Los Eskritos de Zelda: LOS KALES D’ESTAMBOL: LOS KALES DE LA KOMUNIDAD ESHKENAZI D’ESTAMBOL

Zelda Ovadia, espesialista en lengua djudeo-espanyola, mos avlara en esta seksion sovre “LOS KALES D’ESTAMBOL”, aki mos va a komentar sovre todas las sinagogas de los distintos kuartieres de esta  antika sivdad, las desparesidas i las aktuales.

 

  
 

LOS KALES DE LA KOMUNIDAD ESHKENAZI D’ESTAMBOL

La komunidad eshkenazi d’Estambol ke era muncha mas grande de la komunidad djudia-italiana, de la kuala tratimos en muestro ultimo artikolo, tenia tres kales dos eyos ya fueron serrados i el treser ke es aktivo asta oy esta situado en Yuksekkaldirim, kaye muy serka del kuartier Pera, oy, yamado Beyoglu, ande se topa la famoza kaye Istiklal.
 
El uno de eyos, Bet HaKneset Tofrei Begadim, fue fondado por la Union de Shastres eshkenazis ke en yidish es Schil fun di Schneider, i de ayi  su nombre: Schneider Temple,Tofrei Begadim, en ebreo.
 
El shefe de la asosiasion, Mayer Shonman, era el shastre del palasio, ke avia sido galardonado por el Sultan Abdulhamit II por su distinksion en su lavoro. Este kal ke fue avierto a los servisios del publiko eshkenazi el 26 de Septembre 1894, se topava, en la kaye Felek, (el edifisio se topa asta oy dia) en el kuartier de Galata, muy serka de lo ke era la rezidensia de la renomada famiya Camondo.(Esta rezidensia fue transformada, pokos anyos atras en un apartotel de luso). En la entrada de la sinagoga, se puede ver asta oy la inskripsion en ebreo tomada del livro del profeta Yishayau ke dize:

«Ki Beiti Bet Tefila yikare le kol ‘haAmim»

«Ke mi Kaza se yamara  Kaza de orasion para todos los puevlos»

En segito a la mengua de los fideles ke vinian al kal Tofrei Begadim, i despues ke fue fraguado un muevo kal kon este mizmo nombre en Yuksekkaldirim, en 1960 el Schneider Temple de la kaye Felek fue transferado a la komunidad de los djudios de Edirne i la Trakya.

Malorozamente, esta singagoga, komo munchas otras, ya esta serrada desde largos anyos, kon grandes kavenas en sus puertas, por falta de fideles, de yehidim, ke algunos de eyos murieron, otros pasaron a bivir a otros kuartieres i munchos de eyos desharon el paiz.
 
Paralelamente al Tofrei Begadim de la kaye Felek, los djudios orijinarios de Austria ke avian yegado a Estambol i los eshkenazis mas aristokrates de la sivdad avian desidido de fraguersen un muevo kal ke yevara el mizmo nombre ke su «ermano mayor» Schneider Temple.
 
Este kal es una de las ovras del famozo arkitekto Gabriel Deteshi. Fraguado al estilo evropeo, el tiene una fasada muy somptuoza, el Ehal i la teva fueron konstruidos al estilo polako. Este kal es muy diferente de los kales sefaradis o romaniotes.

Oy tienen lugar ayi evenimientos kulturales, komo ekspozisiones o konsertos de muzika liturjika i esta avierto al publiko.

El treser kal eshkenazi,  Or Hodesh, fue avierto sovre la demanda del Gran Rabinato ke avia sometido una demanda a los ministerios adekuados en la kuala fue dicho ke la povlasion eshkenazi de Pera no tiene una eskola ni menos un kal ke les dara servisios relijozos. El fue fraguado, en 1897, en la kaye  Zurefa. En segito a la mengua de la povlasion eshkenazi esta keila fue pasada a manos de la komunidad djudia de los sefaradis- gurcis, (Gurcistan/Georgia).

Kurto tiempos despues el kal fue abandonado kompletamente i kon un permiso espesial ke fue dado al Gran Rabinato, el edifisio fue vendido.