eSefarad Noticias del Mundo Sefaradi
Ver todos los artículos de esta sección
EL KAL “AHRIDA” EN ESTAMBOL
El foburgo de Balat, ke su nombre proviene de la deformasion de la palavra Palation (palasio en grego), i es situado a la oriya de del Halic (El Kuerno de Oro o sea La Corne d’Or) en fransez, fue una de las prinsipales lokalidades povladas por djudios en Estambol: Balat djuntos kon Haskoy, eran las dos malles djudias de esta sivdad, en las kualas se avian aresentado los djudios ekspulsados de Espanya, en 1492, i resividos al Imperio Otomano por el Sultan Beyazit II.
El mas antiguo i famozo kal de esta lokalidad es el de Ahrida, ke fue fraguado por romaniotes orijinarios de la sivdad de Ohrid, en Makedonia, ke en akeya epoka azia parte del Imperio Otomano. Despues de la yegada de los djudios ekspulsados de Espanya i a lo largo de los anyos, los romanyotes se asimilaron a eyos i las orasiones en el kal Ahrida empesaron a ser echas al uzo de los sefaradis.
En segito a uno de los fuegos ke avia danyado seriozamente este kal, sovre un ferman del Sultan publikado el 10 de Mayo 1694, el fue renovado, i segun dokumentos, fue restorado en los siglos 18 i 19 tambien. En desparte de ser el mas antiguo, Ahrida es el mas ermozo i somptuozo kal de Balat. El atraye la atension de sus vijitadores , prinsipalmente, por la forma de la teva, ke es muy diferenta de las tevas klasikas ke konosemos. Eya fue konstruida en forma de proa de nave, ke mirandola de profil mos aze akodrar la Arka de Noah, aun ke segun otra version, eya es el simbolo de las naves ke trusheron a los djudios ekspulsados de Espanya al Imperio Otomano.
Ay ken pensa ke esl falso Mashiah, Sabetay Sevi, ke avia vijitado en Estambol, Ahrida fue el uniko kal de esta sivdad ande avia dado un sermon.
Una de las mas importantes seremonias ke tuvo lugar en esta sinagoga fue la selebrasion de la viktoria de la armada turka, en la gerra entre el Imperio Otomano i Rusia. El 18 de Mayo 1877, el Sadrazam (Primer Ministro) Ibrahim Ethem Pasha i otros miembros del governo, partisiparon a la orasion espesiala ke tuvo lugar en Ahrida kon okazion de esta viktoria.
Durante lavoros de reparasion ke fueron echos a los prinsipios del siglo 20, debasho del kal fueron deskuviertos manuskritos eskrtios sovre pargamino ke fueron eskondidos ayi, djuntos kon Sifrei Tora (rolos de la Tora). Siendo ke las kachas estavan arazgadas, fue muy difisil saver en ke anyo fueron eskritos. Segun evaluasiones, es muy probable ke los djudios ekspulsados de Espanya los trusheron kon si, a sus yegada al Imperio Otomano.
A la vista, en uno de los anyos ke el budjeto de la komunidad djudia estava en apreto, estos manuskritos fueron vendidos a un rabino ke avia yegado de Viena a Estambol. Mas tadre eyos fueron vendidos por la komunidad djudia de Viena, en kontraparte a una muy grande suma, a Estados Unidos i agora eyos se topan en una de las bibliotekas de este paiz.
En konformidad kon una desizion de la Autoridad para la Proteksion de Bienes Kulturales, publikada en el jurnal ofisial de Turkia, el 18 de Djunio 1989, la sinagoga Ahrida fue proklamada komo edifisio istoriko ke deve konservado komo trezoro kultural.
Unotro kal de Balat es el de Yanbol, fondado por djudios ke avian emigrado a Estambol, ainda en la epoka del Imperio Bizantino, de la sivdadika Yanbol, en Bulgaria. Esta sinagoga tambien fue rekonstruida en el siglo 18 i eya tambien fue proklamada komo edisifio istoriko.
Estas dos sinagogas, Ahrida i Yanbol, dieron sus servisios a los abitantes djudios de Balat, en sus dias de splendor. Kon el tiempo, munchas famiyas desharon esta malle, para ir a bivir en otros kuatieres komo la Kula, Galata i Pera. De esta manera Balat i su “vizina” Haskoy, se vaziaron kompletamente de sus moradores sefaradis ke bivieron ayi unos kuantos siglos.
El kal de Ahrida, ke a su entrada tiene tambien un ermozo patio, es avierto a los yehidim los dias de Shabat i durante las fiestas,aun ke para vijitarlo ay menester de permisos espesiales.
Fuente: turkisrael.org
Zelda Ovadia Salinas, espesialista en lengua djudeo-espanyola, mos avla en esta seksion sovre distintos temas ke tokan a la istoria i a la kultura sefaradi.
