa en el futuro i en sus proksimo ritorno. Ama komo kreer en esta piadoza mintira savyendo ke los Almanes tomavan mismo los hazinos, arrankavan de sus kamas a inkuravles para yevarlos en sedyas asta los vagones para beemot ke teniyan de yevarlos verso una muerte sigura.

Un diya, una vyeja de 85 se aserko de mi para bezarme las manos i demandarme mi bendisyon, dizyendome ke augurava de ver de muevo su ija i sus inyetos. Le arrespondi yorando ke si, los veriya de muevo. Povereta de mujer! su kreensya en el Dyo, la ardor de su fey, su aftaha i su konfyensa amostran toda la fuersa i la grandeza de Israel.

(…)

Me kedi 18 diyas en Drancy, i el 12 de oktovre fui liberado.

(Aki en su livriko José Papo mete un teksto ke no eskrivyo el mismo, ama el avokato Rozenzweig del kualo mos avlo antes, ke mos konta un Simhat Tora el 4 de oktovre, 8 diyas despues de la yegada de Papo en Drancy. Agora es Roznzweig ke avla).

…Los djudyos, en el infyerno de Drancy, kyeren selebrar la fyesta de Simhat Thora.

Arapando las paredes, suvyendo de una eskalera a otra, de un han a otro, un manseviko hassid bushka pratikantes para el ofisyo de la tadre . « Tenemos un sefer Thora! Ke mazal! » repeta sin kedar el hassid illuminado.

I fue un nes. Arriva, arriva arriva de un han de Drancy, salyo, por la veluntad de los esklavos a las kadenas invizivles, una kaza de tefilot.

Para pueder azer las orasyones, fue menester de asperar ke venga la noche. A la favor de esta larga noche sin estreyas, kon la luz de una unika kandela, en la sala yena de kreyentes,  José Papo empesa : Ata oreta ladaat.

(…)

Todos los djudys de Evropa eran reprezentados aya, a la ultima tabaka del han de Drancy. (…) Kantavan en un modo grave i melankoliko. Keriyan por tanto, komo al tyempo, kantar kantes de alegriya, ama gritos de dolor suviyan verso el syelo, gritos echados por estos umanos enkarselados komo beemot, i ke, en el kortijo,  arreyevavan la arapadura de kavesa ke avunsyava la ida verso el deskonosido, la ida sin esperansa de buelta…

José Papo, kon los hasidim arrekojidos alderedor de la Thora kantavan. I de este kante nasyo en la alma de los kreyentes el espiritu de la rezistansya  i la esperansa imprechiza, ama kuanto prometedora, de la salvasyon futura.

Ansina s’eskapa lo ke vos keriya meldar de lo ke eskrivyo el avokato Rozenzweig. Syendo ke su teksto esta en el livro de Papo, kyere dizir ke el tambyen se sovresalyo de Drancy.

I agora, antes de eskapar esta emisyon, vos kyero meldar otro teksto del mismo livriko, ama tambyen eskrito por otra ke Papo, la senyora Raich, ke lavorava por la Wizo i se okupava sovre todo de los viejos. Malorozamente no me keda bastante tyempo para meldarvos todo, i es pekado, porke es muy ermozo. Solo vos vo trasladar i meldar unos pedasikos; esta avlando del ospital Rothschild en 1943 :

Los vyejos son komo kriaturas : syenten kuando uno los kyere, i tyenen menester de ser amados. El senyor Papo es amado de eyos porke los kyere byen; pishin kuando ayega es arrodeado por todas sus grandes amigas ke korretean detras de el : el tyene una palavra para kada una, las konose por su nombre, las abrasa, parese azer a kada una una vijita personala.

(…)

Despues de medya ora, en kualkyer lugar ke sea, el animo de toda la sala se suvyo, kada uno toma de muevo konfiensa en el futuro, grasyas  a la bivez, a la simpatiya amostrada por el senyor Papo para todos.

(…)

Sin muzika, sin akompanyamyento, sin hadras, el senyor Papo salta sovre una meza. Su boz, ya la konosemos todos, ama nunka lo oyeré kantar  kon una tala yama, un tal korason ke aya.

Kanta en franses, en ebreo, en yiddish, en ruso, kanta el pais de nasimyento, las fyestas de famiya, i kuando eskapa yoramos todos…

Agora ya vino la ora de eskapar mi emisyon. Kon la okazyon del diya de la Shoa, tendremos todos un penseryo para estos giborim ke rezistyeron kontra la barbariya kon manos desnudas, ama kon un animo i un koraje ke kosto la vida a tantos i ke fuersa la admirasyon.

Asta el otro djueves, si kyere el Dyo!

Edmond Cohen