eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Yossel Bergner
(Varsavia, Polonia, 1920)
De Wikipedia
Yossel Bergner, es un pintor israelí, dekorator de livros, pintor de shenas i kreador de vistimientas de teatro, sovre todo para las piesas de Nisim Aloni. Bergner nasió en Varsavia en el 1920. Su padre era el poeta Méleh Ravitz (Zeharia Hana Bergner), i por esto su chikés pasó en una kaza yena de eskritores i poetas, i de diskusiones sovre la literatura i poezía. Kuando él tenía 17 anyos, sus djenitores emigraron a Australia, ande Bergner estudió arte. En los burós de emigrasión de Varsavia Bergner enkontó a Yossel Birstein, i izo kon él el kamino para Australia. Los dos sirvieron en la armada australiana durante la Sigunda Gerra Mondial, komo dekrive Bergner mizmo:
«Después ke eklató la gerra de Hitler en Evropa, mozotros dos, dos Yosseles, mos arrolimos a la armada australiana, i estuvimos ayá la mas parte del tiempo endjuntos en la mizma tienda. En el tiempo líbero Yossel eskrivía poezías i yo desinava las kriaturas del lugar, los aborídjenes.»
Después de su serviso militar en la armada australiana, Bergner fondó, kon su amigo Birstein, un grupo de pintores ke se okuparon de desén realístiko-sosial. Bergner izo su aliyá a Israel kon su mujer, la pintora Odrey Bergner, i eyos se establesieron en Safed. De los anyos `50 Bergner bive i ópera en Tel-Aviv. Además de su okupasión komo pintor, él desina dekores de teatro.
Las ovras de Bergner se topan en munchas muestras en Israel i fueron merkadas por koleksionistas. Berger resivió el premio de Israel por la arte en el 1980.
Matilda Koen-Sarano
