LOS JUSTOS DE OTRAS NASIONES trezladado al ladino por Simon Geron

En el Jewish News de la prima semana de mayo avía un artikulo presentado por»Nathan Jeffay» tratando de 130 personas ke en no siendo Judios,salvaron a los Judios en tiempo del Olokosto i ensima de esto se fueron a bivir en Israel. Komo kaji todos los sovrebivientes no ay muchos ke están en vida hoy. Nathan Jeffay se fue a bushkar a unos de eyos viajando del Negev asta Haifa. Tenian muchas istorias a kontar.

[En mi Kibbutz en los Anios 1951-1953 avía uno de autoridad i no savia ke no era Judio.Me kontaron ke era un aviador de Croatia ke se desidió de bivir en Israel i en el Kibutz para ayudar al Puevlo Judio.Vide también un Saserdote de Scandinavia ke vino al Kibutz para ke le ensenyen el ebreo por su Tholojia.Lavorava al lado de mi en las mansanarias].

 En Israel en Jueves a las 10.00 de la maniana se oio la sirena i avía 3 minutos de silensio onorando a los ke se murieron en el Olokosto. Avian muchisimas istorias de eroismo en este pais chiko.La Resistensia Judia se onora en munchas partes del pais. Munchos vijitores topan una konneksion  entre La Resistensia de los Gerreros del Geto i el Establesimiento del Estado Judio. A esta djente les dan el nombre»LOHAMEY HA GHETO/Gerreros del Geto» i se topan mas en el Kibbutz. Sus fondadores vienen de Varsovia. Aki ay una istoria ke es menos konosida. Apartiene a los ke no son Judios i ke vinieron a bivir en Israel para ayudar. A través los anyos 130 personas ke salvaron Judios en tiempo de la Segunda Gerra Mundial avían tomado la desisión de bivir en Israel. Yo me fui del Negev asta Haifa para oír sus kuentos de koraje. Komo los sovrebivientes del Olokosto muchos de eyos no estavan en vida mas i kedavan apenas 13 personas.

«HESTER GRÜNBERG BOISSEVAIN»estava aki lo mas del tiempo. La enkontri en»KIRYAT TIVON» serka de Haifa.Me avlo de su famiya grande ke salvo a los Judios.Su tía salvo a dozenas de bebes metiéndolos uno a la vez en su sako de espalda.Su tío era bankero i pasava fondos de los Nazistos a los Judios eskondidos.avia también la istoria de sus parientes, ermanos i ermanas.  Sus roles empezaron en Marzo 1943,kuando el padre teléfono a su madre»Helena»i le demando de preparar la komida por unos invitados en la kasa de HARLEM/Hollanda.Esta noche vinieron ayi los»GOLDBERGS».Una pareja vieja kon la ija ke tenia kaji 30 anyos.Venian de la Russia, traveseando la Finlandia i Alemania para topar seguridad.Vinieron para la sena i se kedaron ayi dos anyos i medio.Por un tiempo esta famiya dio refujio a un dentista viejo.El padre de Boissevain estava en la Resistensia i lo mataron por sus aktividades. La madre tuvo ke bushkar alimentos i toda la famiya ayudo a los fujitivos Judios. En 1960 Boissevain tenia 27 anyos i se merko un bilieto de ida solamente tomando el vapor indo a Haifa.Lavoro en primero por dekadas en los Kibbutzim i después se instalo en su kasa en KIRYAT TIVON.Su madre Helena se kedo en Hollandia i venia a verla muy frekuente a Israel.En 1980 eya kon su marido resivieron la Medalya de Onor en YAD VASHEM.Bivio asta la edad de 97 anyos.La ija se avía kasado kon un Judio i se konvertio al Judaísmo.Ma munchos de los ke se fueron a Israel se kedaron Kristianos.

«JAROSLAWA LEWICKI»avia bivido en Russia por dekadas  basho el Rejime Kommunisto ke era kontra la relijion.La sivdad ande bive oy es un kontrasto grande i eya dize»Aki en Haifa ay 3 relijiones.La Judia,Musulmana i Kristiana. Me vo a la iglesia kon el saserdote Ukrainiano i ninguno me toka. Tenia 5 o 6 anyos kuando traia provisiones al Geto Judio.Tenia ke pasar delantre las Guardias Nazistas sin ke me vean.Los Alemanes no harvavan a las kriaturas.Harvavan a mi madre i esto me dava espanto.En nuestra kasa se eskondían Judios ke kaji fueron aferrados.Un día kuando mi padre eskondió a un chiko debasho de la sofa,este ijo se metió a jugar con un jugete de soldado.Justo ayi estava un soldado Alemán verdadero.»

Lewicki vino a Israel en sirkonstansias diferentes de Boissevain.Vino por razones ekonómikas i no por el idealismo. En 1989 uno ke ya lo avía salvado»Avraham Shapiro» la invito a Israel para enkontrarse kon eya después de 5 dekadas.Se fue a YAD VASHEM i resivio la medalya de onor. La djente ayi le demandaron en ke estado estava la ekonomía en Russia i eya les disho ke era mala.Sus parientes estavan muertos i eya oio de un plano de ayudo para la djente komo eya ke avían salvado vidas i ke bivían en Israel.

«ELENA DOLGOV»ke bive en Yerushalayim avla de la persona ke la salvo en Belarus. Se izo amiga i kompanyera de kasa en el Estado Judio.En tiempo de la Gerra,»GALINA IMSHENIK»i su marido un saserdote,avían eskondido a Dolgov,una kriatura Judia.Era peligroso para eya de avlar en Yiddish i eyos le ensenyaron un poko de Russo para salvarla.La Gestapo penso ke eran sus parientes.En 1992 se fue para bivir kon Dolgov.I eya le ayudo asta su muerte en 2011.Kompartieron un apartamento por 19 anyos en Yerushalayim. Selebraron enjuntos las Fiestas Judias i Kristianas.

«PEOTR SANEVICH»era el kavzo ande se tornava un akto bueno por el otro en ospitalidad.El konstruyo un lugar para eskonder a 2 Judios mansevos en una ferma en Ukraina.Savia ke era peligroso porke al lado de su ferma una otra ferma fue kemada por aver echo lo mismo.Sanevich oio nada de los Judios ke avía salvado, por kaji 5 dekadas.Kuando kaio el Union Sovietiko, se metió a azer investigasiones en la Embasada de Israel en 1993.La Embasada lo medio en kontakto con  BUZYA i DAVID,ke el los avía guardado por 2 anyos. Sujeraron ke se vaiga a Israel kon su mujer OLGA i la ija ROSA,la mas manseva de las 6 kriaturas. Se desidieron de bivir en Beer Sheva ande bivia  David.

«YAEL ROSEN «una Israeliana lavorando komo voluntaria en el ayudo de Los Justos De Otras Nasiones,se fue a Israel para meterse en kontakto kon esta djente.Fue un privilejio a eya de konoserlos.Eyos avían metido sus vidas en peligro para salvar Judios.»Era dize»Todo lo ke se aze para eyos es muy poko.»