Las Notas de Matilda – Kantadores de la tradisión djudeo-espanyola: Rivka Amado

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Rivka Amado
Holón, Israel–Berkley, California (U.S.A.)

Rivka Amado nasió en Holón (Israel) i pasó la mas grande parte de su vida adulta en  Yerushaláyim, antes de transferarse en Berkeley (California) en el 2004. Eya se metió en trasas de las raízes familiares de dos prominentes famiyas sefaradías –los de Amado i los de Barbut – de las dos partes de su famiya. Después de sus eksplulsión de la Espanya las dos famiyas toparon sus kamino verso los Balkanes, ande kedaron por jenerasiones. Los djenitores de Rivka izieron sus aliyá a Israel en el 1933. Eya kresió en una kaza de ladino-avlantes en Holón, ande se ambezó melodías tradisionales de su nona, Rivka Amado-Mandil…(Komo de fakto los sefaradís yaman a sus kriaturas kon los nombres de sus parientes deynda en vida). Por anyos Rivka kantó kantes en ladino i tanyó el piano de amatora, i kantó en el koro de su kal en Yerushaláyim. De kuando se transferó a Berkeley eya dedika muncho tiempo a bushkar la kultura sefaradía i a interpreter múzika en ladino. Kon el ayudo del gitarrista Joel Siegel, eya dezvelopó un programa – Un viaje de retorno a Espanya – en el kual eya konta de muevo sovres la manera, kon la kuala los djudiós de Espanya pudieron mantener sus identitá por 500 anyos, por largo tiempo después de sus ekspulsión, antes de Espanya i después de toda la Península Ibérika. En este programa eya meskla narrasión istórika sovre la kultura sefaradía kon kantes populares en ladino.  Rivka Amado i Joel Siegel   tuvieron muchos programas en la rejión de la Baya de San Francisco, i en otros lugares. Este programa reúne  las dos partes de Rivka: su parte muzikal  i su parte investigativa. Rivka resivió su PHD en la Universitá de Toronto en el 1990, izo su postdoktorado en medisina étnika en el Hasting Center  i en la Universitá Ebrea de Yerushaláyim, i publikó ensajes sovre sujetos enteresantes en el kampo de la medisina étnika. Eya avló también en las Universitás de Tel-Aviv, de Bar-Ilán, de Stanford, de Berkeley i  de Princeton,  i resivió munchas mensiones por sus investigasiones i su  ensenyamiento. Rivka kontinúa su lavoro investigativo i muzikal sea en los Estados Unidos, sea en Israel. En el Marso del 2009 publikó su primer album, entitolado «Ija mía», ke es una koleksión de kantes tradisionales en ladino, akompanyada por el gitarrista Joel Siegel i un ensamble de otros muzisianos yenos de talento. Agora está planeando un sigundo album ke va enkluyir mas kantes tradisionales en ladino, i kompozisiones suyas en ladino, ebreo i inglés.