eSefarad Noticias del Mundo Sefaradi
Los dias de Sefirat aOmer son los 49 dias ke se kontan desde la salida del primer dia de Pesah asta Shavuot, segun esta eskrito en la Tora.
En verdad estos dias tenian de ser dias solamente de alegria: En estos dias, el puevlo djudyo aspera kon mucho ardor i dezeo a la fiesta de Shavuot,
en la kual resivimos la Tora.
Este aspero es komo akel novio impasiente «kontando los dias», a enkuentra 
de su boda.
Ma, el destino amargo fue ke djustamente en estos dias de Sefirat aOmer, antes 1939 anyos, el puevlo de Yisrael, gerreando kontra las armadas del imperio Romano, pedriyo su independensia, i milaryas de mansevos toparon la muerte en esta gerra.
Desde akea epoka se uzan en muestro puevlo varyas kostumbres de luto en los dias de Sefirat aOmer (naturalmente DESPUES de salida de Moed).
Entre otras kostumbres, muestras madres sefaraditas deshavan echos de kuzir, brodar o trikotar kozas muevas en los dias de Sefirat aOmer.
La razon eskondida en esta kostumbre es, simplemente, por ke los vestidos -o otras kozas muevas- ay de estrenar kon alegria i kon la beraha de «she’eheyanu». Dunke, ¿porke «manchar» la alegria kon rekuerdos de luto?
De toda manera, esta fue una regla «non eskrita» de muestras madres, una de las kostumbres derivadas de sus sentimientos sensivles.
El Dio ke mos ayege a otros plazos alegres a muestro enkuentro por paz.
Yehuda Hatsvi
Tel Aviv
