Las Notas de Matilda – Kantadores de la tradisión djudeo-espanyola: Ruth Yaakov

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

 Ruth Yaakov
(Yerushaláyim)

Ruth Yaakov nasió en Israel i bive i lavora en Yerushaláyim. Resivió su edukasión muzikal en la Akademia de Múzika a nombre de Rubín en Tel-Aviv. Kon un repertorio de varios djéneros komo la ópera i kantigas i múzika de kámera sefaradías eya ya aparesió en varias famozas shenas en Evropa i en el mundo. Eya estudió kanto klásiko en Israel, en los Estados Unidos i en Evropa kon maestros famozos.  Durante sus  estudios lavoró kon kantadores sefaradís orijinales, ke le ambezaron el estil i el repertorio de kantes sefaradís tradisionales. Eya arrekoje i interpreta los kantes de los sefaradí, akeos djudiós espanyoles ke se refujiaron en el Imperio Otomano, al derredor del Mediteraneo i en los Balkanes. En el Festival Stiriano de Otonyo eya dio la primera performansia del programa «Niemandseland» de Zbigniew Bargielski i izo parte de la produksión de Radio i Televizión en Evropa i en la Amérika del Nord. En el mizmo tiempo  enkavesó un atelié de múzika ebrea i de bayle. El «Ruth Yaakov Ensemble», fondado el 1993, enkluye a Ruth Yaakov mizma ke lo enkavesa, a Juan Carlos Surgulian, armeno-uruguayano, ke tanye el saz, el ut i el buzuki; a Levent Tarhán, nasido en Turkía, perkusiónista i kompozitor de múzika; i Shkelzen Doli, albanezo, violinista. En el 1998 Ruth kitó un CD, entitolado «Shaatnez, Sephardic Songs of the Balkans». Este títolo le viene del fakto ke la múzika djudeo-espanyola tiene melodías moras i otomanas en una lingua ke es la meskla del espanyol kon las linguas de los Balkanes i el ebreo. Los tekstos de los kantes  viajan de melodía a melodía, varian de rejión a rejión, i transportan el oyente de la Espanya medievel a la Turkía, la Gresia, la Bulgaría i la Bosnia asta Israel. El komplekso mizmo, de eya komo solista i los múzikos kada uno de un lugar diferente, da razón al títolo del CD. Su sigundo CD ke salió en el 2004 es entitolado «Ziara, sephardic women`s songs of the Balkans» (Pelegrinaje, kantos de las mujeres sefaradías de los Balkanes). Este CD está bazado sovre lo ke eya se ambezó de sus enformantes, los mas sovresalientes de los kualos son Arón Saltiel de Salonik,  Eliezer Abinun de Bosnia i Bienvenida Berta Aguado de Turkía, sovre el kanto de la kuala eya formó su estil de kanto. Kon su briyante ansamble (Eyal Sela, Yaniv Raba, Naor Carmil i Noam Chen) eya mos yeva al mundo de las mujeres sefaradías i mos aze partisipar a una kultura reprimida, ma no ulvidada.