eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Eduardo Ghoulart
Kantador, baylador i muzisiano
(Brazil)
Eduardo Ghoulart, nasió en la sivdad de São Paulo, la mas grande sivdad del Sud América, sentro finansiario del Brasil, el 22 de Agosto del 1984. La famiya de su madre viene de Fransia i Portugal i la de su padre viene de Portugal i Olanda, de los anusim: una istoria muy ermoza, ma dolorosa, de retorno en teshuvá. Estudió en una sivdad del interior de São Paulo i después en la kapitala, en el «São Thiago Colege».
Oy bive en São Paulo de muevo, kapitala del Estado de São Paulo. El es un artista braziliano, ke diviza su talento kon el mundo i es konsiderado komo un djoven esponente de la múzika sefardía i del ladino. Eduardo se okupa de envestigasión kultural, mesklando las tendensias internasionales a la múzika pop kon la enfluensia djudía lokal. Aze parte de la komunidad djudía, lavorando en múzika i bayles, kon el movimiento djuvenil «Chazit Hanoar» (Fronte de la Djuventud).
Su lavoro variado en la komunitá djudía se derama, en reprezentado artistikamente varias asosiasiones djudías i israelianas en enevenimentos nasionales i enternasionales. El performa en bayle, literatura, poezía i múzika. Reprezentó la Asosiasión brazialiana «A Hebraica» en Saõ Paulo, el «Jewish Cultural Center» (CCJ- Sentro de Kultura Djudía) i la «Congregação Israelita Paulista» (Kongregasión de Saõ Paulo). Eduardo partisipó a varios otros festivales, komo el «Klezmer Festival», komo reprezentante del Macabi i a «Hava netze Bemachol Festival» (Ven empesaremos a baylar) en Rio de Janeiro. Está kompetiendo agora en un programa de múzika de Israel, yamado «Hallelujah, Global Jewish Singing Contest».
Su komunitá está muy feliz i roga al Dio ke Eduardo aga parte de la sigunda faza del programa, ke tendrá lugar en Israel, en Desiembre i Enero. Resientemente partisipó a un konserto en Israel, sponsorizado por la Macabiá, i tuvo una exibisión en el Festival de Karmiel. Además él kantó kon Betty Klein, durante una nochada enolvidable en Yerushaláyim. Debasho de la koordinasión superior del Rav David Weitman, Eduardo sinyó el kontrato por un esfondo muzikal kon el muzisiano Daniel Tauzsig para el filmo «200 Years of Mediteranean Jewish Immigration» (200 Anyos de la Imigrasión Djudía Mediterránea) de Marcio Pitliuk, kon el senario de Daniel Anker, i editado por Melina M. Knoploch.
Matilda Koén-Sarano, 2013
