eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Chaim Soutine
(Smilovitchi, Minsk, Bielorussia 1893 – París, 1943)
De Wikipedia
Chaim Soutine, pintor ekspresionista, era el diezen ijo una famiya djudía ortodoksa de orijín lituana de onze kriaturas. Su padre era adovador onde un shastre. La vida debasho del imperio ruso era muy difisil para los djudiós, ke bivían en grande provedad. Soutine era tímido i introverso, i preferava al estudio azer los retratos de la djente ke enkontrava. El resivió por esto munchas punisiones, a kavza de la proibisión relijioza de reprezentar la persona. En el 1907 él se fue a Minsk ande su kunyado, komo aprendista shastre, i en el mizmo tiempo tomava lisiones de desén kon un amigo ke tinía la mizma pasión, Michel Kikoine. Un día él vino violentemente aharvado por un ombre, al kual estava aziendo el retrato. Su madre se keshó al tribunal i él resivió 20 rublos de indemnidad. Kon esto 20 rublos él se fue kon su amigo a Vilna a lavorar ande un fotograf. Los dos amigos fueron admetidos a la Eskola de Beyas Artes, i ayá se enkontraron kon Pinchus Krémègne, ke será el primo a ir a París, segido de Kikoine. A la fin el fotograf finansió a Soutine el viaje para París. Partiendo para París Soutine kortó los pontes kon su pasado i no tomó kon sí dinguno de los lavoros ke izo asta entonses. En el 1913 su amigo Krémègne lo resivió i lo yevó a «La Ruche» en Montmartre, ke se yamará después «Ecole de París» o «Ecole juive». Poko después él se enskrivió a la Eskola de Beyas Artes, ma komo no tenía mezos finansiarios, me metió a azer el deskargador. En este periodo empesó a sintir dolores de estómago, kavzados por su pasado de provedá i de sufriensa, ke lo trusheron antes al suisidio, del kual fue salvado por su amigo Krémègne, i después a la ulser gástrika, ke lo yevará en el 1940 a la muerte. En el 1914 él se dio volontario para azer trincheas, ma vino reformado kavza de su salud, i obtuvo un permiso de estada komo refujiado ruso. En akel periodo se enstaló en Falguière i se izo amigo de Amedeo Modigliani. Eyos bevían todo el tiempo kaje sin komer, i van ande las prostitutas. Modigliani lo prezentó al merkante de arte Zborowski, ke empesó a merkar sus pinturas. En el 1919 Soutine tornó a París, ma un amigo lo envitó a Céret, i él se establesió ayá. En el 1920, oyendo de la muerte de Modigliani, él deshó de bever, ma ya era muy tadre para su ulser. En el 1920 él vendió a Zborowski mas de 200 pinturas, i mas tadre el merkader venderá al doktor amerikano Albert Coombs Barnes 60 pinturas de Soutine. Ma Soutine kemó una gran parte de las pinturas ke izo a Céret, porké no estava satisfakto de su lavoro. De este periodo sus kondisiones finansiarias enfloresieron, i él no sesó de pintar, ma sus vizinos se keshavan orrifiyados por la golor de karkasas de animales, ke le sirvían de modelos, ke tenía en su estudio.
En el 1935 sus ovras fueron ekspozadas en Chicago i en el 1935 le fue organizada una muestra en París. En el 1939 él se ató kon Gerda Groth, ke fue arrestada en el 1940 komo almana. Liberada por su entervensión, él no la vido mas. Debasho de Vichy, él, komo djudió, pasó una vida klandestina kon su kompanya Marie-Berthe Aurenche, tornando de vez en kuando a París, para azerse kurar. En el 1943, yevado de urjensia del ospital de Chinon a una klinik de París, murió aya después de la operasión. En el 1960 Marie-Berthe Aurenche se suisidó i fue enterrada al lado de él.
