eSefarad Noticias del Mundo Sefaradi
Kada martes, Matilda Koen Sarano mos konta sovre kuentos, muzika i otras kozas de su eskritura.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
“Ken da en vida merese apiedregado”
Avía un padre ke era bivdo, tinía munchos ijos i era muy muy riko.
A este padre… le vinían los ijos i las ijas, le aprontavan a komer, le alimpiavan la kaza. Eyos ya savían ke tinía munchas parás…Por esto lo ivan poponeando. “Papá!” por akí, “Papá!” por ayá.
El kería muncho bien a sus ijos. Un día disho: ‘Les daré todo lo ke tengo, agora. En vida es mijor. Ansina lo desparto yo i no se pelean después ke yo me murí”. I toda la rikeza ke tinía la divizó i la dio a los ijos i a las ijas.
Estos tomaron las parás… skapó! No fueron mas and’el padre. Lo desharon ayá solo, sin komer, sin bever. El komía solo lo ke pudía aprontarse de sí para sí, i de día en día estuvo deskayendo.
Asta ke vino un vizino a toparlo i le sta diziendo: “Komo? Tú ke tinías tantos ijos ke te kudiavan, agora stas solo? No te vienen a azer una supa… No vienen a darte una mano en kaza?”
“E, sí,” le disho el ombre, “Ya les di todo lo ke tinía…Mas no tengo nada de darles. Para kualo ke vengan?”
“A! Les dates todo?! Loko! Ken da en vida merese apiedregado! Agora saves kualo vas azer?” le disho el vizino, “Vas a tomar una tinaja, vas a dizir ke esta tinaja esta yena de dukados de oro, i ke después ke te vas a murir, éste va ser el merás ke vas a deshar a ken vas a kerer tú!”
Disho él: “Ya sta bueno!”, metió una tinaja en un kantón del almario i esparzió la boz ke esta tinaja está yena de dukados, i ke a su muerte la va deshar a ken le va pareser mijor.
Los ijos, ke vinieron a saver esto, tornaron a vinirlo a topar, a azerle a komer, a alimpiarle la kaza, a yevarlo, a traerlo… Tornaron komo estavan antes, pensando ke si no, la tinaja de dukados el padre – ken save? – la va deshar a otros.
Pasó el tiempo i el ombre se murió.
Vinieron los ijos i disheron: “Agora vamos avrir la tinaja i vamos a ver kualo ay adientro. Mo lo vamos a divizar entre todos mozotros!”
Se metieron todos al derredor de la tinaja. La tinaja está en medio. Tomaron un palo…i chak…dieron una dada enriva la tinaja.
La tinaja se rompió en mil pedasos i de adientro salieron – en lugar de monedas de oro – mil kulevros ke los modrieron a todos.
Kontado por Matilda Koén–Sarano – 1999
Es muy cierto este cuento,pero muchas veces ,la mayoria hay hijos que cuidan mucho a sus padres. De aqui seguramente se desprende el famoso dicho que: Un padre puede alimentar a 10 hijos,pero 10 hijos no pueden alimentar a un padre. Por supuesto hay variadas experiencias al respecto.
matildika, muy buen kuento y lamentablemente cierto. gracias!!!!desde israel kon karinio!!!!rajel .
shalom!!!