eSefarad Noticias del Mundo Sefaradi
Ver todos los artículos de esta sección
LA KULA DE GALATA
Moshe David Gaon
Moshe David Gaon, una de las figuras mas importantes del djudaizmo sefaradi en Israel, eskrivano talentuozo, poeta, istoriador, jurnalista, instruktor i bibliografo, konsakro munchos anyos de su vida a la investigasion de la komunidad sefaradi en Erets Israel, en partikular, i de los djudios de los paizes del Oriente en jeneral. M.D. Gaon nasio en 1889 en la sivdad de Travnik, Bosnia, en los primeros anyos ke se transformo en una kolonia Austro-Hungara. Sovre las rayizes de su nombre de famiya el eskrivio en su livro «Yehudei ‘Hamizrah be Erets Israel» – Los Djudios del Oriente en Erets Israel:
«El nombre Gaon no es un nombre komun i es apropriado a personas ke se distingen en el kampo spiritual i son dotados kon altos talentos. El nombre Gaon era un titolo akordado en Babilonia a djente ke tenian una edukasion i instruksion muncho mas alta ke otros. Es muy posible ke, a lo largo de los anyos, algunos miembros de los Gaonim pasaron a bivir a Espanya, i ke kon el tiempo el titolo Gaon se transformo en alkunya.»
Despues de aver terminado sus estudios en la yeshiva i el liseo de su sivdad natala, a la edad de 18 anyos Gaon partio a Viena para estudiar en la Universidad de esta sivdad. En mizmo tiempo fue aktivo en organizasiones Bar Giora i Esperansa, fondadas por los estudiantes djudios de esta sivdad. En 1909 yego a Erets Israel, estudio en el Bet Midrash «Ezra» , i durante la I Gerra Mundiala, reusho a terminar sus estudios en el Bet Midrash para maestros, basho la direksion de David Yelin.
Al terminarse la gerra, anyos en los kualos sirvio en la armada turka, Moshe D. Gaon fue yamado a ensenyar en el Talmud Tora ‘HaGadol, i dar kursos de ebreo en la sivdad de Izmir, en Turkia. A su retorno de ayi el fue nominado al posto de sekretario del buro de prensa de la Organizasion Sionista. En 1928, el partio, djuntos kon su famiya, a Buenos Aires, komo maestro de ebreo. A su retorno de este viaje el okupo el posto de sekretario jeneral de la Komunidad Sefaradi de Yerushalayim i en mizmo tiempo el fue korespondiente de munchos jurnales en djudeo-espanyol ke aparesian en akeya epoka, entre eyos, «El Avenir» i «La epoka» en Salonik; «‘haShofar» en Sofia i «El Djudio» en Estambol. El kolaboro tambien kon un grande numero de jurnales ebreos en Palestina i en el estranjero.
En 1928 el publiko el primer volum de su muy remarkable ovra «Yehudei ‘Hamizrah be Erets Israel” (Los djudios del Oriente en Erets Israel), en la kuala deskrive a las mas grandes figuras del djudaizmo sefaradi i oriental en Palestina desde la epoka de la Kneset Gedola i asta muestros dias. El segundo volum ke kontiene 758 pajinas fue publikado en 1937. Esta ovra monumentala puede ser konsiderada komo un evenimiento muy importante en la literatura ebrea moderna. Eya kontribuyo al enrikisimiento de muestra konosensia en todo lo ke konserna el djudaizmo sefaradi ke inkluye una pleiada de savios, poetas, eskritores i filozofos de los mas ilustres de la istoria djudia. Otras ovras mas de este tan modesto, ma tan fruchiguozo autor son , su estudio sovre el Meam Loez «Maskiyot Levav»; » Haitonut be Ladino» (Periodismo en Ladino) en la kuala u n a a n c h a informasion sovre las revistas i jurnales en ladino ke aparesieron entre los anyos 1842-1958; «Ateret Geut» kon algunos kapitolos de la literatura djudeo-espanyola i su livro «Poezias».
Moshe David Gaon fue kazado kon Sara Hekim i tuvo 4 kreaturas: Binyamin (Beni) Yigal, Klila i Yeoram.
En la introduksion del livro «Besamim mi Sefarad» (Parfumes de Sefarad), su ijo, el famozo kantador Yeoram Gaon, eskrivio entre otras:
Yeoram Gaon, eskrivio entre otras: «Mi padre, ke en paz deskanse, eskrivio toda su vida sovre el patrimonio sefaradi, su kultura, su lengua, su djente i sovre sus rayizes ke despertan el respekto de todos. Despues de su muerte topi entre los numerozos manuskritos, una koleksion de perlas – de refranes en ladino. Este livro es un omenaje a mi padre ke tanto ami i ke no gozo del rekonosimiento ke meresia por su lavoro, sea por el publiko en jeneral i sea por los sefaradis en Israel. Espero ke estos refranes en djudeo-espanyol, arekojidos por mi padre uno a uno, a la luz flosha de la lampara, perpetuaran su memoria.»
Sovre la inisiativa de Beni Gaon, ke murio en el anyo 2008, fue fondada en la Universidad Ben Gurion, en Beer Sheva, El Sentro Moshe David Gaon para la Kultura Djudeoespanyola» kon el buto de enkorajar la investigasion del ladino i su kultura ansi ke la publikasion de livros en este kampo, organizar kongresos i dias de estudio i tambien otras katividades kulturalas mas para los abitantes de Beer Sheva i sus entornos.
Fuente: turkisrael.org
Zelda Ovadia Salinas, espesialista en lengua djudeo-espanyola, mos avla en esta seksion sovre distintos temas ke tokan a la istoria i a la kultura sefaradi.
