Las Notas de Matilda – Sientistas djudiós: BRUNO PONTECORVO

Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

BRUNO PONTECORVO
(Marina di Pisa, Italia, 1913 – Dubna, Russia,1993)
De Wikipedia- Internet

Bruno Pontecorvo nasio en Italia en el 1913, i era un fizisien atomiko italiano, asistente de Enrico Fermi i el autor de numerozos estudios sovre la alta enerjia fizika, sovre todo sovre los neutrinos. Se izo famozo por aver salido de la komunita sientifika oksidental, porke en el 1950 se fue en Rusia, ande kontinuo sus envestigasiones. El nasio en una famiya djudia bienestante non-relijioza. A solo 18 anyos entro al Kurso de Fizika en la Universidad de Roma La Sapienza, i se izo el mas serkano i mas djoven asistente de Enrico Fermi. En el 1934 el kontribuyo al famozo eksperimento de Fermi, ke demonstro las proprietas de los neutrones lentos, koza ke yevo a la deskuvierta de la fision nuklearia. En el 1936 el se fue a Paris a lavorar en el laboratorio de Irene i Frederic Joliot-Curie. En este tiempo fue enfluensado por las ideas de sosializmo, a las kualas kedo fiyel por todo el resto de su vida. En Paris en el 1938 el enkontro Marianne Nordblom, una djoven estudiante de literatura franses, i sus primer ijo nasio en akel anyo.

El no pudo tornar en Italia a kavza de las diskriminasiones rasiales, i se kedo en Paris, asta ke los nazistas entraron en la sivdad. Entonses se refujio kon su famiya en Espanya, i se fue despues a los U.S.A., ande topo un empiego en una kompania petrolifera en Tulsa Oklahoma. El no fue yamado a partisipar al Manhattan Project en los Estados Unidos, para la konstruksion de la bomba atomika, posiblemente porke se avia akometido komo sosialista. Ma en el 1943  fue envitado a unirse al Montreal Laboratorio en Canada. En el1948, despues ke obtuvo la nasionalidad britanika, fue envitado por John Cockcroft a kontribuir al projekto de la bomba atomika. En el 1950 le fue dada la katedra de fizika en la Universidad de Liverpool, ke devia tener asta el Enero del 1951. Ma en el Agosto del 1950, durante las vakansas de enverano el desho Roma para Stokolma kon su mujer i sus tres ijos, sin enformar parientes i amigos. El dia despues fue ayudado por adjentes rusos para entrar en la Union Sovietika via Finlandia. Esto preokupo muncho Britania i U.S.A. por espanto de fuyidura de sekretos atomikos, ma nunka  el no fue akuzado de espionaje o de pasaje de sekretos.  Potecorvo fue resivido en URSS kon todas las onores i lavoro asta su muerte en el Instituto Nukleario de Dubna, konsentrandose en estudios teoretikos sovre la partikulas de alta enerjia i kontinunado sus envestigasiones sovre los neutrinos. En el 1953 le fue otorgado el Premio Stalin i en el 1958 entro komo miembro en la Akademia Sovietika de las Siensias i resivio dos Ordenes de Lenin. En el 1955 el aparesdio en publiko en una konferensia  de prensa, ande dio sus motivasiones a su eskojimiento de lavorar en la Union Sovietika.  Solo en el 1978  izo un viaje a Italia. El murio en Dubna en el 1993 i esta oy enterrado en el Semeterio Protestante de Roma.  En el 1995 fue enstituido el Premio Pontecorvo. Las deskuviertas de Pontcorvo en el kampo del neutrino fueron konfirmadas por otros resientes eksperimentos, ma no le fue nunka otorgado el Premio Nobel.

Matilda Koen-Sarano