Las Notas de Matilda – Kantadores de la tradisión djudeo-espanyola: Isaac Salinas

Kada martes, Matilda mos kontara sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Isaac Salinas
Tenor
(Havana, Cuba)  

Isaac Salinas nasió en Havana (Cuba) i resivió su PHD en ley en la Universidad de Havana. Empesó su entrenamiento muzikal en el Konservatorio Munisipal de Havana i kontinuó sus estudios muzikales en Mexico-City, ande resivió un máster vokal en el «College of Music of the Nasional Institute of Fine Arts (INBA), i un doktorado en  ópera en el «National Conservatory of Music» del «National Instiute of Fine Arts». El resivió i lisiones de kanto de ópera en México, en Evropa i en U.S.A.  kon renomados maestros internasionales. Isaac Salinas estudió además istoria, relasiones internasionales i psikolojía, i es jurnalista también. El es muy konosido no sólo en México, ma i en U.S.A., en  la Amérika Latina (Brazil) i en Evropa ( Austria, Ungaría, Romanía, Suisa i Espanya), i en Israel también. Las perfornasias del maestro Salinas en resitales i rolos de ópera son numerozas i bien difundidas. El interpretó los rolos de tenor de las óperas mas konosidas, komo «Cavalleria rusticana»,  «Madama Buttefly»,  «Tosca»,  «Carmen»,  «Traviata»,  «Trovatore», «Aida». Interpretó además  rolos de tenor en óperas modernas, i fue el tenor solista en munchas performansias de la Muevena Sinfonía de Beethoven en México, U.S.A. i Evropa. Interpretó además Zarzuelas espanyolas i kubanas i aparesió por radio i televizión en México, Israel, Romanía, Austria, Las Izlas Karibes i los Estados Unidos.   

En el 1982 Isaac Salinas resivió el trofeo «Copa de Plata» del Teatro Nasional dela Opera de Miami. I en el 1984 fue premiado por la Union Mexicana de Cronistas de Teatro i Musica por aver sido el kantante mas sovresaliente del anyo por sus interpretasiones en operas, zarzuelas i resitales. En el 1993 el publikó un CD, entitolado «The Sephardic Heritage»,  ke inkluye romansas i kantigas de la grande erensia djudeo-espanyola, ke no fueron olvidadas nunka por los sefaradís atraverso los siglos. «El disko kontiene parte de los rekuerdos muzikales i del alma de los sefaradies» (komo eskrive Rosa Salinas en el CD mizmo), interpretados por la ermoza boz i la alma de Isaac Salinas, ke prezenta estos kantes en konsertos también.