Las Notas de Matilda – Sientistas djudiós: CESARE MUSATTI

Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

CESARE MUSATTI
(Dolo, Italia, 1897 – Milano, 1989)
De Wikipedia – Internet

Cesare Musatti nasio en Dolo (Italia) en el 1897,  fue psikolog  i psikoanalista, i fue el fondador de la psikolojia italiana. Su padre era sosialista, amigo de Gacomo Matteotti i deputado en el Parlamento italiano. Despues ke termino el liseo Giulio Cesare, Musatti se transfero en Venezia para enskrivirse a la fakultad de matematika. A 19 anyos fue yamado al servisio militar, i despues del entrenamiento en Torino, fue mandado al fronte komo ofisier kon enkargos no muy emportantes. Kuando eskapo la gerra el torno a Padova para terminar sus estudios. El deskojio de estudiar filozofia, porke en la katedra de Psikolojia  Sperimental estava Vittorio Benussi de «chiara fama», i se laureo en el 1922, i el anyo despues se izo asistente voluntario en el laboratorio de Psikolojia Sperimental. En el 1927 Benussi se suisido, a kavza de una forma grave de depresion, i todo kedo en las manos de Musatti i de su asistente Silvia De Marchi, ke despues se izo su mujer. El kuvrio el suisidio de Benussi, para no danyar a la situasion muy frajil de la akademia, ke estava debasho fuertes presiones de la parte del rejim fashista i de la Eglisia katolika. Solo en el 1980 Musatti revelo la verdad sovre la muerte de Benussi. En el 1928 Musatti se izo direktor del Laboratorio de Psikolojia de la Universidad de Padova,  fue el primer a azer konoser en Italia la «Psikolojia de la Forma», i se izo el primer grande estudiozo italiano de la psikoanaliza. Estudiando la psikolojia de la sujestion e de la ipnoza, arivo a la psikoanaliza freudiana, de la kuala el dio el primer kurso en la Universidad de Padova (1933-34).  En prinsipio las teorias de Freud fueron resividas bien en Italia, ma despues la Sosiedad de Psikoanaliza fue limitada por la opozision del rejimen fashista i despues por las Leyes Rasiales en el 1938.  Musatti fue kitado de la Universidad i deklasado a ensenyante de liseo. Del 1940 el se izo profesor de filozofia en el Liseo Parini de Milano. En el 1943 se topo kon amigos sosialistas, ke bushkaron de rekrear el Partido Sosialista Italiano i de atar los raportos kon el Partido Komunista Klandestino. El kontinuo a lavorar durante la gerra, en Ivrea, uespede de su amigo Adriano Olivetti, ande fondo un Sentro de la psikolojia del lavoro. Despues fue yamado al fronte franses. A la fin de la gerra en el 1947 obtuvo la primera katedra de psikolojia konstutida en Italia en la Universidad Statal de Milano, ande ensenyo asta el 1967 i tuvo muy munchos estudiantes. En el 1949 fue publikado su «Trattato di Psicoanalisi» i en el 1955 se izo direktor de la «Rivista di Psicoanalisi». El eskrivio i livros de literatura i en el 1980 resivio el «premio Viareggio» i fue por dos vezes konsejero komunal en Milano. Fue siempre sostenidor de la paz, del progreso de los lavoradores, de la emansipasion de la mujer, de los derechos siviles. Murio en Milano en el 1989 i sus sinizas son konservadas, sigun sus ultimas voluntades en el chiko semeterio de Brinzio.

Matilda Koen-Sarano