Los Eskritos de Zelda: MENASHE BEN ISRAEL

Ver todos los artículos de esta sección

MENASHE BEN ISRAEL

Menashe Ben Israel nasio el 24 de November 1604 en la sivdad La Rochelle, en Fransia, a una famiya de konversos ke a kavza de las persigisiones de la Inkizision se avia fuyido de Portugal. En su chikez el fue edukado komo kristiano, kon el nombre de Manoel Dias Soerio, ma su famiya torno al djudaizmo despues de averse aresentado en Amsterdam, Holando, en el anyo 1610.

El fue embiado a estudiar andel Haham Hayim Uziel, orijinario de la sivdada Fez, en Maroko, ke era el rabino de la komunidad djudia i de la sinagoga Neve shalom , en Amsterdam. Siendo un muy buen elevo, a la edad de 15 anyos el ya dava darushes (sermones) a los yehidim de la komunidad i a la edad de 17 anyos ya avia eskrito su primer livro “Safa Brura” (Lengua Klara). Despues de la muerte de su maestro, Rabi Uziel, en 1622, kuando tenia solamente 18 anyos, el fue nominado komo su suksesor, al posto de de rabino de la sinagoga Neve Shalom. Uno de sus elevos fue Baruh Spinoza.

A la edad de 20 anyos el se kazoo kon Rahel Soeiro, desendiente de la famoza famiya de Yitshak Abravanel. De este kazamiento les nasieron una ija i dos ijos.

Ben Israel no se kontento kon sus estudios rabinikos sino ke ancheo sus konosensias en diversos kampos mas, entre eyos las sensias. El ato buenas relasiones kon intelektuales djudios i non djudios en los diversos paizes de Evropa i eskrivio livros en diversas lenguas, entre eyas el ebreo, latin, espanyol, portugez i inglez. Sus livros fueron imprimidos en la imprimeria ebrea ke el avia fondado en Amsterdam, en 1627. A lo largo de los anyos la sivdad se transform en uno de los sentros mas importantes para la publikasion de livros de las komunidades djudias en la Diaspora. En 1632 el rabino Ben Israel publiko la primera parte de su ovra maestro, “El Conciliador”, ke fue eskrita en espanyol – lengua latina ke podia ser entendida por munchos, prinsipalmente por la iglezia. El buto del livro era de aserkar el mundo kristiano al djudaizmo, bushkando de esta manera de yegar a un entendimiento, i provar a menguar la enemistad kontra lo djudios. La segunda i tresera parte del livro fueron publikadas en 1641 i 1651.

Fuente: turkisrael.org

Zelda Ovadia Salinas, espesialista en lengua djudeo-espanyola, mos avla en esta seksion sovre distintos temas ke tokan a la istoria i a la kultura sefaradi.