eSefarad Noticias del Mundo Sefaradi
La ‘Fiesta del Arapamiento del Kodrero’ en la Biblia,
la rekuperasion de un merito
————————————————————————————-
Un estudyo de los tekstos biblikos ke se referan a la Fiesta del Arapamiento del Kodrero revela ke, en el antiguo Israel, esta fiesta se selebrava kon alegria akompanyada de un pranso kon beveraje en ekseso. La rezolusion de litijes anteriores sosvresalen en kada uno de los kuatro pasajes de la Biblia, ande esta fiesta konstitue un evenemiento de fondo.
Selebrada en la primavera, una sezon universala de festividades, esta fiesta es markada por la rekuperasion de la lana del kodrero i su rejuvenizasion verso los dias kayentes del enverano.
Kada ves ke es mensionada en la Biblia, la Fiesta implika un evenimiento de revansha i la restitusion de un merito, favorizados por la distraksion i el libertinaje devidos a la manera de su selebrasion:
– Yakov se libera de Laban i ansi, debuta un muevo kapitolo en la istoria djudia;
– Tamar enganya a Yuda por tener atadijo kon el, i asigurar ansi su desendensia lejitima;
– David bushka una indemnizasion por aver protejado las trupas de Nabal;
– Avshalom se venga de Amnon ke avia violado su ermana Tamar, i elimina ansi el kandidato i su konkurente a la trona de su padre.
Yakov
la Instorasion del Puevlo Ebreo
A la instigasion de su madre Rebeka, Yakov avia profitado de la siegedad de su padre Izak para azerse pasar i ser bendizido entanto ke su ermano Esav, i ansi, ser rekonosido komo el ijo behor i gozar de sus diritos. Para protejar a Yakov de la enemistad ferosa de Esav verso Yakov, Rebeka avia desidido de mandarlo ande su ermano Laban, en Haran.
Kuando fue resivido por Laban, Yakov se metio en regla kon Laban para lavorar durante syete anyos ande el, para kazarse kon Rahel. Portanto, durante la boda, Laban troko a Rahel kon Lea, su otra ija. Entonses, Yakov tuvo de lavorar otros syete anyas, para kazarse esta vez kon Rahel.
Despues de aver kumplido el segundo mandato de syete anyos, Yakov se kedo ande Laban otros sesh anyos, konformamente a un akordo asigun elkual, Yakov resivera las ovejas i las kavras manchados ke naseran, por salario de tener kargo de las trupas de Laban. Portanto, Yakov derota el plano de Laban en enganiandolo por medio de palos ke mete delantre de las mas sanas de estas, a ke pareskan komo manchadas. De esta manera, Yakov amasa una grande fortuna.
Entonses, Yakov despierta el selo de los ijos de Laban, i se rende kuento ke Laban mizmo se asosia a eyos. Kuando una revelasion divina le ordena de aboltar a Kanaan, konsulta sus espozas ke konsienten a kitar el payis, afirmando ke sus padre no tenia maz dingun dirito sovre eyas, siendo ke Yakov ya avia pagado todas sus devdas. En segito, profitando de la absensia de Laban ke estava partisipando a la Fiesta del Arapamiento del Kodrero, Yakov arekoja toda su famiya kon sus posesiones, i Rashel, sin ke Yakov lo supye, se arova, los idolos de la kaza de su padre.
Tres dias despues, rendiendose kuento de la fuyida de Yakov, Laban sale a toparlo i lo atenya en las montanyas de Gilad. Despues de una diskusion ferosa, i de la bushkidad de sus idolos ke no aprovechan, Laban kon Yakov promulgan un tratado de respekto mutual, i erijan un montikulo de piedras para komemorarlo i dezinyar la frontiera ke separara las doz partes.
Ansi, la liberasion de Yakov del patronaje de Laban, fasilitada por la Fiesta del Arapamiebto del Kodrero, kon la instorasion de la Nasion ebrea sovre la dodje trivos atados a la desendensia de Yakov, marka un punto de infleksion en su istoria.
————————————-
El Astusio de Tamar
Yuda, el ijo de Yakov, kuando se avia aresentado en Kanaan, se avia kazado kon una kanaanita. A Yuda le nasieron tres ijos. El bohor, Er, se kazo kon Tamar, ke era i eya una kanaanita.
Tamar ke era una mujer muy ermoza i muy odasioza, se komportava fidelamente a la tradision djudia.
Er, se avia murido antes ke Tamar se emprenya. La Leyenda rakonta ke Er avia topado la muerte, porke era flako de karakter i no plazia al Dio, sin dar aklarasiones sovre esto.
En akeos tiempos, el statuo de una mujer en la komunidad, dependia de su fertilidad, i el kavzo de una mujer sin kreatura era konsiderado entanto ke una maldision. .
Asigun la Ley del Levirato, el ermano de una persona ke avia murido sin tener kreatura, kalia ke se kaze kon su bivda para engrandeser las kreaturas del defondo. Es a Onan, el segundo ijo de Yuda ke kayiya de konformarse a esta Ley. De otra parte, el ijo behor ke Tamar iva parir, iva ser konsiderado en tanto ke el ijo de Er, i iva ser el eredor del klano de Yuda al lugar de Onan.
Por esto, Onan se detuvo de emprenyarla a Tamar. Esto le desplazio al Dio, i Onan topo la muerte.
Agora, Shila, el mas mansevo ijo de Yuda devia de kazarse kon Tamar. En fakto, Yuda le aprometio a Tamar ke le iva dar a Shila por marido, ma konsiderando ke Shila ainda era muy mansevo, Tamar devia de asperar ke se engrandese para inchir su dover. Entretiempo, Yuda avia mandado a Tamar a la kaza de su famiya en egzijando de eya de komportarse konformamente a una bivda.
Anyos pasaron. Kuando Shila ya avia arivado a la maturidad, Yuda se detuvo de kazarlo kon Tamar, pensando ke eya era una mujer fatala por sus maridos.
A la fin, kuando Tamar ya avia entendido ke Yuda no estava pronto de tener su promesa, eya izo su plano para pueder realizar su dirito de tener un ijo de la famiya de Yuda.
El Enganio
Esto todo se paso durante del festival anual de la selebrasion del arapamiento de la lana del kodrero. Asigun la tradision, esta fiesta era selebrada kolektivamente kon bevienda, muncha alegria i libertinismo.
Entretiempo la mujer de Yuda se avia murido, i Tamar estava en koriente ke Yuda iva asistar a esta fiesta. Entonses, se kuvrio i se degizo komo una putana i tapando su kara kon un velo se plaso a la entrada de la sivdad, en el kamino de ande Yuda se aprontava de pasar.
En estos tiempos la prezensia de una putana en la entrada de una sivdad, seando un komportamente konosido, Yuda ke no duto de nada, se aserko a eya i demando sus servisios, en kambio de uno de sus kodreros ke le prometio de mandarla.
Tamar demando d’el de deshar ande eya en prenda de su engajamiento, su vara i su seyo kon su kordela. Lo ke Yuda aksepto.
Mas despues kuando Yuda mando a una persona kon un kodrero para pagar su devda i rekuparar su prenda, se avero ke la mujer misterioza ke lo avia seduizido avia desparesido i era enteramente deskonosida a la djente.
Tamar, ke ya se avia aboltado a su kaza i asigun la tradision, se vistio de muevo komo una bivda. Despues de tres mezes la djente remarko ke Tamar estava prenyada.
Yuda pensando ke Tamar se avia dezonorado, la kondano a ser kemada. La leyenda rakonta ke en primero, Tamar se detuvo de revelar el nombre de Yuda, para no umiliarlo i enkulparlo en publiko. Es solo kuando fue yevada a ser egzekuida ke divulgo las prendas de Yuda en ekslamandose:
«Los estas rekonosiendo a esta vara i a esto seyo kon su kordela?»
Yuda, konsiente de su akto i de su responsabilitad, respondio:
«Eya es mas djusta de mi.»
I la delivro de la muerte.
* * *
Tamar era mas djusta de Yuda porke Yuda no avia tenido su promeso de kazarla kon Shila. El union de Tamar kon Yuda permetio de salvar la kontinuasion de la desendensia de Yuda, i de la Kaza de Israel. A Tamar le nasieron dos buchukes: Peres i Zerah. De Peres iva kaminar la asendensya del Rey David.
————————————-
La Intervension de Avigayl
Avigayl era una mujer ermoza i intelijente. Era kazada kon Naval, ke era muy riko. Afito ke kuando David , fuyendo del Rey Shaul, se estava refujiando en el dezierto, Naval estava okupado por el arapamiento a sus mil kavros i tres mil kodreros en el Karmel.
David, kuando fue al koriente de esto, se adreso a diez de sus servidores:
«Vavosh ande Naval i saludaldolo en mi nombre, en ogurandole ‘Vidas largas a ti i a tu kaza! Sanedad buena a todos ke te apartiene! I el mos kudyara».
Les respondio Naval:
«Ken es este David? De ke kale ke le de mi pan i mi agua, i la karne ke degoyi por mis servidores, i darlos a esta persona? Ken save de ande vino por aki?”
Kuando estas palavras fueron reportadas a David, David se ensanyo. Ordeno a 400 de sus soldados de tomar sus espadas i de adjuntarsen a el para atakar a Naval.
Uno de los servidores de Naval supo a esto, i avertiso a Avigayl, de lo ke estava para akantoser.
Al kontrario de Naval, ke era una persona de karakter difisil i otorativa, Avigayl, a parte ke era muy ermoza i era plazentera.
Imediamente, arekojo syen migas de pan, doz kueros yenos de vino, sinko kodreros, sinko sakos de granos tostados, syen gatos de pasa i dozyentos gatos de igo. Despues de averlos kargado sovre los aznos, salio al enkontro de David.
Kuando apersivio a David al lado de un ravino, Avigayl abasho de su azno, i saludo a David en abokandose kon su fasha mirando a la tierra. Se echo a sus piezes i le disho:
«Mi senyor, ke todo el pekado sea por mi solo. Permete a tu servidora de avlarte i oye lo ke tyene de kontar. Mi senyor, no des importansa a lo ke te izo este ombre visiozo. Naval es un bovo, i la bovedad esta syempre kon el. Portanto, yo so su servidora, i no tengo visto los mesajeros ke enbiates ande el».
Demando de David de transmeter las komanias a su djente i de pardonar a su marido. David fue de akordo i se retiro.
Kuando Avigayl se abolto a su kaza, topo a Naval borracheado, en las sirkonstensyas del banketo de selebrasion de la Fiesta del Arapamiento. Despues ke vino en si, Avigayl le konto sovre su enkontro kon David. En esto, Naval se endurmesio entero i despues de diez diyas se muryo.
Kuando David lo oyo a esto, se konvinsio ke la djustisia fue rendido. Enbiyo mesajeros en demandando de Avigayl de kazarse kon el.
Avigayl, pishin se suvyo a un azno, akompanyada por sinko de sus servidores, se fue ande David, i se kazo kon David.
Les nasyo un ijo yamado Hilab, i en syertos dokumentos, konosido en tanto ke Daniel.
————————————-
Amnon<
la Restitusion de un Sakrilejio
Amnon, el ijo behor del Rey David, era el primer kandidato de la Trona de Israel. Avshalom su medyo-ermano era el segundo kandidato de la Trona.
Afito ke Amnon se enamoro de Tamar, su medya-ermana i ermana halis de Avshalom. Portanto, la Ley no permetia a los medyo-ermanos de kazarsen. I no puediendo rezistir a su pasion, Amnon se avia echo malo.
Yonadav, su primo i su amigo, le demando:
«Tu, el ijo del Rey, deke te estas aflakando d’en diya en diya, i te izites un ilo?»
Amnon le respondio:
«Es porke m’enamori de Tamar, la ermana de Avshalom.»
Yonadav:
«Echate a la kama, i azete del hazino. Kuando tu padre, el Rey David, viendra a tu lado por kudyo, le diziras: ‘Permete a mi ermana Tamar, de vinir al lado de mi, para darme a komer, para aparejar la komida delantre de mi, para pueder verla en frente de mi, i para pueder komer de sus manos’ «.
En segito, Amnon izo ke se enkamo i pretendio ke estava hazino. I kuando su padre, el Rey, vino a vijitarlo, le pregunto su demanda.
David enkomendo a Tamar:
«Vate ande Amnon para aparejarle a komer».
Kuando Tamar arivo a la kaza de Amnon, Amnon estava echado en su kama. Tamar tomo la masa delantre de Amnon i la kozyo en el orno. Portanto, Amnon refuzo de komer. Se adreso a Tamar:
«Manda a toda la djente de la kaza. I traeme la komida a mi kamareta, para ke puede komer de tus manos».
Kuando Tamar le trusho la komida, Amnon aferro su mano i le disho:
«Ven mi ermana. Echate al lado de mi».
«No,” respondio Tamar. «No me obliges, mi ermano. Este no se pude azer en muestro puevlo. No kometes a esta desgrasya! I, ande puedera yevar mi verguensa? I tu mismo seras konsiderado komo uno de los lokos de Israel».
Las suplikasiones de Tamar no empidieron de Amnon de realizar su ezeo.
Djusto despues de este akto, Amnon fue afektado por una aversion muy fuerte.
Empeso a aboreser a Tamar, i ordeno a su servidor:
«Tomala a esta, arondjala ahuera, i echa la yave a la puerta detras de eya».
Tamar despues ke fue arondjada arazgo su ropa de munchas kolores ke ainda vistia asigun el uzo por las ijas muchachas del rey. Echo siniza a su
kavesa, aferro su kavesa i se alesho en gritando i yorando.
Su ermano Avshalom le demando:
«Es ke Amnon, tu ermano, estuvo kon ti? Estes en paz, mi ermana. Amnon es tu ermano, no tomes a esto al korason».
I Tamar kedo dezolada, i topo refujio en la kaza de Avshalom. No seando mas muchacha, Tamar no era mas una kandidata apresiada para el kazamiento.
Dos anyos pasaron. Avshalom vino ande su padre para invitarlo i invitar a todos los prenses a la Fiesta del Arapamiento del Kodrero ke se estava aparejando a selebrar.
Disho David:
«No, mi ijo, no mos iremos todos endjuntos. Esto sera un grande kargo para ti».
Avshalom:
«A lo manko, permete a mi ermano Amnon de vinir kon mozotos».
El Rey David:
«Deke kale ke venga kon vozotros?»
Ma, Avshalom tanto insistio ke a la fin, el Rey aksepto ke todos sus ijos vaygan kon el.
Despues ke las festividades empesaron, los soldados de Avshalom, konformamente a su orden, se presipitaron sovre Amnon ke se avia enborachado i lo mataron.
En esto, todos los otros ijos de David, se alevantaron, se suvieron a sus kavayos, i se fuyeron.
Kuando Avshalom renkontro a Tamar, le avia demandado de estarse kayada. Esto sugjera ke de akel momento, Avshalom se avia desidado de tomar la vengansa del oprobro kometido a su ermana.
De mas, kon la muerte de Amnon, Avshalom devino el kandidato uniko al Trono de Israel.
———————————————————————
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
