eSefarad Noticias del Mundo Sefaradi
MUCHA MIEL BULANDREA
En el vizindado muestro, en el mizmo kortijo, bivia Eli kon su padre. Eli era un guerfano, ma no fue nunka mi amigo, porke entre mozotros avia una grande diferensya en anyos. Kon mis sesh ermanas, se entendiya mas mijor.
En vezes venia a komer ande mozotros. Se asentava a la kyoshe de la meza arrepozadiko, muy timido, arresentado, apenas komia o avlava. Era muy delgado, mal komedor, i mal vistido. Mi papa ke tenia una mano avierta, i mi mama ke tenia un korasón de oro, tenian piadad de este ijo i la djente mezmo dizia ke la famiya mia lo avia aprofijado. Su vestimyenta era siempre vieja, uzada, o regalada por el “Malbish Harumim” la sosyeta de byenfezensya ke mi mama prezidia.
Eli apenas komiya, kon la kara mirando solo el chini suyo, i solo se le avrian grandes los ojos kuando mis ermanikas, después de komer, se metian a kantar.
Poveretiko. Despues, el se iva repozado komo avia vinido, bezando la mano de mi vava i de mi madre, para ayudar su padre a vender borrekas.
Mis ermanikas, viendo ke le plazia kantar, i ke tenia una bos dulse i klara, fuerte i ermoza, empesaron a kombidarlo a kantar kon eyas. Todas mi ermanikas kantavan muy ermozo i djugavan el piano. Tenian todas un talento para la musika, i kada una en su manera alumbrava el korasón de mis parientes. Yo fui el uniko ke no savia o pudia kantar, no supe meldar notas, ma malgrado esto me tomavan para aboltar las ojas.
Yo mirando komo mis ermanas djugavan kon kuatro manos el piano, empesi a akodrarme kuanto era nesesario para aboltar las ojas, ma todo esto era leshos de kantar. Kon el tyempo mis ermanas salyeron a kantar en el publiko, a la okazyón de una fiesta o otra en el “Bet Am” o en kazas de amigos. Tomaron a Eli i a mi desharon en kaza.
Un dia toda la keila djudia se apronto para selebrar la fiesta de Hanuka en la keila. Entre los aparejos de la fiesta avia la merkada de pantalones para Eli. Komo el era delgado i chiko, el pantalon ke merkaron le fue muy largo. El vino ande mi vava para demandarle de akurtarlo. Mi vava okupada kon los fostanes de mis ermanas, no tupo tyempo, i le refuzo, embiandolo a los otros myembros de la famiya. Eli bushko en primero mi mama, duspues mi ermana, i a la fin mi tia. Todos estavan okupados i le refuzaron. El desho el pantalon sovre el sesto al lado de la entrada de la kaza.
La noche antes de la fiesta, mi vava teniendo piedad de Eli, tomo la tijera, korto unos 2 sentimetros, i lo akurto en metiendo de muevo el pantalón sovre el sesto. Ayi lo topo mi mama, ke de mezmo le izo mal de refuzar a Eli, i eya akurto el pantalón de 2 sentimetros. Sin saver esto, mi ermana, i después mi tia, akurtaron el pantalón i lo metieron sovre el sesto.
El dia de la fiesta, todos se vistieron elegantemente i Eli tomo su patalon. del sesto. Ke vido el poveritiko en metiendolo?…… El pantalon akurtado le vinian solo fina las piernas. Una desgrasya, ke verguensa!!! Se emmudesyo.…
.
No avia mas tyempo para trokarlo. Imajinavos ke me tomaron a mi a la fiesta para aboltar las ojas.
Rivka Abiry
Del livro UNA LÁGRIMA UNA RIZA – Lo ke mos konta Rivka
Rivka Abiry partaja kon mozos sus konsejas, Estos kuetizikos son kontados por Rivka kon la grasia ke ya mos tiene akostumbrados.
Fuente: Enviado por Rivka ABIRY / Haifa
