eSefarad Noticias del Mundo Sefaradi
Doña Gracia Nasi nasyo en 1510 en Lizbon. Apartenia a una famiya de marranos de Espanya ke se avia refujiado en Portugal. En 1536, paso a la Evropa, para evitar la Enkizisyon, i bivyo ayi en kamuflando su relijion. Portanto, en segito a una denunsion fue arestada. Despues de ser liberada, se establisio kon su famiya en Estambol. Esto todo no le empidio de dirijar una de las mas poderozas kompanyiyas de negosio de su tiempo. Uzo su fortuna i sus koneksiones para provechar a sus korrelijionarias en kreyendo trayektorios de salvasion, i en prokuandoles empleos, sinagogas, institusiones de bienfezensia i de edukasion relijioza. Fue partikularmente instrumentala en los Balkanes i la Mediterranea. Una inkarnasyon de vijilensia, de determinasion i de kuraje, Doña Gracia negosio kon soverenos, i mizmo los disputo. Konsiderada entanto ke una de las eroinas de todos los tiempos del puevlo djudio, su estoria fue una leyenda durante su vida.
En Febrero 9, 2010, fue selelebrado el kensentenial aniversario de su nasensya. Este artikolo, ke trata de una de las mas sinyifikantes epizodas de su karyera, es publikado en omaje a su memoria. (*)
——————————————————————————————————
Ancona es un porto maritimo en la kosta adriatika de la Italia. La data egzakta del aresentamiento de los djudios en esta sivdad no es konosida. Se save ke su poulasion djudia avia pujado kon el arivo de refujiados djudios de la Sisilia, del Reynado de Napoli, i de los marranos de Portugal i de la Espania.
Durante la istoria, la komunitad djudia de Ancona fue el obyekto de restriksiones, komo la obligasion de yevar un insinio partikular i de morar en el geto. En 1532, la proklamasion de Ancona en tanto ke un porto avierto al komersio internasional, tuvo konsekuensas kontroversiales por los djudios.
La populasion de Ancona pujo i merkaderos de diferentes payizes i de diferentes relijiones se establisendosen en Ancona para gozar de esta libertad. Ansi, Ancona devino un porto de primera importansa, komprando kon el Levante i kon portos importantes de su tiempo.
Portanto, en 1555, kon un muevo orden, mezuras anti-djudias fueron aplikadas. Los djudios fueron segregados en el geto. Les fue defendido de apropriarsen de bienes imobiliares, i de dirijar direktamente sus komersio. Una legasion papala fue spesialmente mandada a Ancona para kontrolar a estas limitasiones. Esto provoko el egzodo de una partida de la populasion djudia. Munchos konversos fueron entretiempo imprisonados i torturados. Una partida de estos reusho a fuirse de la sivdad. Una otra partida fue transferada a la prision en la isla de Malta, kuando 24 de entre eyos son kemados en el ogar, por aver renegado el Kristianismo en observando el Djudaismo.
Esta trajedia provoka una grande konsternation en el Mundo djudio. La memoria de estos martirios es perpetuada kon elejias ke se resitan el dia de Tesha beAv, ainda en muestros dias.
La Intervansion Otomana i el Boykoto
Estos evenimientos akontesieron kuando Ancona azia parte del redo de komersio de la famoza familia marrana Mendes/Nasi. Gracia Mendes/Nasi i Yosef Nasi se avian desde doz anios aresentado en Estambol. Kon el arivo de la novela de arestasion de los marranos de Ancona, Dona Gracia avia demandado la intervension del Sultan Suleyman el Magnifiko. El Sultan se adreso direktamente al Papa i solisito la liberasion de estos prizonieros, ke konsiderava ser sujetos otomanos basho su proteksion. Portanto, esto no pudo empidir la egzekusion de 24 de entre eyos.
En esto, Dona Gracia desido de proklamar el boykoto sovre el komersio verso el porto de Ancona, en transferando el transporto de los bienes al porto de Pesaro. Pesaro, mismo ke es vizino de Ancona, no era basho la soverenia papala. Asigun el plano, este boykoto ke turara ocho mezes en el empesijo, tenia por buto de aflakar el poder ekonomiko de Ancona. Entretiempo el duko de Presaro dyo refujio a los konnversos ke parvienen a fuirsen de Ancona.
En el buto de realizar este boykoto, Dona Gracia se adreso a las altas personalidades i interesados de la komunitad djudia. Para ke puede reushir, esta inisiativa devia ser respektada por todos los komersantes djudios, ke utilizavan el porto de Ancona. Yoshua Sonsino, el Rabino de Saloniki, aunke lo avia aprovado en el empesijo, se opozo mas tadre a este boykoto. El perikolo ke en segito de este boykoto, todas las komunitades djudias basho la soverenia papala poderian ser persekutidas fue la razon de esta opozision.
De otra parte, la fayita del boykoto puederia meter en perikolo los ke ya se avian fuyido a Pesaro, porke el sovereno de esta sivdad seria ensaniado de konstatar ke los gastes echos para aparejar este porto a un komersio mas ancho fueron en vano.
Sonsino es kon el tiempo apoyado por una partida de los merkaderes i otros rabinos, ke fueron de antes partizanes del boykoto. De este modo, la unitad ke es indispansable para implementar a este boykoto se dezaze i el komersio empesa a aboltarse progresivamente a Ancona.
Portanto, la prediksion de Dona Gracia se avera djusta. El Duke de Urbino ke reyna sovre Pesaro, desida de ekspulsar no solo a los konversos djudios muevamente arivados de Ancona, ma, i a los ke se avian establisido ayi de antes. Los ekspulsados de Pesaro son viktimas de naves ke salen de Ancona. Eyos son kapturados, persekutidos i vendidos entanto ke esklavos.
Sovre la Istoria de los Djudios de Italia
Conversos de Espania i de Portugal ke se avian establisido en la Italia, kontinuaron a praktikar aviertamento el Djudaismo. Sus konsantrasion en el geto los avia aserkado entre eyos i avia renforsado la konsiensia de sus apartenensia djudia. De mismo, eyos se avian adaptado de una manera favorable a la kultura italiana i a sus uzos. Ansi, fueron i eyos influansados por el movemento de la Renesensia ke se estava propajando en la Italia – en kreando esta ves sus propria Renesensia. Es en este konteksto, ke imprimerias fueron fondadas en la Italia i kopias del Talmud fueron por la primera ves imprimadas. Eskolas prokuraron la edukasion del Djudaismo i de la lingua ebrea, en mismo tiempo ke estas komunitades enfloresen en el komersio.
Portanto, mismo la empatia jenerala del puevlo italiano, el Papa Paul IV sintia un aiso personal verso el puevlo djudio. En el orden ke avia deklarado, este aiso fue ekspresado de una manera muy klara. El dia de Rosh haShanah del anio 1553, livros en Ebreo fueron kemados despues ke fueron amasados en las plasas en Roma i en las otras sivdades papales, entre eyas Bolonia i Ravenna. De mismo en Venezia, ke era el prinsipal sentro de la imprimeria djudia, los livros en Ebreo tuvieron la misma suerte.
La egzekusion de 24 konversos en Ancona fue la konsekensua de este proseso de manifestasiones antisemitas. La inkulpasion de la Eglisia era, ke malgrado ke se avian konvertido al Kristianismo, eyos estavan aktivamente pratikando el Djudaismo. El «Dirito Divino» de la Eglisia era de purifiar sus almas, i esto se podia realizar solo en kemando sus puerpos.
La desizion del Boykoto, ke fue tomada en segito de la trajedia de Ancona, es konsiderada entanto ke la primera tentativa del Mundo djudio de utilizar su poder ekonomiko kontra la persekusion. Portanto, los esforsos de aktuar de una manera unida se dezazieron sin traer los rezultados suhetados. Aparte ke este boykoto no avia reushido, los djudios kontinuaron a ser persekutados por la Eglisia katolika.
El Proyekto de Tiberya
Las konsekuensas amargas de esta inisiativa fueron una de las prinsipales razones de un otro proyekto de orden politiko i ekonomiko por la salvasion del puevlo djudio. Esta ves, Dona Gracia i Yosef Nasi se aboltaron verso la Tierra Santa. Sus demanda de establisir en Tiberya i en su entorno una kolonia djudia para salvar a los djudios persekutidos en la Evropa, es akseptada de una manera favorable por el Sultan otomano. Sus buto es de kreer una aglomerasion djudia ke funksionara de una manera otonoma i ke sera el fondamiento del Estado djudio en el futuro. Tiberya i sus murayes son restoradas, i aparejos enpesan para el desvelopamiento de una aktividad agrikola i la manifaktura de ropas.
El apelo a los djudios de establisirsen en Tiberya aze un sierto efekto. Naves salen en kamino para trayer a la Tierra Santa a los ke respondieron a este apelo. Una parte de estas son kapturadas par los korsarios.
De otra parte, el numero de djudios ke parvienen a establisirsen en Tiberya no es bastante para realizar este proyekto. Eyos son atakados por la povlasion araba ke se revolta i los sakean. Todo esto empide la realizasion de este proyekto ke devia ebranlar el Mundo djudio en propajando la esperansa de la Redampsion. Kon los anios, sus inisiadores perien i eyos sus intereso i el proyekto kaye en el ovligo.
* * *
Ni el boykoto de Ancona, i ni el proyekto de Tiberya reusheron a empidir las persekusiones de la Inkizision. Portanto, la trajedia de Ancona fue el manadero de estas dos inisiativas de orden politiko i aktivo, sin antesedente en la istoria djudia.
De este punto de vista, esta trajedia ke akontesio en 1556, tiene una signifikansa partikulara en los esforsos del Mundo djudio i de los sefardis en partikular, para la union i la solidaridad, i en la istoria de sus atadijos kon la Tierra de Israel.
———————————————————
(*) En Desiembre 1990, una seremonia komemorativa fue organizada en Tiberia por la asosiasion MORIT de los turkanos de Israel, la Munisipalidad de Tiberia i WIZO a la onor de Do?a Gracia Nasi. Kon esta aktividad, por la primera vez en su estoria la sivdad de Tiberia eksprimio su apresiasion a su kerida Seniora.
En el kadro de esta aktividad, Gad Nassi kon Rebecca Toueg, redaktaron un ovra biografika, entitulada livro biografiko entitulado Do?a Gracia Nasi, ke es posible de abashar del Internet por la koneksion:
http://www.gadnassi.com/files/publications/Do?a_Gracia_Nasi.pdf
ANCONAFIG.1
Sin eskrita
ANCONAFIG.2
La trajedia en Ancona,
Arthur Szyk, «The last
days of Shylock»
por Ludwig Lewisohn
ANCONAFIG.3
El porto i la karta de Ancona, siglo XVI – XVII
ANCONAFIG.4
Tiberia,
siglo XVII
Muy ermozo artikolo.
R