Las Notas de Matilda – Kantadores de la tradisión djudeo-espanyola: Aharón Perera

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

 

Aharón Perera

Kantador, aktor i moderator
(Yerushaláyim)

Aharón Perera, ijo del kantador Avraham Perera de bindicha memoria, nasió en Yerushaláyim en el 1962, ande kresió i bive. En su chikés él oyó el kanto en ladino i la múzika israelí. En la armada izo parte del koro de Tzáal. Después se adjuntó al trío «Oppa ey» al lado de Igal Bashán i Avi Dor. El programa fue dado en el primer kanal de la Televizión entre los anyos 1990-1995 i turó por 6 sezones, produsió 5 albumes i 6 piesas sovre la shena. El trío tuvo sukseso en el «Festigal» también. En el 1992 arivó al primer lugar kon la kantiga «Ey atzor» (Ey, kédate). En el 1993 arivó al sigundo lugar kon la kantiga «Osim saméah» (Azemos fiesta). En el 1995 el trío arivó de muevo al sigundo lugar kon la kantiga «Kshé iesh lehá haver» (Kuando tienes un amigo). En el 2000 el trío se despartió definitivamente.

En el 1993 Aharón partisipó a la kaseta video para kriaturas «Shirim ktanim» (Kantigitas) al lado de Hani Nahmías i Irit Anavi. En el 2001 empesó a prezentar por radio el programa «Lo le nashim bilvad» (No sólo para mujeres). Además prezentó el programa de envitasión televiziva «Behevrá tová» (En buena kompanía). Oy Perera edita i prezenta programas en la Redes Bet i Gimel de Kol Israel, komo «Emtza ha-déreh» (A metá kamino), «Kabalat shabat», «Halonot, magazín múzika» (Ventanas, magazín de múzika). Además tiene en la Televizión el programa para kriaturas «Oppa Ey» kon Igal Bashán i Avi Dor, i kontinúa su programa «Be-hevrá tová», ande vienen ospitadas figuras de la kultura Israelí.

En estos últimos tiempos Perera empesó a apareser kon las kantigas kon las kualas kresió: las kantigas de la kaza de su padre; romansas sefardías, kantigas de Yerushaláyim, kantes en ebreo i kantigas de kriaturas. Aharón aze partisipar al públiko, konta vivensias del panorama de su chikés i del kurtijo de Yerushaláyim. El asezona las kantigas kon kuentos pikantes, i además da una reprezentasión variada kon pedasos de kolegamiento de sus programas de radio i de televisión.

Uno de los programas de Aharón vierte sovre la figura de su padre, Avraham Perera.
Este anyo partisipó por tres vezes a los «Días de leche i miel» en el Yam Amélah,
komo moderator de un simpozio entre aktores, kantadores i moderatores de la Radio i la Televizión, ke kontaron de sus chikés i de sus famiyas de orijín.

Aharón Perera reprezenta la sigunda jenerasión de los kantadores en ladino i en ebreo.
Matilda Koén-Sarano, 2013