eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre » LOS KALES D’ESTAMBOL» en partikolar de “LOS KALES DEL BOSFOR”, los desparesidos i los aktuales, a lo largo de las kostas del Bosfor, el estrecho ke konekta la Mar Marmara kon la Mar Preta.
LOS KALES DEL BOSFOR
Introduksion
El Bosfor, uno de los lugares mas ermozos, sino ke el mas ermozo de Estambol, es el estrecho ke konekta la Mar Marmara a la Mar Preta (Karadeniz en turko) i ke desparte esta sivdad en dos, de manera ke la una kosta se topa en el kontinente evropeo i la otra en el kontinente asiatiko, por konsekuensa de lo kualo Estambol es tambien la unika sivdad del mundo situada en dos kontinentes.
Malgrado la fragua masiva de oy, en sus kolinas vedres, el Bosfor, desha ainda oy maraviyados a los a los viajadores ke yegan a esta sivdad por primera vez i azen un tur kon las naves ke van i vienen de una kosta a la otra, por la ermozura natural alientro de la kuala se entrelasan los palasios de Topkapi, el primer a la entrada del estrecho, ande la mar Marmara se abrasa kon las aguas del Bosfor; ansi ke los palasios de Dolmabahche (Dolmabahçe), Beylerbeyi, Çiragan, oy otel gran luso, Yildiz, situado sovre una de las kolinas de la kosta evropea, i Küçüksu, ke es un «palasyiko», i las somptuozas forteresas, en kada una de las kostas: Rumelihisar en la parte evropea i Anadoluhisar en la parte asiatika. Todos edifisios istorikos algunos mas antiguas i otros mas resientes, son algunos de los testigos mudos ke mos dan una chika idea solamente, de lo ke era el immenso Imperio Otomano.
Komo rezultado de la urbanizasion, se puede ver oy, a sus lado, la fragua moderna ke esta trokando de manera muy diferente de la antigua i ke es el rezultado de la urbanizasion, fenomeno ke se esta dezvelopando en todas las partes de mundo i de Turkia tambien.
Los 2 pontes: Fatih Sultan Mehmet (Sultan Mehemet el Konkistador) i Atatürk, konektan las dos kostas, lo ke fasilita el pasaje de una parte a la otra kon otos o otros veikulos. En epokas anterioras, i por de pontes el pasaje de una kosta a la otra (i en este kavzo de un kontienente al otro) se azia por medio de barkas i mas despues por medio de vapores, chikas naves ke azian parte del panorama global del Bosfor. Oy estos vaporikos, ya son naves mas grandes i mas komodas, kon una velosidad muncha mas alta ke la de sus ermanikas chikas. Eyas son uzadas, prinsipalmente por turistas, por sivdadios estambollis i de otras partes de Turkia i por ex-estambollis, komo yo mizma, ke nunka se artan de ver i admirar la ermozura de esta sivdad ke es Estambol.
De mizmo ke djudios se avian aresentado i formado mal’les en las diversas partes de Estambol, ke asta 1923 fue tambien la kapitala del Imperio Otomano, algunos de eyos avian fiksado sus moradas a lo largo de las kostas del Bosfor ande bivieron asta las primeras dekadas del siglo 20. No ay menester de sinyalar ke ande ay djudios ay tambien kales…
En la kosta evropea del Bosfor ke era mas apresiada, puede ser ke tambien por la fasilidad ke se puedia yegar a todos sus sitios por tierra, sin tener menester de viajar kon los vaporikos, indimas en los mezes de invierno, desde la metad del siglo 19, i muy probable ke antes, i asta los prinsipios del siglo 20, se topavan en Büyükdere, uno de los lugares mas famozos del Bosfor, las embasadas de diversos paizes, rezidensias de sivdadinos de paizes ajenos i tambien preferado komo sitio de rekreasion por los rikos de Estambol ande vinian a pasar los mezes del enverano.
Asta los anyos 1900-1907 avia en Büyükdere una chika komunidad djudia i segun un artikolo ke aparesio en el jurnal El Tiempo, anyos atras, los djudios ya avian mizmo merkado un terreno para la konstruksion de una sinagoga, ma esto nunka fue realizado.
Segun el livro del haham Eliezer de Toledo, Mishnat Rebi Eliezer Toledo «Oreh Hayim ‘ha yar Siman, es notado ke a los prinsipios del siglo 19 existia en Bebek, ke es konsiderado komo la perla del Bosfor, una chika sinagoga.
