eSefarad Noticias del Mundo Sefaradi
En el Jewish News de esta semana,el Rabino Raymond Apple tenia un artikolo sovre la Imigrasion Judia mostrada a la rovez.
En lugar ke se vaigan a Ingletierra los Imigrantes Judios, salian de Ingletierra i se ivan a otros paises. Lloyd Gartner, un professor de la Istoria Moderna en la Universidad de Tel-Aviv eskrivio un livro titulado «The Jewish Immigrants in England.1870-1914». En este livro se avlo de 5 Movimientos diferentes tomando lugar.
GRUPOS DIFERENTES DE IMIGRANTES JUDIOS DE INGLETIERRA.
1] Indo en direksion de Amerika.
2] Indo a la Australia i Mueva Zelanda.
3] Indo a Sud Afrika i Rodesia
4] Indo a la Rusia oLa Union Sovietika.
5] Indo a Palestina o Israel.
El imigrante Judio djugo un rolo grande en kada lugar ke metio sus pies. Ay portretos de Pionieros Judios ke dsveloparon los paises i krearon komersios grandes. La razon detras no fue siempre la persekusion. Era el espirituo de aventura. La Rusia komo destino mos sorprende muncho. Aki se trata de Judios de la Evropa del Este ke se fueron en primero a Ingletierra i despues se tornaron atras. En Ingletierra, disho el Rabino, ke en su tiempo komo Rabino de la Sinagoga de Hamstead en Londra vido a uno ke tenia el nombre Solomon London. Su famiya venia de la Evropa del Este, i se topo tornando atras a la Evropa del Este. A eyos los konosian ayi komo djente viniendo de Londra.
Del otro lado los imigrantes Judios de Ingletierra indo a los paises ande se avla el Inglez, no tenian difikultad aparteniendo a la misma kultura. Trusheron kon eyos el Inglez komo lingua i los Prinsipios Britanikos Del Sistem De Governo ke era el «Westminster». El lien kon la Korona kontinuava. La rompida de Britania kon Los Estados Unidos segun Sir Winston Church, tomo la forma de los Britanikos i los Amerikanos siendo 2 nasiones separadas, teniendo la misma lingua en komun.
En la Palestina de antes i en el Israel de oy, los Judios Britanikos ayudaron a krear una sosiedad mueva. Ma los Israelianos ven a kada uno ke avla Inglez komo un Amerikano.
Yegando al kapitolo de la Australia kon kualo se identifika el Rabino, dize ke desde la bushkeda del oro se fueron ayi Judios de munchos paises. En los ultimos tiempos munchos eran los sovrebivientes del Olokosto. Tambien avian los Sefaradim, los Israelianos, Sud Afrikanos i Rusos. En siertos lugares la sosiedad era divizada entre los Australianos del pais i los «Yidden». Los ke se ven komo Britanikos oy son muy pokos. [Yo kuando vine aki no tenia un problem de lingua. Lo ke me harvava mas en la kara era ser vistos komo un estranjero. Mos yamavan «Wogs» New Australians» ets.komo si no aparteniamos a este lugar.]
La Mueva Zelanda es mas Britanika ke la Australia.
El livro mos da una idea sovre los Judios en el mundo.
Tradusido por Shimon Geron, Sydney
11/10/2013
