eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre » LOS KALES D’ESTAMBOL» en partikolar de “LOS KALES DEL BOSFOR”, los desparesidos i los aktuales, a lo largo de las kostas del Bosfor, el estrecho ke konekta la Mar Marmara kon la Mar Preta.
LOS KALES DE YENIKÖY I ORTAKÖY
Siendo ke la kosta evropea del Bosfor era mas serka al sentro de la sivdad i a los sentros komersiales, del punto de vista de komunikasion, no teniendo menester de uzar dingun veikulo por mar, fue mas dezvelopada sea del punto de vista ekonomiko i sea del punto de vista de su povlasion, en komparasion kon la kosta asiatika.
A la vista ke en Bebek, uno de los sitios mas apresiados del Bosfor, existia una sinagoga en el siglo 19. Segun el viajador turko Evliya Çelebi (Chelebi), djudios ke les plazia pasatiempos i muzika vinian a Arnavutköy a pasar los mezes del enverano. En un ferman del anyo 1836 notado en los rejistros ofisiales, es dicho e ntre otras, ke la komunidad djudia de Arnavutköy resivio un permiso para la restorasion de la sinagoga. Este kal, komo munchos otros, kon el tiempo fue abandonado por la mengua de djudios ke yegavan a este sitio i en fin fue transformado en ruinas.
Malgrado ke nunka existio una komunidad djudia permanente en Yeniköy, este pitoresko kuartier del Bosfor, algunos de los djudios rikos de Estambol vinian a pasar ayi los mezes del enverano. Ya es savido el Konde de Kamondo tenia ayi una rezidensia i ke en 1870, kon su finansamiento fue konstruida una chika sinagoga ke es avierta asta oy dia, en los dias de Shabat i de las fiestas, grasias a los djudios ke pasaron sus chikez en Yeniköy i ke oy traen a sus ijos i inyetos: para eyos este kal es un pedaso de sus vida i un kantoniko nostaljiko.
Kada uno de entre mozotros ke vijito Estambol, seguramente ke yego tambien a la lokalidad de Ortaköy ke kon sus restaurantes i kafes al bodre de la mar i sus vendedores ke ekspozan sus merkansias, de mil modos i kolores, atrayen a diezenas de miles de turistas al anyo.
Segun istoriadores i viajadores, djudios ya bivian en esta perlizika del Bosfor, ainda en la epoka del Imperio Bizantino. Uno de eyos, Eremya Çelebi , apunta ke en la rejion de Ortaköy ya se avia formado una chika komunidad de djudios de una alta klasa del punto de vista sosial i ekonomika.
A la vista ke en el siglo 16 avia en Ortaköy i sus entornos 11 kuartieres djudios i tres kales. El Konak o sea la rezidensia de Don Yosef Nasi, sovrino de Dona Gracia Nasi, ke fue nominado komo Duke de Naxos por el Sultan Selim II, se topava en la rejion de Belveder, en Ortaköy.
La povlasion djudia de este «kazal» avia pujado, prinsipalmente, en segito a la yegada de los djudios ke bivian en el Bedesten, en la sivdad i ke avian kedado sin moradas komo konsekuensa del grande fuego ke avian desbrochado ayi en 1618. De fermanes ke se topan en los rejistros ofisiales de la epoka del Imperio Otomano mos ambezamos ke el kal de Ortaköy, Etz ‘ha-Hayim (Arvol de vida), fue kemado en 1703 i 1813 gravamente, por fuegos ke desbrocharon ayi, i le kavzaron grandes danyos. En el fuego de 1813 el kal fue transformado en ruinas. Resiviendo permisos de las autoridades edekuadas el kal fue restaurado despues de kada fuego. En 1915, sovre el dono de Eliyau ben Yitshak Kamhi la puerta de entrada fue ancheada i sostenida por dos grandes kolonas.
Lo ke kedo del ultimo fuego ke desbrocho en esta singagoa,, en la noche de, 1 de Oktobre 1941, Erev Kipur, a la vilya del dia de Kipur, fue solamente el Eihal ke era de marmol i ke oy esta en la guerta del kal, komo monumento, para azer akodrar a todos los dias pasados i la istora de esta sinagoga.
El kal Etz ‘ha Hayim, esta kontinuando a dar sus servisios al publiko, en el edifisio ke en el pasado sirvio de Bet Midrash.
La sinagoga ke desde la primera vez ke fue konstruida, nunka troko su sitio, esta situada oy en la kaye prinsipal de Ortaköy. En el 27 de Noviembre 1960, Etz ‘ha Hayim fue proklamada por las autoridades de las antiguidades i monumentos de Estambol komo «edifisio istoriko ke deve ser prezervado».
Etz ‘ha Hayim es una sinagoga muy aktiva i en desparte de las tefilot, las orasiones de dia de Shabat, eya es avirta al publiko djudio ke viene a kumplir su dover relijiozo en los dias de fiestas tambien.
