Las Notas de Matilda – Kantadores de la tradisión djudeo-espanyola: Orit Perlman

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

 

Orit Perlman

(Israel)

Orit Perlman, mezzo-soprano, kantora, poetesa, maestra de kanto, kompozitora, fue envolvida en la múzika djudía del 1955. Nasió de djenitores israelianos, ma kresió en los Estados Unidos i resivió una edukasión djudía relijioza en el movimiento konservativo dezde su chikés. Eya tornó a Haifa a la edad de 12 anyos i empesó a estudiar dezvelopamiento de la boz a 14 anyos. En djoven edad empesó a apareser, kantando sea sus kompozisiones, sea  múzika popular. Estudió linguístika i literatura en la Universidad del Minnesota (U.S.A.) i mas tadre en su djoven edad estudió desén de djoyas i kozas de oro en «Omanit»  en Yafo, kreando djoyas a lo largo de su karriera de kantadora.

Después ke estudió dezvelopamiento de la boz en la Akademia de Múzika en Tel-Aviv a la fin de sus 20 anyos, entró en el riko mundo de la múzika djudía i de las eksperiensas spirituales de la sinagoga, por medio de la kantora Michal Schiff del Hebrew Union College. De entonses empesó a ofisiar komo kantora i ofisiadora en las seremonías del siklo de la vida i en las sinagogas reformistas en Israel entera, i en el mizmo tiempo a ofisiar komo Alto Kantor de las Fiestas i a ambezar en los ateliés  de la múzika djudía en los Estados Unidos. En el 2006 Orit se enamoró del ladino por su rikeza de melodías i la ondura de tekstos, después de aver oyido la rejistrasión de enformantes arrekojida por la Doktora Shoshana Weich-Shahak, renomada muzikologa del ladino, por la kuala fue introdusida a David Gottisman de las publikasiones Pardés, ke publikó «En Buen Simán». De akel punto eya empesó a ser profundamente envolvida en la tradisión muzikal del ladino de los Balkanes asta el Maroko.

Aparesió en munchos konsertos de la Doktora Weich-Shahak, en la Universidad  «Bar Ilán» i la Universidad de Haifa,  en la Autoridad Nasionala del Ladino en Yerushaláyim, i kon la Profesora Tamar Alexander en le Merkaz Gaón en Beer-Sheva, i  mas. Además eya kreó munchos ansembles muzikales de ladino, kon instrumentos auténtikos. Performó en el Festival de Haifa de múzika djudía en el 2012. En el oktobre del 2013 partisipó komo kantadora kon Kobi Zarco en el projekto de la Universidad de Haifa, la Autoridad Nasionala del Ladino i el Bet Avot «León Recanati» a la produksión del kit de 2 CDs «Ventanas altas de Saloniki», debasho de la supervisión artístika de la Doktora Shoshana Weich-Shahak, i kon el akompanyamiento  de mueve muzisianos, ke tanyeron instrumentos orientales i oksidentales.

A parte del ladino Orit kompozó en el 1998  múzika para la poezía original de Yehonadav Perlman i otros poetas ke prezentó en el Festival de Metulla i  otros lugares. Enrejistró mueva múzika  djudía original (2011), múzika yidish klásika (2010), i blues en yidish kon Itay Alter (2008) i  Haviva Ziv (2006) i viejas melodías djudías, improvizadas kon jazz (2002). Tres de sus kompozisiones orijinales aparesieron en la «Shabbat Antologies of Transcontinental Music» (volumes IV, V, VI), i 6 pedasos resivieron premios en la biennal «Shalshelet, International Festivals of New Jewish Music» (2008, 2010, 2012).

En estos 5 anyos eya partisipó en munchos programas radiofónikos en Kol Hamusika i en Reshet Alef, kantó en Bet Avichai i aparesió en el programa de televisión Erev Hadásh. Orit mora en Haifa kon su marido Yehonadav Perlman, tiene tres kriaturas, ambeza en el Konservatorio de Afula  i privatamente, i aparese komo kantora en varios estiles.

 

Matilda Koén-Sarano, 2013