La rubrika de Gad Nassi – La armada misterioza de David Reubeni

La armada misterioza de David Reubeni

 

En el mes februar del anyo 1524, debarka en Venesia un syerto David Reubeni. El kapitan del nave lo mete direktamente en kontakto kon la komunitad djudia de la sivdad. Reubeni es vistido al uzo oriental kon un turban en su kavesa i yeva una espada ornada de oro. Avla solo en ebreo, i uza de orasionar i de tomar tanid. Rakonta a todos ke es el komandante de la armada de su ermano Yosef, el Rey Djudio de Habor, en el Norte de la Arabia, i ke fue embiado por el ande los soverenos evropeos, para formar una aliansa militara entre la armada de su ermano i las armadas kristianas, en el buto rekonkistar de los Otomanos el Eretz Israel. Por esto su armada de 300.000 soldados tiene menester de armas de fuego. Su ermano es el Rey de una monarkia djudia independente, konosida entanto ke Reyno de Karanganora. Su populasion es formado por los trivos Reuben, Gad i un parte del trivo Menase, deportados al tyempo por Salmanesar, el Rey de Ashur. Proklama ke es desendiente del Rey Shelomo i ke apartiene al trivo Reuven. Asigun su estoria, tiene traversado la Peninsula Araba, la Abisinia, el Sudan, el Ayifto, Yerushalayim i Damasko antes de arivar a la Evropa.

Aunke la egzistensia de un Reyno djudio en la Asia kon una armada tan poderosa no es konosida en la Evropa, Reubeni provoka una grande kuriozidad en el mundo kristiano i una grande emosion en las komunidades djudias, persekutidas por la Inkizision. En akeyos tyempos de adversidad i de umiliasion, David Reubeni, kon su aparensia misterioza de kombatante, es en efeto la inkarnasion konkreta del Salvador leyendario, del Mashiah tan ekspektado.

Reubeni ariva a Roma, akompaniado de un grupo grande de djudios i es resivido por el Papa Klemente VII . Aspera un anio entero en Roma, para ke el Papa se deside. Alafin resive una letra de rekomendasion del al Rey de Portugal, ande ariva en 1525. En Portugal, Reubeni provoka una grande komosion entre los konversos. Su aparision parese trokar el proseso de la Inkizision ke se esta preparando para ovrar kon toda su amplitud. Reubeni afirma de muevo ke tiene menester del ayudo kristiano para delivrar la Tierra Santa de los turkos, i en retorno su monarkia se esta angajando a akordar a los kristianos, la dominasion de los lugares santos del Kristianismo en Yerushalayim.

Reubeni es resevido en el palasio real de Lisbon por el Rey Juan III, kon todo la onor nesesitada para resivir un ambasador. Las negosiasiones no teniendo dado resultado, sinko anios deven pasar para ke Reubeni sea ekspulsado del Portugal kon el preteksto ke su prezensia esta daniando la seguritad de los konversos

La opsion de Diogo Pires

Reubeni se avia abstenido de aserkarse aviertamente a la komunitad de los konversos de Portugal. Portanto, un miembro de esta komunitad, Diogo Pires, reushe a desvelopar atadijos serkanos kon Reubeni. Diogo Pires, ke trokara mas tadre su nombre en Shlomo Molho, djugara un rolo importante en la vida de Reubeni.

Diogo Pires ke okupa el posto de sekretario en un alto tribunal atado al Rey, es un joveno de 25 anios. Avia nasido despues de la konversion forsada en 1497 i pormo de esto no seando sirkonsizado era konsiderado impuro i no se puedia aserkar de Reubeni. En esto, Pires se sirkonsiza de si para si, toma el nombre de Shlomo Molho i se prezenta a Reubeni.

Achakes del peligro ke lo aspera por aver deklarado aviertamente su djudaismo, Molho se desida de deshar el Portugal. Yega a Saloniki en 1527. Se versa en el estudio de la Kabala i aze la konosensia de rabinos famozos komo Yosef Karo i Yosef Taitazak. Yosef Karo lo yama mi preferado. Se dirija a la Tierra Santa, ande pasa un tyempo en Safed, ke es en akel tyempo el mas importante sentro kabalistiko. Ayi yega el avizo, ke en mayo 1527 los soldadosos de Karlos V, ke reyna sovre la Alamania, enserklaron a Roma i el Vatikano. Por Shlomo Molho esto es un sinio del aserkamiento de los tyempos mesianikos. Porke, asigun una kreyensya «Si Edom kaye, Yerushalayim deve alevantarse.» Molho en su retorno a Evropa, vijita a diferentes komunidades djudias i anonsa el proksimo arivo del Mashiah. Sus dikorsos son publikados en Saloniki en el anio 1529 basho el titolo Libro Magnifiko.

En 1529, Molho ariva a Ancona, sivdad basho la dominasion del Vatikano, ande se asamblan munchos konversos de Portugal i ke es yeno de espiones de la Inkizision. Aya es arestado entanto ke kristiano renegato. Portanto reushe a fuyirse del prizion i ariva a Roma. En Roma, Molho empesa a konsiderarse entanto ke el Mashiah, i asigun una leyenda «El Mashiah deve asentarse en las puertas de Roma, entre los mendiantes.» Molho se keda 30 dias en el ponte sovre el rio Tiber, en frente del Vatikano en orasionando i tomando tanid. Adolensiado por el tanid, empesa a ver viziones ke las rakonta en sus sermones en las sinagogas de Roma.

Molho es una persona impresionante i un orator fervente, ke kon sus sermones i profesias, avia ganado el apoyo de munchos djudios i de una parte de los kristianos, i mizmo del Papa. Avia predizido una inondasion en Roma i un tremblemento de tierra en Portugal, i esto avia renforsado la karizma de su imajen. Mismo ke el Papa avia ovrado por salvarlo despues ke fue kondanado a la muerte por la Inkizision en Roma, en aranjando su egzekusion fiktiva. Molho reushe a fuyirse a Venezja.

El segundo enkontro entre Reubeni i Molho

Entretyempo, Reubeni despues de aver pasado por el Este de la Espania i por el Sude de Fransia arriva a la Italia, probablamente para renkontrarse kon Molho.

Reubeni i Molho se desidan de enteresar a sus planos de konkestar la Tierra Santa al Imperor Karlos V, ke reyna en Alamania i son resividos por el en 1532, en Ratisbon (oy Regensbruk). Portanto, la reaksion del Imperor es muy negativa i los entrega a la Inkizision. Molho termina su vida en el auto-da-fé en Mantova, entanto ke un djudio kumplido en refuzando de renegar su Fey fina el alkavo momento de su egzekusion. Kuanto a Reubeni, es embiado al prision en Espania i murira ayi, en sirkonstensias non aklaradas.

El misterio de Reubeni

El Papa i el Rey de Portugal avian resivido los ofres de Reubeni kon muncho intereso. Portanto, el Vatikan i Lizbon eran en akeos tyempos leshos de ser propisios por una repuesta pozitiva a Reubeni. La Eglisia katolika estava bastante preokupada kon las aktividades de Martin Luther, ke estavan menasando su prestijo i su poder. De mismo ke el Estado de Portugal no tenia el poder armado menesterozo. De otra parte, dinguno de estos dos estados no dezean ser involvados en un konflikto kon el Imperio otomano, ke basho el reyno de Soliman el Magnifiko esta en el apojeto de su poder i menasa la sivdad de Viena.

Munchos djudios fueron konvensidos por las allegasiones de David Reubeni i ovraron aktivamente. Entre eyos personalidades famosas del Djudaismo italiano komo Bienvenida Abravanel, Daniel i Vitale da Pisa i Samuel Sarfati. Portanto, para una otra parte de los djudios, Reubeni parese mas un avanturisto ke el komandante de una armada misterioza, i sus allegasiones son resividas kon muncho septisismo.

En una letra, el Ambasador de Venezia en Roma, Marco Foscari, eskrive a la Sinioria de Venezia en Marso, 1524: «Un ambasador de los Djudios de la India arivo al Papa, ofresiendolo trezientas mil de gerreadores kontra los Turkos i demandando artileria.»

En un debate kuando le fue demandado sovre Habor, Reubeni avia respondido: «De la edad de muestro manseves somos entrenados en la gerra, i muestras armas son la espada, la lansa i el arko. Dezeamos, kon el Nombre del Dio, irmos a Yerushalayim para arankar la Tierra de Israel de los Muslumanos, porke la Fin de los Dias i de la Salvasion ya arivo. Tengo de menester de ofisiales duados ke saven azer armas i armas de fuego, i ke vengan kon mi a mi payis i ke las ovren ayi i ke ambezen a mi puevlo komo ovrarlas.»

«Somos reyes,» avia dicho kon fiertad. «I mos padres eran reyes, del tyempo de la destruksion del Templo fina oy, en los deziertos de Habor. Reynamos sovre los trivos de Reuben i de Gad i la meatad del trivo de Menashe. Egzisten en la Etiopia i en otros reynos, mueve i media trivos otros. Los mas serkos de mosotros son el trivo de Shimon i el trivo de Biniamin, ke son allado del Nilo enriva del Reyno de Shiba. Eyos biven entre dos rios, el Rio Blu i el Rio Preto ke es el Nilo. Sus payis es grande i fertilo i tienen un Rey ke se yama Baruh, el ijo del Rey Yafet. Tiene kuatro ijos: el mas aedado Saadia, el segundo Avraham, el treser Hoter, i el kuatren Moshe. Sus puevlo es muy numeroso komo el muestro, trenta miriadas, i mos konsultamos entre mosotros.»

A la kestion: «Kualo es ke vash azer kon todos los Djudios de los payises del Oksidente? Vash a vinir al Oeste para tomarlos, o komo vos vash a enderechar kon eyos?«Reubeni responde: «En primero vamos a konkerar la Tierra Santa i sus entornos. Despues muestros komandantes van a partir por el Oeste i el Este para arekojer los restos dispersados de Israel. Si los soverenos Muslumanos son bastante intelijentes, van a traer los djudios bashos sus supremasia a Yerushalayim, i van a ser aresivido kon onor, i el Dio delivrera todos los reynos al Rey de Yerushalayim.»

Despues de estas todas eksplikasiones, el djuzgo kijo saver: «Es ke es djusto ke los djudios dizen ke soz un profeto i el Mashiah?»

Aparamente Reubeni no era un avanturisto. Avia arivado a la Evropa para aparejar una aliansa entre su puevlo i el Mundo Kristiano. Pretender tener fuersas divinas, puedia provokar su dezastro: «El Dio ke me guadre, yo so un pekador delantre de mi Kreador, ke es grande de kada uno de vozotros, i mati a munchos umanos; solo en un dia mati a kuarenta enemigos. No so ni un profeto, ni el ijo de un profeto, ni un savio i ni un kabalisto. Yo so solo el komandante de una armada, el ijo del Rey Shelomo, ijo del Rey David, ijo de Jese, i mi ermano, el Rey, reyna sovre trenta miriadas en los deziertos de Habor. Mismo ke todos los marranos en el Reyno de Portugal i todos los djudios de la Italia, i de todos los lugares ke pasi, me tomaron por un profeto, un savio, o un kabalisto, les dishe: ‘El Dio ke me guadre! Yo so i fui syempre un pekador i un gerreador, del dia de mi manseves.’»

La estoria de David Reubeni se refera a uno de los mas kontroversiales sujetos de la istoria djudia: la sorte de los diez trivos del Reyno Norte de Israel, kaptivados i deportados de la Tierra Santa por los imperores de Ashur. Estos trivos fueron deportados asigun la Biblia a Alah i a Habor, i una obskuridad marka los evenementos i los developamientos ke desidieron de sus pasado, de sus suerte i de sus kultura. Empesando de la Epoka Medievala reportos sovre la deskuvierta de sus egzitensia aparesieron en eveyando en el Mundo Djudio un entereso, mesklado de fantazia i de esperansa. Sus posible aparision kon sus armias fue konsiderada en tanto ke el poder ke trayera la Redampsion Mesianika del puevlo de Israel en la Tierra Santa.

La leyenda reporta ke estos trivos biven detras del Rio Sambation, ke korre durante los sej dias de la semana i se kalma solo el dia de Shabat. Pormo ke no es permetido de traversarlo en Shabat, estos trivos son izolados del mundo. Portanto, en el tyempo Mesianiko la armadas de estos trivos traverseran el Rio de Sambation para salvar a la Kaza de Israel. En el Sanhedrin es eskrito en este sujeto: «Los diez trivos del Reyno Norte de Israel, egzilados por Ashur antes de la destruksion del Bet HaMikdash i dispersados detras del Rio Sambation i en ‘Las Montanias de la Obskuridad’ i eyos retornaran.» Sanhedrin 110b; BeMidbar Rabba 16:25.

David Reubeni i Shlomo Molho reprezentan las dos fachas de la aspirasion del Puevlo Djudio para la salvasion de la kaptividad: el primer, un aktivismo konkreto ekspresado asigun nesesitan las realidades politikas i militaras, i el segundo un mundo de esperansas mistikas.

 

Gad Nassi

———————————————————————

Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–