eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Idit Rozén
Pianista i Kantadera
(Yerushaláyim)
Idit Rozén, konosida oy komo Idit Hay Rozén, es una muzisiana de su chikés. porké empesó su karriera muzikal a la edad de siete anyos komo pianista. Estudió por kuatro anyos en el liseo al lado de la Akademia de Múzika en Yerushaláyim. Por otros kuatro anyos estudió para el títolo de B.A, i otros dos para el títolo de Master en la alta Akademia de Múzika en Yerushaláyim. Kontinuó por sinko anyos el estudio del dezvelopamiento de la boz, i de entonses eya aparese sovre la shena, sea en kanto, sea en tanyedura de piano en evenimientos governamentales, en festivales i en serimonías varias. Por dos anyos estudió en el «Mahón Leahsharat Morim de Kol Israel Haverim».
Es maestra de múzika en las eskolas de 10 anyos a esta parte, i ambeza dezvelopamiento de la boz i da lisiones de piano privatamente de 20 anyos. Lavoró en oteles en toda Israel i sovre todo en el otel King David (el Rey David) en Yerushaláyim, ande enkontró a la Sinyora Lea Rabin, de bindicha memoria, ke la envitó a tanyer en la Kaza del Primer Ministro en evenimientos governamentales.
Tanyó delantre del viche Prezidente de los Estados Unidos, Al Gor, delantre del Prezidente de la China i Prezidentes de otros estados. Además aparesió también en la Kaza del Prezidente del Estado en varios evenimientos, sea en kanto i sea en tokadura de piano. Partisipó al Festival Israel en la primera kompetisión del Festiladino, en el «Festival Yerushaláyim Leomanuyot» (Festival de Yerushaláyim para las Artes), i en varios espektaklos de kojeta.
Partisipó al CD «Dí ke no es tadre» de Matilda Koén-Sarano i Avraham Reuveni, ke salió en el 2002, ande eya kantó en ladino, komo kantó en ladino en el primer Festiladino, ke tuvo lugar en el Teatrón Yerushaláyim en el 2003 i fue tranzmetido por televisión, i en la nochada en onor de Matilda Koén-Sarano en Ashkelon.
Sus estilos muzikales son: múzika israelí vieja i mueva, múzika amerikana, «musicals» (kere dizir komedias muzikales), kanto gospel i kanto en ladino.
Matilda Koén-Sarano, 2013
