eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Galit Giat
Kantadera i aktrís
(Tel Aviv)
De Wikipedia
Galit Giat nasió en el 1971 en Givat Shmuel. Es kantadera i aktrís de la televisión israeliana i resivió el premio «Masad Ha-Zaav».
Después ke terminó sus estudios en el liseo «Telma Yelín», sirvió en la armada en el grupo «Pikud Merkaz» i en el 1993 fue entre los akompanyadores del kantador Adam en la Kdam Eurovizión. Después de su servisio militar partisipó a la sería de televisión «Inyán shel zman» (Una kestion de tiempo) en el rolo de Sarit, ke interpretó entre los anyos 1993-1996 al lado de Ayélet Zorer i Uri Banay. En el 1994 Galit partisipó al filmo de Menahem Golán «Giborim Ktanim» (Chikos Eroes) al lado de Alón Abutbul i Uri Gavriel. En el 1996 partisipó a la «ópera sabón» «Késef katlaní» (Dinero destruktivo) al lado de Nati Ravitz. En el 1997 djugó en la komedia situasional «Shemesh» en el rolo prinsipal de Ety, al lado de Tzvika Hadar, ke djugó la parte de Shemesh. Por su interpretasión en esta sería de televizión ganó por tres anyos kontinuos el premio «Eskermo de oro» para aktrís kómika. En el 2001 partisipó al Festigal al lado de Tzvika Hadar. En el 2005 fue la moderatora del programa «Lo nafsik lashir» (No vamos a sesar de kantar).
Galit Giat partisipó a las piesas «Hanut ktaná vematrifá» (Butika chika i favoloza), «Nasr-a-din», «Bustán Sefaradí», «Misaviv la Olam be-80 yom» (Al derredor del mundo en 80 días), i «Shlomó améleh ve-Shamay ha-sandlar» (El rey Shelomó i Shamay el chapinero) en el Teatro Habima.
En el 2007 Galit partisipó a la primera sería israeliana de este djénero: «Ha-Nefilim» (Los Djigantes) en el rolo de una editora de jurnal, i a la sería «Agadat deshe» (Lejenda de yerva).
En el enverano del 2008 partisipó a le kuartena sezón del programa de televisión «Rokdim im kohavim» (Baylando kon las estreyas) al lado de baylarino Kiril Sivolfov, i los dos arivaron primeros.
En el 2009 Galit djugó en la piesa de Yitzhak Navón «Bustán Sefaradí» al lado de Guy Zu-Aretz i Dafna Armoni, en el rolo de la ermoza Viktoria, i en «Barbo» al lado de Liraz Charki, Niki Goldstein i Ido Rosenberg. La piesa «Bustán Sefaradí» kedó sovre la shena por muncho tiempo. En el 2011 Galit empesó a apareser en el Kanal 24. En el 2012 Galit djugó en el filmo «Balada la aviv ha-bohé» (Balada a la primavera triste).
En el 2013 Galit partisipó por tres vezes a los «Días de leche i miel» en el Yam Ha-Mélah en el ermozo programa de kantes en ladino «La Serena» kon Kobi Zarko.
Galit Giat es kazada kon Marselo i tiene tres kriaturas.
Matilda Koén-Sarano, 2013
Soy de Barcelona, en Sefarad. No escribo en castellano medieval ni tampoco soy judío, pero os leo y entiendo perfectamente. Creo que también me entendéis cuando escribo en español moderno.
Descubrí a Galit Giat en unos videos de Youtube en homenaje a Ofra Haza. Me parece una cantante maravillosa además de una señora que sabe estar en un escenario. Aparte de que es una belleza.
Un saludo de un compatiotra vuestro – porque esta es también vuestra casa – que os admira,
Javier