eSefarad Noticias del Mundo Sefaradi
En muestros primeros anyos en Israel kaji no avía Shabad ke mos kedávamos en kaza.
Las vijitas de Shabad ande la parientez i los konosidos tenían lugar prinsipalmente en invierno. En los enveranos ívamos a la plaj de Mihmoret. Esto era para trokar un poko, ke en los días de la semana entrávamos a la mar en la plaj de Natanya, 5 minutos a pie de muestro apartamento. A vezes, al lugar de la mar ívamos a la pisina «Miramar», mizmo en Mihmoret, ke a mi me plazía muncho ke su nombre era en espanyol. Imajinávamos ke era la propriedad de uno de «los muestros».
No se si ansina era, ma en todo modo en la primera mitad de los anyos 70s en esta pisina se puedía oyir muncho turko mesklado kon ebreo i espanyol. Me akodro ke una vez oyimos una mujer gritando: «Tiré tiré, mósmor oldú behayay!» (Mira, mira, ya se izo kompletamente violeto). Toda la famiya mos pishimos de la riza, sin saver ke dos-tres anyos después también mozotros ívamos a avlar en esta manera…
Akeyos anyos no avían en los otomobiles ayre-kondisionados. El retorno de Mihmoret lo akodro komo una sufriensa. El aver ariento del otomobil estava de atabafar, i la siya me kemava la espalda, el popó i mis piernas por detrás. Asta ke suvimos a la otostrada i el ayre ke entrava de las ventanas ampesó a freskarme un poko, no pudía respirar.
Las demi-sezones eran los tiempos de piknik en la kampanya. Piknikes en lugares komo En-Harod, Aqua Bella, Sahne i lo mas en Ramat a-Nadiv, ke en muestro jargón de famiya se yamava «La guerta de Rochild», achakes ke en este park se topa la tomba del Barón Edmond de Rothschild. El piknik lo azíamos en una arvolería afuera del park, i después de komer mos ívamos a dar un paseo en el park, ke en la primavera i en el otonyo era yeno de rozas en diferentes kolores i golores.
No salíamos al kamino solos. Kaji siempre era kon las famiyas de la tant Suzi (prima ermana de mi madre) i su ermano Yusef. A las vezes vinía la famiya Lodrik (tambien primos de mi madre) de Tel-Tsur (mozotros dizíamos «Tel-Sur») o la famiya Yohay, Gelibolulús ke moravan en muestra kaleja, i tenían una sharküterí (botika de kezos, azetunas, pasturmás ets.).
Estos piknikes no eran piknikes de mangal – nunka asávamos karne. Trayíamos kon mozotros komidas ke se pueden komer yeladas, komo keftikas de prasa, guevos haminados, yaprakes, almodrote, chalí, piyás, sudjukes i muncha fruta.
Ay anyos i panyos ke no salgo a piknikes. Kuando morávamos en Estambol el pasatiempo de las fin de semana (Shabad i alhad) era ir a komer afuera: un día a un restorante bueno de pishkado en el Bosfor, al otro día, a un restorante bueno de karne. Aínda m’akodro de muestro restorante favorito, Ömür. Ayá tengo komido por la primera vez shnitsel vienés, una komida ke no era muy konosida akel tiempo en la Turkía. En esto, mis fin de semana oy en Israel paresen mas a los de mi parientes en Estambol antes de vinir akí. Mis parientes, en viniendo a Israel, fueron ovligados de abashar sus nivel de vida. En los anyos 70s no avían munchos restorantes buenos en Israel i los pokos ke avían eran muy karos. La kultura de salir a komer afuera (mas ke un falafel o karne asada ariento de pita) ampesó akí en los anyos 80s, kuando el sistem ekonómiko del payís se ampeso a trokar al kapitalizmo i los viajes a la Gresia, a la Italia i a la Fransia devinieron populares entre los Israelianos de la klasa mediana. Lo ke vieron ayá kijeron i en Israel.
Aldo Sevi
Ramat-Gan, Israel
Fuente: Ladinokomunita
