eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
David Gerstein
(Yerushaláyim, 1944)
David Gerstein nasió en Yerushaláyim en el 1944. El aze parte de la kategoría de artistas ke incheron de sus ovras el país entero. Sus ovras de pintura tienen la karakterístika sorprendiente de enkluir en sí kolor i movimento en manera ekstroversa i vertijinoza. Su kariera de estudios es kompleta. Del 1965 al 1966 él estudió en la Akademia de Arte Bezalel en Yerushaláyim. Del 1966 al 1968 estudió en la «Ecole Superieure des Baux Arts en París. Del 1968 al 1970 estudió en la «Art Superior League» en New York, i del 1973 al 1974 izo sus «Post graduate studies» en «St. Martin’w School of Art» en Londra. En el 1970 después de diez anyos de studio en Yerushaláyin, París i New York, Gerstein empesó a exibir su pinturas literalmente figurativas kon shenas autobiográfikas, shenas de balkones de Tel-Aviv i de kaza, komo se gravaron en su memoria. Estos anyos eran anyos krítikos en la shena de la arte israelí i internasional. Era arte de minimalizmo i konseptualizmo, ma Gerstein refuzó de adjuntarse a estas eskolas, i dezvelopó su arte ke es yena de ekspresión i de persepsión komo objeto de arte. I en verdá lo ke sorprende es su arte ke no asemeja a dinguna otra es ke bive en una enkreívle alegría de movimiento i de kolores.
Es difisil pensar a otro artista ke en muestros días tiene una tal prominensia sovre la shena lokal: sus ovras vienen exibidad regolarmente en la Galería Rosenfeld en Tel-Aviv, i aparesen en jurnales i revistas en Israel, entre otras para promover Isracard i la «First International Bank» en Yerushaláyim. Sus ovras para kriaturas tienen una grande popularid. El lavora por la TV. Sus ovras están enkolgadas en el Museo de Israel. De 1971 al 1985 fu «Senior Lecturer» (Ansiano Konferensier) en la Akademia de Bezalel en Yerushaláyim.
Es emposible de mensionar mizmo una parte de sus ovras, tanto numerozas son i aparesen in en muy munchos muzeos i exibisiones en Israel i en el mundo. Sus lavoros tienen karakterístikas únikas a él, porké se topan entre la skultura, la pintura i el movimiento, i azen parte mizmo del panorama sivdadino, komo sus papiyones de mil kolores en envaden el espasio, sus flores fantástikas i sus siklistos ke korren velosmente, sin kedarsen de sus lugar, a kavza de sus linyas multikolores ke parese ke los agan literalemete bolar.
Matilda Koen-Sarano
