eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.
Eleonora Noga Alberti
Soprano
(Buenos Aires)
Del CD «Cantares de Sefarad»
Eleonora Noga Alberti nasió en Buenos Aires. Su formasión muzikal empesó en el Instituto Superior de Arte del Teatro Colón i sigió kon Sergio Tulián, Noemi Souza, Horacio Soutric, Yascha Galperín, Catalina Hadis i Juan Augusto Serra.
Se perfeksionó en klases magistrales kon Eydween Harris i Denise Dupleix. Su karriera profesional se dezvelopó siempre komo solista: en el Conjunto ARS REDIVIVA de Buenos Aires, muzika medieval i de la renesans: kon orkestra en el «Gloria» de Vivaldi, el «Magnificat» de Bach entre otras ovras.
Sus resitales se destakan por la versalidad estilístika i idiomátika, komo por el kriterio en la seleksión de las ovras. Dio konsertos en las prinsipales salas de la sivdad de Buenos Aires, del Teatro Colón en delantre, i en el enterior de la Argentina, en La Plata, Rosario, Santa Fe, Bahía Blanca, Mendoza, San Juan, Bariloche. Izo turnés emportantes kon el auspisio del Ministerio de Relasiones Eksteriores de Argentina, la Asosiasión Franseza de Aksión Artístika, i la Federasión Sefardí Ladinoamerikana (FESELA), ke inkluyeron kaje todas las kapitales de Latinoamerika, de Estados Unidos, de Israel i Evropa.
En el kampo de la opera partisipó komo soprano solista en «Così fan tutte», dirijida por Noemi Souza, i «Così fan tutte» i «Un giorno di regno» por Dante Ranieri, i realizó diversas reprezentasiones de «La voix humaine» de F. Poulenc. En todas estas reprezentasiones demonstró duktilidad shénika. Se prezentó en el Carnegie Hall en New York, i partisipó en los Ciclos de Fundación San Telmo.
En La Scala de San Telmo prezentó «Youkali» (Kansiones de Weill i Gershwin), diversos resitales de kanto i piano i «Le chant de Marianne» ( las kansiones de las mujeres durante la Revolusión franseza. Se graduó komo lisensiada en Múzika, Profesora Superior de Múzika i Doktora en Múzika en la Spesialidad Muzikolojía en la Fakultad de Artes i Sensias Muzikales de la UCA. Por su aporto a la investigasión del Kansionero Sefardí en Sud Amerika, resivió la beka para Hispanistas Anyo 2000 del Ministerio de Asuntos Exteriores de Espanya.
Publikó 9 CDs de los kualos «Cantares de Sefarad» salió en dos volumes.
[print_link]
