eSefarad Noticias del Mundo Sefaradi
Keridos amigos, apareji komo pude una emisyon sovre varyos djudyos nasidos en el siglo 19, ke trokaron la kara del mundo. Ama komo avlar de Einstein kuando no entyendo nada en la relatividad? De Freud kuando no entyendo nada en la psikonalizis? De Husserl kuando no entyendo nada en la fenomenolojiya?ets…I esto todo en djudeo-espanyol…Povereto de mi….
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
DJUDYOS KE TROKARON EL MUNDO
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes 4 de marso, de las dos i un kuarto asta las sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
Estos tyempos, en Fransya, oyemos mas i mas antisemites i antisyonistos (lo ke sozde no es la mizma koza) dizir de una sola boz ke los syonistos, kijo dizir los djudyos, governan el mundo a eskondidas. Todo lo ke se pasa en el mundo vyene de los Djudyos. La preva? El protokolo de los Savyos de Sion. En vedra es un falso echo por la polisiya tsarista, ama no embarasa, yene es una preva. Los djudyos (0,2 % de la povlasyon mundyala) governan el mundo.
Makari fuera vedra…Ama yo i vozotros, keridos oyentes, ya savemos ke malorozamente no es vedra. Yo ya se ke no governo a dinguno, es mi mujer ke me governa a mi, ama a esto se keda.
I por tanto, yene ay una koza de vedra en lo ke dizen los antisemites; no los djudyos en jeneral, ama es vedra ke algunos djudyos trokaron la kara del mundo, ke sin eyos seriya muy diferente de lo ke es.
Keresh nombres? Moshe Rabenu i Jesus, a eyos dos, trokaron el mundo asta oy, no tengo memester de apesgarme sovre la koza: a los menos tres milyardas de djente en el mundo se dizen monoteistos, inkluyendo los muzulmanes ke rekonosen eyos mizmos el rolo de Moshe (Musa) i de Jesus, dos djudyos, a la orijen del Islam.
Sin estos dos, Moshe i Jesus, no se a kualo asemejariya el mundo, ama lo ke es siguro, es ke seriya muy diferenrte de lo ke es agora.
Despues de estos dos, es siguro ke uvo otros djudyos ke tuvyeron influensa sovre la kara del mundo, penso por egzemplo a Baruch Spinoza.
Ama no es de estos vyejos djudyos ke vos kyero avlar oy. Oy vos kyero akodrar de unos kuantos djudyos de los siglos 19 i 20. Digo djudyos, en vedra munchos se konvirtyeron o se alesharon del djudezmo, ama todos nasyeron djudyos, i kada uno de estos o invento una koza, o la deskuvriyo, o invento una syensya. Oy vos kyero avlar de: Karl Marx, ke invento el marksismo, Sigmund Freud, ke invento la psikanalizis, Heinrich Rudolf Hertz, ke deskuvriyo las ondas ke serviran para la radyo, Emile Durckheim, ke invento la sosyolojiya, Albert Einstein, ke deskuvriyo la relatividad, Edmund Husserl, ke invento la fenomenolojiya, Gaston Bouthoul, ke invento la polemolojiya, i Jonas Salk, ke invento el vaksino kontra la poliomielitis.
Por siguro, pudyera avlarvos de munchos otros, ama dainda kon estos solos, me parese ke el mundo no uvyera sido lo ke es. Esto dicho, no tengo la entisyon de dizirvos ke el mundo es mijor grasyas a eyos. A la rovez, esto siguro ke uvyera sido mijor sin el marksismo, por egzemplo, ke asta oy izo muncho danyo.
Empesaremos djustamente por Karl Marx (1818 – 1883).
Nasyo en Treves (Rhenaniya) en una famiya djudiya. Su bispapu (Meyer Halevi Marx, lo ke me da a pensar ke era un Levy) era haham. Su padre, avokato, se konvirtyo al protestantismo por su lavoro, un anyo o dos antes del nasimyento de Karl. Su madre, nasida Henriette Pressburg, se konvirtyo un poko mas tadre, en 1825, i en mismo tyempo konvirtyo a Karl a la edad de 6 anyos.
Ama komo ya lo savesh, en vedra no solo Karl Marx tendra dinguna relijyon, ama, ensima ,va azer kontra la relijyon, «opium del puevlo» komo diziya, una de sus luchas las mas fuertes. I malorozamente, komo lo dishe aki en la emisyon ke ize sovre una syedra antisemita, el mismo eskrivyo kontra los djudyos, en ke veiya solo negros kapitalistos.
En privado, era antisemit i esto solo. Eskrive a su amigo Engels: « Este esyerkol de korespondante berlineze del Daily Telegraph es un cifut (youpin en franses, no se komo lo eskrivyo en alman) de alkunya Meier, paryente del proprietaryo del echo, un cifut ingles de alkunya Levy ».
No es menester de dizirvos ke no tengo una grande simpatiya para Karl Marx. Ama kale rekonoser ke el mundo no seriya lo ke fue, i puede ser mijor uvyera sido, sin Karl Marx. Milyones de djente muryeron por sus ideas, o achakes de sus ideas, i dainda oy es en Korea del Norte, ama tambyen en Kina, i en Amerika del Sur un pensador muy estimado.
Agora trokaremos de lakirdi i avlaremos de Sigmund Freud (1856 – 1939)
Sigmund Freud nasyo en Moravia, oy en Republika Tcheka, en una famiya djudiya vinyendo de Galicia.
Se aze mediko, es interesado por los lavores de Charles Darwin. A poko a poko se va interesar a la psikiatria. Se va estudiar en Paris serka de Jean-Martin Charcot. Se interesa a la isteria i a la ipnozis.
En 1896, Freud emplea el nombre de psycho-analizis i despues de psychanalizis para una manera de kurar la isteria bushkando ande los rekodros vyejos del hazino.
Vyene la muerte de su padre, i Freud va bushkar i topar en si mismo lo ke va yamar el komplekso de Oedipe, el ijiko kyere a su madre i es selozo de su padre. I su idea es ke es ansina para todos los ijikos.
Despues va lavorar sovre los suenyos, sovre los lapsus, i esto todo para bushkar lo ke kyere eskonder el fondo de la alma, lo ke Freud yama el subconscient.
Freud se aze mas i mas famozo, i su konsepsyon mete la seksualidad al sentro de todo.
Komo ya lo savesh, ay munchos savyos ke dizen desde muncho tyempo ke todo esto no es un lavoro sientifiko, i ke en jeneral Freud se yerro sovre kaji todo.
Lo ke es siguro, es ke kon la yegada de los nazis, Freud es ovligado de fuir de Austria i ke se va en Ingletyerra ande va morir en 1939.
Una koza es sigura, es ke afillu si es kritikada por munchos, la psikanalizis a trokado el mundo eya tambyen.
I agora pasaremos a Heinrich Rudolf Hertz (1857 – 1894).
Nasyo en Hamburg, dunke en Almanya. Ama el no se okupo ni de politika ni de filozofiya. El, su echo fue la syensya fizika. Profesor de fizika, se interesa al elektromanyetizmo i a los lavores, entre otros, de Maxwell.
En 1887 fragua un osiyador. No me demandesh kualo es, sepash solo ke lo fraguo, i grasyas a esta makina deskuvriyo el 15 marso 1888 las ondas elektromanyetikas en el ayre. Estas ondas agora se yaman los ondas hertzyanas, asigun su alkunya, i van a ser utilizadas para la telegrafiya sin ilo, lo ke yamamos oy la radyo.
De la mizma manera ke Cristobal Colon deskuvriyo Amerika sin saver lo ke aviya topado, de la misma manera Hertz , a un estudyante ke le demandava de kualo podriya servir su deskuvyerta, respondyo: «De nada».
Hertz se muryo en Bonn en 1894, a la edad de solo 36 anyos. Fue enterrado en el semetaryo djudyo de Bonn.
Es despues de su muerte ke Guglielmo Marconi, lavorando sovre las ondas hertzyanas, va inventar el primero telegrafo sin ilo, el empesijo de la radyo.
Se puede pensar ke si no uvyera sido Hertz, otro savyo uvyera topado las ondas unos kuantos anyos mas despues. Es vedra. Ama entremyentres, es Hertz ke las topo, i esta deskuvyerta permityo la radyo .
I agora vendremos a un djudyo franses, Emile Durkheim (1858 – 1917)
David Emile Durkheim nase en la sivdad de Epinal, de un padre haham, en una famiya ande todos fuerom hahamim sovre ocho jenerasyones, i el tambyen se deve de ser haham i por esto entra en una eskola talmudika. Ama se va kedar aya un anyo solo; no es travado por ser haham, ama por la filozofiya. Entra en la Ecole Normale Supériere, la mas grande eskola de Fransya, ande se amostra uno de los estudyantes los mas briyantes. De aya sale profesor de filozofiya. Lo ke lo interesa son las relasyones entre el ombre i la sosyeta, i el va deskuvrir ke en una sosyeta ay faktos independyentes de los individuos ke la komponen. Por egzemplo, se puede pensar ke el suisido es koza personala i intima. Portanto, las statistikas mos amostran ke el numero de djente ke se matan kada anyo en una sosyeta, una sivdad por egzemplo, es kaji el mizmo kada anyo.
Komo esto es posivle? Durkheim dize ke el fakto sosyal es una koza, i se deve estudyar komo una koza. Vyene de inventar la sosyolojiya.
La ovra de Durkheim es muy rika. No es kadal diya ke uno inventa mueva syensya. I no tengo menester de ambezarvos la importansya ke tomo la sosyolojiya despues de Durkheim.
De muevo se puede dizir ke sin Durkheim el mundo de oy no seriya lo ke es.
Tengo agora, kon muncha umeldad, de avlarvos de Edmund Husserl (1859-1938)
Deke dishe kon muncha umeldad? Porke vos vo avlar de un filozofo muy importante ke fundo una mueva filozofiya, la fenomenolojiya, ama no entendi kaji nada de esta filozofiya.
Solo vos diré ke Husserl nasyo en Moravia, agora la republika tcheka, en una famiya djudiya. Se konvirtyo al protestantismo en 1886, lo ke no le va servir muncho kuando van a venir los nazis.
Komo no entendi nada de su filozofiya, vos diré solo ke aprova de fraguar una filozofiya fundada sovre la sola koza ke sea sigura, el cogito ergo sum de Descartes.
Una koza ke kedo de Husserl es ke despues de el los filozofos, entre los kuales su elevo Martin Heidegger, ama tambyen Jean-Paul Sartre o Maurice Merleau-ponty, se an inspirado de su ovra.
I agora el mas konosido de todos, Albert Einstein (1879 – 1955).
Nasido en Ulm (ande Napoleon tuvo una de sus mas briyantes viktoryas) en una famiya djudiya, Einstein empesa komo una kriatura bovika. Empesa solo de avlar a la edad de tres anyos, i asta syete anyos, meldi, no se si es vedra, ke repetava syempre las mismas palavras komo una kriatura autista. Esto dicho, a la eskola se amostra un elevo intelijente para lo ke lo interesa, komo las matematikas, ama no kyere lavorar para lo ke no lo interesa, al punto ke va ser echado a la puerta del liseo a los 15 anyos. A los 16 aprova de entrar a la Eskola Politeknika Federala de Zurich, ama no reushe el egzamen de entrada. Esto todo para dizir ke los empesijos fueron yuches para muestro chiko Einstein ke va yene reushir de entrar un anyo mas despues en la Eskola, ama va tener muncha difikultad para obtener su siploma en 1900.
I despues no topa lavoro i se aze bastante prove, asta ke sea tomado en 1902, a la edad dunke de 23 anyos, en el Ofisyo de las Patentas de Berne. Tres anyos mas despues, en 1905, sale su artikolo famozo sovre la teoriya de la relatividad, en primero estrecha, i en 1916 sale un livro prezentando su teoriya de la relatividad jenerala.
No so yo ke vo pueder darvos a entender lo ke es esta teoriya. Lo poko ke puedo dizir es ke el espasyo i el tyempo tyenen relasyones en un espasyo de kuatro dimensyones, i ke tambyen ay un atadijo entre la materya i la enerjiya.
En 1919, un savyo, estudyando una estreya vyendose serka del sol, amostra ke los rayos de luz de esta estreya son travados por el sol komo una materya, i esto es la preva ke la teoriya de Einstein es djusta.
De este diya, Einstein vyene a ser muy famozo en el mundo entero, i va ser kuvyerto de onores, asta ke los nazis vengan al poder en Almanya. Einstein se va en Amerika, i aya va lavorar en Princeton. En 1939, a la demanda de dos savyos djudyos ke se espantan ke Hitler tope una bomba atomika antes de los otros, Einstein eskrive al prezidente Roosevelt para le los Amerikanos empesen de lavorar sovre esta bomba, lo ke van a azer. La ironiya de la istorya es ke Hitler impedyo a sus savyos de fraguar una bomba atomika, lo ke puede ser eran kapaches de azer, porke, disho Hitler, esto es una syensya djudiya. I es vedra ke el kapo de los savyos ke fraguaron la bomba amerikana es Julius Openheimer, ke era djudyo. Ama, komo ya lo savesh, kuando la bomba va ser pronta, los almanes ya fueron vensidos, i no es sovre eyos ke la bomba va ser echada, ama sovre los japonezes.
Sin Einstein, sin Openheimer, el mundo seriya diferente.
No me keda muncho tyempo para avlarvos de los dos ke kedan, vo ser kurto.
Gaston Bouthoul (1896 – 1980)
De su haliz alkunya se yamava Boutboul. Este djudyo es el mas poko konosido de todos los ke nombri asta agora. Por tanto, el tambyen invento syensya mueva kon su nombre: la polemolojiya. Polemos, en grego, es la gerra. La polemolojiya es el estudyo syentifiko i sosyolojiko de las kavzas ke mos dan la gerra. Ya vimos ke no sirve de nada de dizir ke la gerra no es koza buena, yene la djente aze la gerra. Deke? Puede ser ke si se estudya la gerra komo un fakto sosyal, se podra entender i de esta manera se podra azer lo ke kale para ke no ayga mas.
Malorozamente Bouthoul se muryo i dainda ay gerras. Ama no kale, komo se dize en franses, bashar los brasos. A la kontra, kale kontinuar su lavoro.
I agora vo eskapar mi emisyon dizyendovos djusto dos byervos sovre Jonas Salk (1914 – 1995)
Nasyo en New-York de paryentes djudyos venidos de Russia. El es ke invento en 1954 el vaksino kontra la poliomielitis, una hazinura ke aharvava sovre todo las kriaturas i las matava. Salk topo komo matar al virus i azer su vaksino kon un virus muerto. Es el primer vaksino kontra una hazinura por virus. Se puede dizir ke su invensyon salvo a miles de kriaturas i ke agora esta hazinura no egziste mas.
Lo ke kale saver es ke Salk no kijo tomar patenta sovre su invensyon, renunsyando a royalties estimadas a syete milyardas de dolares. Esto para ke su vaksino sea mas barato para los hazinos.
Komo ya vitesh, los antisemites tyenen razon: los djudyos, afillu si son tan pokos, djugan un rolo muy importante en el mundo.
Al djueves ke vyene, si kyere el Dyo!
Edmond Cohen
