eSefarad Noticias del Mundo Sefaradi
La sinyora Lili Menachem, fija de Moshe i Paulina Sustiel, orijinarios de Espanya, nasio en 1918, en Salonik.
Eya fue edukada en institusiones djudias – desdel jardin de kreaturas i asta el seminario de maestras para kreaturas, en el kual los profesores eran de Eretz Israel.
Desde su manseves eya dediko su tiempo ayudando a los menesterozos de la komunita de Salonik.
Fue miembra en el movimiento sionista i sus aktividades para Eretz Israel, ansi ke fue, tambien, una de los fondadores del movimiento «Pioneros Djovenes» «HA HALUTZ HA TSAHIR» en Gresia, organizasion mondiala ke ayudo a los djovenes djudios a azer aliya a Eretz Israel.
El buto de estos djovenes era de dezvelopar Israel.
En 1935, Lili emigro a Palestina i se aresento en el barrio Neve – Shalom, en Yafo. Poko despues, kuando desbrocharon los pogromes kontra los djudios de Yafo, i kon la inisiativa de la «Organizasion de Las Madres Ovreras» – «IRGUN IMAOT OVDOT» – Lili partisipo aktivamente en la evakuasion de las kreaturas de la rejion ke estavan en perikolo, alevantando un kampamiento de tiendas al bodre de la mar, en Tel Aviv.,
Despues ke se kazo kon Yosef Menachem, en 1936,eyos moraron en el kuartier Florentin, ke azia parte de Yafo, ande Lili avrio un jardin de kreaturas para un largo dia «de estudios!!», afin de posibilitar a las madres de salir a lavorar.
Lili lucho enerjikamente para la aneksion de los barrios del de Yafo, a la sivdad Tel Aviv.
En 1942, la famiya Menachem paso a bivir a Shehunat Hatikva, ke era entonses muy poko povlada, i amenazada por los arabos ke moravan en su deredor. Es entonses ke Lili desidio de mobilizar a mujeres voluntarias para ayudar a los defensores del barrio. Eya fue tambien, una de las aktivistas ke se preokuparon por el bienestar de los abitantes. Djuntos kon la kolaborasion de la «ISTADRUT» i de la munisipalidad de Tel Aviv establesieron enfermerias, institusiones kulturales i edukativas.
Despues del Holokausto, la sinyora Menachem se dediko a la absorpsion de los reskapados de la Shoa, prinsipalmente de los sovrebivientes de Gresia. Eya kumplio el posto de prezidente de las mujeres imigrantes de Gresia.
Durante la gerra de la Independensia eya drijio,en SHEHUNAT HATIKVA, el departamento de ayudo a las famiyas de los soldados mobilizados, i se preokupo de los muevos imigrantes ke bivieron en las «MAABAROT» i ke se establesieron en este barrio. Eya fondo klubes para kreaturas; i se enkargo del ensenyamiento de ufisios a las ninyas i mujeres,, enkorajandolas a salir afuera de sus kazas i ayudar al mantenimiento de sus famiyas.
En 1953, la Sra. Lili, fue elijida al posto de: «Sekretaria Aktiva de la Organizasion De Las Madres Ovreras» «IRGUN IMAOT OVDOT» i se perokupo de la edukasion de los djovenes en los kartieres del Sud de Tel Aviv.
La sinyora Menachem fue aktiva en el kampo del Ladino tambien. En 1954 eya fue nominada al posto de direktora de las emisiones en Djudeo-Espanyol de KOL ISRAEL i partisipo a la seria de sketches umoristikos «Shimon Shimon», eskritos por Yitshak Benrubi, ke fueron emetidos kon grande sukseso .
Sus artikolos en Ladino fueron publikados en el jurnal El Tiempo.
En segito a sus aktividades, Lili Menachem fue elijida, en 1959, al konsejo munisipal de Tel Aviv.
En el jurnal «La Verdad» fue publikado, en este mizmo anyo un anunsio diziendo – ke el mayor de Tel Aviv sinyor Mordehay Namir nomino a la Sra. Menachem komo miembra de las komisiones de finansias, de edukasion i de sport de la munisipalidad de Tel Aviv.
Las aktividades sosiales de Lili tuvieron lugar afuera de Israel tambien. En el kuadro de su posto eya fue embiada a Amerika del Sud, Turkiya , Chipre i otros paizes mas en los kualos fondo sukursalas de apoyo para las mujeres ovreras, el «MOETSET ‘HAPOAALOT». En el jurnal «El Tiempo» del mez de Septembre 1958, fue publikado un reportaj sovre el kongreso internasional de mujeres ke tuvo lugar en Alemanya kon la partisipasion de la Sra Lili Menachen ke avlo sovre tres butos importantes ke ay de tomar en kosiderasion kuando se trata de los butos del sosialismo i el adelantamiento de la pozision de las mujeres:
1. Adoptar metodos modernos afin de atirar a la djoventud a los ideales del sosialismo.
2. Mantener un kontakto permanente entre las mujeres sosialistas del mundo i yevar ,si ay menester, una lucha dientro los partidos afin de mijorear la situasion de la mujer ovrera.
3. Dar a las mujeres el apoyo, i el sentimiento afin ke poderan saver sus verdadera valor i de sus posibilidades de aksion.
Durante los anyos 1983 – 1985 Lili kumplio el posto de prezidente de la Organizasion «NAAMAT» en Tel Aviv, esforsandose a mijorar la situasion de Shehunat Atikva, Shehunat Shapira i Florentin . Eya fue la boz de las mujeres ovreras de orijin Sefaradi/Mizrahi ke no savian ekspresarsen en publiko i reklamar sus derechos.
En sinyo de rekonosimiento a su kontribusion en el kampo sosial, le fue dedikado el titulo de «Onorada de la ISTADRUT i de la sivdad Tel Aviv» i una de las kalejas de la sivdad fue yamada al su nombre.
En konkluzion – penso ke sin duda, la onorada sinyora Lili Menachem, mujer de altas kualidades i fuerte de karakter, de orijin Sefaradi, nasida en un epoka en la kuala el lugar de la mujer era dientro de su kaza kon el dover de kudyar a su marido i a sus kreaturas, eya fue una pioniera ke merese ser akodrada i alavada por las aktividades a las kualas dediko su vida.
La sinyora Lili Menachem mos desho la vida en 2005.
Sea su memoria bendicha !.
Eskrito por Sara Sufrin Baruch
19.1.2012
GALERIA DE IMÁGENES
| | |
| | |
| | |
| | |
