eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Moshé Castel
(Yerushaláyim, 1909 – 1992)
Del «Jerusalem Post»
Moshé Castel nasió en Yerushaláyim de una famiya orijinaria de Kastilya, ke se establesió en Erets Israel en el 1492. Su famiya bivía de munchas jenerasiones en Hevrón. Su padre Yeudá Castel, ke avía nasido en Hevrón, eskrivía pergamenas i rulós de Torá. Moshé Castel arivó a París en el 1927 kon el ayudo de su ermano Yosef. El frekuentó la Akademia Julien i estudió en el Muzeo del Louvre. Después de 13 anyos de lavoro en París, tornó en el 1940 a Israel, se establesió en Zfat, la sivdad del Zoar i la Kabalá. En el 1946 él resivió el Premio Dizengoff de la munisipalidad de Tel-Aviv. En el 1947 él inisió i fondó kon otros pintores i eskultores de Israel el grupo «Ofakim Hadashim» (Muevos Orizontes). En el 1959 tornó a París, merkó un estudio en Montparnasse, ande iva a pasar unos kuantos mezes al anyo. Además resivió el premio «Premier do Estado» a la Biennal de San Paulo, en Brazil.
Munchos de sus retratos i sus shenas de kaleja son karakterizados por kolores fuertes, ke reflektan la enfluensa espanyola sovre sus ovras.
Sus ovras se topan en munchos muzeos i emportantes edifisios en el mundo, de New York a munchas otras sivdas amerikanas, de Londra a Roma. En Israel sus ovras estan entre otras en la Kaza de Prezidente i en la Kneset en Yerushaláyim.
Matilda Koen-Sarano
