eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre » LOS KALES D’ESTAMBOL» en partikolar sovre “LOS KALES DE LAS IZLAS”, aki mos va a komentar sovre todas las sinagogas de los distintos kuartieres de esta antika sivdad, las desparesidas i las aktuales.
LOS KALES DE HEYBELIADA I BURGAZ
EL KAL DE HEYBELIADA
Segun lo fue en las diversas partes de Estambol en las izlas tambien el numero de djudios ke vinian a pasar el enverano pujo kada anyo mas i por konsekuensa, en el mez de Septembre 1947 fue tomada la desizion de fraguar una kal sovre el terreno ke fue merkado por el Sr. Jozef Bozaldo ke avia echo dono de 10.000 liras tambien, para su konstruksion.
Aun ke los abitantes djudios de Heybeli, segun era yamada esta izla en kurto, avian echo fuerte presion para aprezurar la konstruksion i terminarla asta las fiestas del anyo sigiente, kere dizir en 1948, finalmente la sinagoga aktuala de Heybeliada fue avierta a los servisios del publiko, dia de alhad, el 10 de Djunio de 1956.
A la seremonia de este kal ke fue yamado Bet Yaakov avian partisipado el Gran Rabino de Turkia, rav Refael Saban, miembros del Komite del Bet Din, reprezentantes del komunidad djudia d’Estambol ansi ke reprezentantes del Komite Exekutivo de la izla.
EL KAL DE BURGAZADA
En sus rekuerdos, el Sr. Lemi Hara, ke dio servisios a la komunita djudia d’Estambol,voluntariamente, el eskrivio, entre otras:
«El numero de los djudios ke vinian a Burgaz en los anyos 50 era muy chiko i para las orasiones del Shabat eyos se arekojian en una de las kazas. La desizion de fraguar una sinagoga fue tomada entre 4-5 personas, avlando en la kaye, en el mizmo lugar, onde mas tadre fue konstruida la sinagoga.A los prinsipios vinian a la izla entre 50 a 60 famiyas para los mezes del enverano. La konstruksion de la sinagoga se posibilito kuando el numero de las famiyas avia yegado a 360. Es entonses ke fue dado el permiso para la fragua del kal.»
En este kal ay 120 lugares, ma siendo ke en los dias de fiesta el numero de los yehidim ke vienen para azer sus orasiones yega a 140-150 personas se adjustan siyas.
En dia de Kipur de 2003 esbrocho un fuego en la sinagoga i sus entornos ke fue amatado rapidamente sin ke sean kavzados grandes danyos. Los Sifrei Tora no fueron tokados i dinguno de los yehidim no fue ferido.
Este es un nes, un mirakolo de dia de Kipur.
