eSefarad Noticias del Mundo Sefaradi
En los 1950 i 60 en la Amerika (Estados Unidos) avia un komedianto djudio, Sam Levenson, ke era muy famozo, estava muncho en la TV, i tambien era eskritor i jurnalisto. Mas de todo el era un filozofo umoristiko, i envento munchas dichas ke se izieron kaje proverbios en inglez.
Sam Levenson murio djusto 30 anyos antes, el 27 Augusto de 1980, a la edad de 68 anyos.
Aki vos do algunas de sus famozas dichas, traduizidas/tresladadas a muestra lingua:
“La lokura es ereditario; te viene de tus ijos.”
“Ser meoyudo es muy kolay (fasil.) Pensa una koza
estupida para dizir, i no lo digas.”
La famoza i ermoza artista Audrey Hepburn tanto uzava algunas linyas de Sam Levenson, ke a munchos les parese ke es eya ke las envento.
“Si bushkas alguna mano de ayudo, toparas una a la punta de tu braso.” (Lo ke dizia Sam Levenson es: “kuando yo tenia 5 anyos, mi papa metyo su braso en mis ombros i me disho: Si bushkas alguna mano de ayudo, toparas una a la punta de tu braso.” )
Esta fraza estava a la fin de un pasaje mas largo ke, tambien Audrey Hepubrn lo sitava muncho:
«Konsejos de ermuzura komprovados por el tiempo:
Para tener mushos ermozos, avla palavras de buendad.
Para tener un puerpo delgado, partaja tu komida kon los ke tienen
ambre; para tener ermozos kaveyos, desha ke una kriyatura meta sus
dedikos en eyos una ves al dia. Para tener hen i grasia, kamina
saviendo ke nunka vas andar sola. Las personas – mas ke las kozas –
tienen menester de ser restoradas, renovadas, rebividas, reklamadas, i salvadas; nunka no eches a dingunos en mal.”
I una dicha muy serioza suya, ke tiene sinyifikasion grande sovre todo en estos diyas, ande las kriaturas van demandando
mas i mas:
“Una kriyatura no puede ser prove si tiene padre i madre ke se enteresan en el i bive en una kaza yena de livros.”
Rachel Amado Bortnick
Dallas, Texas
Para Ladinokomunita
