eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Emanuele Luzzati
(Genova, Italia, 1921 – 2007)
De Wikipedia i Muzeo Ebraico di Bologna
Emanuele Luzzati fue pintor, animador, illustrador i shenograf djudó italiano. Fue también seramista i dekorator.
El se diplomó en l`Ecole des Beaux Arts de Lozán, ande se avía transferado a kavza de la promulgasión de las leyes rasiales en Italia.
Entró en el mundo de la animasión kon el kurtometraje «I paladini di Francia» (1960) en kolaborasión kon Giulio Giannini, kon el kual en ségito produsió numerozos filmos a desenes animados, entre los kualos «Castello di carte» (Kastiyo de kartas) (1962), «La gazza ladra» (1965), ke resivió un premio en el Festival de Annecy, «Alí Babá», «Turandot» i «Pulcinella» (1973), ke obtuvo kon «La gazza ladra» una «nomination» en los Premios Oscar del 1974.
Su ovra mas konosida es «Il flauto magico» (La flut májika). El kolaboró kon el London Festival Ballet, kon el Chicago Opera House, kon la Staatsoper de Viena i mas. Izo también illustrasiones para kriaturas, de tekstos ke eskrivió él mizmo, i de livros de Italo Calvino i Gianni Rodari. Luzzati se interesó al simbolizmo de los tarot. Exekutó la shenografía para una seria de konchertos del kantante Fabrizio de André, realizando una djigantografía kon los tarot de Piemonte. El firmó mas de 400 lavoros para el teatro, la ópera i el balet.
Su ovra es atada i a temas djudiós, porké el ebraizmo es su raíz kultural.
El illustró munchos livros de sujeto djudió, de «La sivdad de Safed» (1955), a la Agadá de Pésah (1985), al volum de arte «Ester i Ruth». (1990), de tekstos en yidish a tekstos nasidos en Israel en muestros días.
El illustró tekstos de Isaac Bashevish Singer, Meir Shalev i Primo Levi.
En el antiko porta de Genova ay un muzeo ke yeva su nombre.
Matilda Koen-Sarano
