eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Sandra Marielle
Kantadera
(Suesia)
Sandra Marielle nasió en Malmo, Suesia, a una madre sueka i un padre kroato. Kresió kon varios estilos muzikales en los anyos ’70, komo pop, disko, eurovozión, múzika sueka i kroata. En su chikez fue frekuentemente a Kroasia kon su padre, ke tanyía instrumentos tradisionales de la múzika folklórika kroata. Ayá, djuntos a otros eyos tanyían i kantavan la noche entera. A Sandra le plazió siempre kantar i kuando era kriatura se metía en frente al espejo i djugava el rolo de la kantadera. En su mansevés partisipó a varias kompetisiones de talento, ande tuvo un grande sukseso. Empesó a estudiar la múzika en manera teorétika en el liseo, i después en la folkehogskola (eskola post-liseo sueka, ke se topa en la kampanya, i tiene linyas artístikas). Ay se enkontró kon el jazz i la múzika klásika. Durante este tiempo empesó a kantar motown i soul, i a azer parte de un grupo muzikal. Su kamino komo kantadera profesional es muy komplekso. En él Sandra topa el bonor, el amor, la kuriosidad i la motivasión para eksprimirse en estilos varios.
Empesó kon el estilo góspel, ma se sintió demaziado limitada en él, al grado ke sesó de kantar en la metad de los anyos 20 de su vida. En el 2006 tuvo a su ija Isabella, i kantava para eya. Después de unos kuantos anyos se dedikó de muevo al kanto, i esta vez en muevos djéneros. Esto la trusho atrás a la múzika, i en este kamino está kaminando agora, kantando también en ladino, koza ke la dezvelopa i la enrikese.
Komo de fakto ay un anyo ke kanta en ladino, ke es un muevo mundo para eya, ambezándoselo eskuchando a varios kantantes i estilos. I kere kontinuar a dezveloparse en este estilo muy riko i ekspresivo, en konsertos bivos i también en diskos, radio i televizión.
El 9 de djunio de este anyo tuvo lugar una reprezentasión del Grupo «Savor de Ladino» en el Sinagoga Grande de Copenhagen, ande Sandra Marielle interpretó «Avinu Malkenu» de la orasión djudía i kantigas muevas en ladino, kompozadas por Yair Sapir, ke es el «motor» de este grupo.
En el konserto de estos dias, organizado por Yair Sapir kon las kantigas eskritas en parte por él mizmo (palavras i múzika), i en parte kon su múzika i las palavras de Matilda Koén-Sarano, Sandra Marielle tuvo un sukseso muy grande, komo en la Sinagoga de Copenhagen.
Matilda Koén-Sarano, 2013
